اسپین میں آئس رنک مردہ خانے میں تبدیل
یورپ میں کرونا وائرس کی وجہ سے روزانہ ایک ہزار سے زیادہ ہلاکتیں ہورہی ہیں اور کئی ملکوں میں حکام پریشان ہیں کہ لاک ڈاؤن کے دوران اتنی بڑی تعداد میں لاشوں کی تدفین کیسے کی جائے؟
ایک اور مسئلہ یہ درپیش ہے کہ گورکن کرونا وائرس سے ہلاک ہونے والوں کو عام میتوں کی طرح سپرد خاک نہیں کرسکتے کیونکہ اس طرح ان کے بھی وائرس سے متاثر ہونے کا خدشہ ہوتا ہے۔ اس کے لیے خصوصی لباس کی ضرورت ہوتی ہے۔ ہسپانوی حکام نے میڈرڈ کے 14 قبرستانوں میں اسی لیے تدفین روکی ہوئی ہے کہ ان کے گورکنوں کے پاس حفاظتی لباس نہیں۔
ان حالات کی وجہ سے اسپین کے دارالحکومت میڈرڈ میں ایک آئس رنک کو عارضی طور پر مردہ خانے میں تبدیل کردیا گیا ہے۔ آئس رنک برف کے اس میدان کو کہتے ہیں جس پر آئس اسکیٹنگ کی جاتی ہے۔ یہ آئس رنک میڈرڈ کے شاپنگ مال پلاسیو ڈی ہیلو یا آئس پیلس میں قائم ہے جس میں 1800 اسکیٹرز کی گنجائش ہے۔ مقامی حکام نے بتایا کہ اسے لاشوں کو رکھنے کے لیے استعمال کیا جائے گا۔
اسپین میں کرونا وائرس تیزی سے پھیل رہا ہے جہاں منگل تک 40 ہزار کیسز کی تصدیق ہوچکی تھی۔ پیر کو ایک دن میں 539 افراد ہلاک ہوئے تھے۔ ہلاکتوں کی مجموعی تعداد 2700 ہوچکی ہے جن میں سے نصف ہلاکتیں میڈرڈ اور اس قرب و جوار میں ہوئی ہیں۔
امریکہ کو مکمل بند نہیں ہونا چاہئے، صدر ٹرمپ
امریکی صدر ڈونلڈ ٹرمپ نے اشارتاً کہا ہے کہ وہ ملک میں سماجی فاصلے کی پابندی میں کمی کرنے کا ارادہ رکھتے ہیں۔ انہوں نے پیر کے روز کہا کہ ہمارے ملک کو مکمل طور پر بند نہیں ہونا چاہئیے تھا۔
صدر ٹرمپ نے وائٹ ہاؤس کی کرونا وائرس ٹاسک فورس کی طرف سے میڈیا کو بریفنگ دیتے ہوئے کہا کہ امریکا دنیا کی سب سے بڑی معیشت ہے اور ماہرین اس بات کا جائزہ لے رہے ہیں کہ ملک بھر میں شٹ ڈاؤن کو ختم کرنے کے سلسلے میں کیا اقدامات ضروری ہیں۔
صدر ٹرمپ کا کہنا تھا کہ مسلسل جاری اقتصادی بحران کے باعث ہونے والی ہلاکتیں کرونا وائرس سے ہونے والی ہلاکتوں سے کہیں زیادہ ہوسکتی ہیں۔ انہوں نے کہا کہ کرونا وائرس سے ہونے والی اموات ایک فیصد سے بھی کم ہیں اور یہ شرح توقعات سے کہیں کم رہی ہے۔
صدر ٹرمپ نے اس عزم کا اظہار کیا کہ امریکا کاروبار کیلئے جلد دوبارہ کھلے گا۔ انہوں نے اس خیال کو رد کر دیا کہ اس کیلئے تین سے چار ماہ لگ سکتے ہیں۔
بھارت میں 21 دن کے لیے لاک ڈاؤن کا اعلان
بھارت کے وزیراعظم نریندر مودی نے منگل کی رات سے ملک بھر میں 21 روزہ لاک ڈاؤن کا اعلان کردیا ہے۔ یہ فیصلہ ملک میں کرونا وائرس کو پھیلنے سے روکنے کے لیے کیا گیا ہے۔
عالمگیر وبا سے متعلق قوم سے دوسرے خطاب میں وزیراعظم مودی نے کہا کہ انھوں نے کہا کہ مختلف ملکوں کے تجربات کے پیش نظر اور ماہرین کے مطابق اس کو پھیلنے سے روکنے کا واحد طریقہ سوشل ڈسٹینسنگ یا سماجی دوری ہے۔ انھوں نے عوام سے کہا کہ اگر وہ 21 دن تک سماجی دوری قائم نہیں کریں گے اور اپنے گھروں سے باہر نکلیں گے تو ملک 21 سال پیچھے چلا جائے گا۔
وزیراعظم مودی نے کہا کہ ملک میں لاک ڈاؤن سے معاشی نقصانات ضرور ہوں گے لیکن وبا کا سلسلہ توڑنے اور لوگوں کی زندگیاں بچانے کے لیے یہ اقدام ضروری ہے۔ صحت کی سہولتیں فراہم کرنے کے لیے حکومت نے 15 ہزار کروڑ روپے مختص کردیے ہیں۔ عوام کو اشیائے ضرورت کی فراہمی برقرار رکھنے کے لیے ہر ممکن اقدامات کیے جائیں گے۔
بھارت میں اب تک کرونا وائرس کے 500 سے زیادہ کیسز کی تصدیق ہوچکی ہے جبکہ 10 افراد ہلاک ہوئے ہیں۔
- By محمد ثاقب
آج رات سے ملک بھر میں ایک ہفتے کے لیے ٹرین سروس معطل
پاکستان ریلوے نے کرونا وائرس کے پھیلاؤ کو روکنے کے لیے آج رات سے ملک بھر میں ایک ہفتے کے لیے ٹرین سروس معطل کرنے کا اعلان کیا ہے۔ اس اعلان کے بعد ملک کے سب سے بڑے شہر کراچی سے ملک کے مختلف علاقوں کو جانے والی ریل گاڑیوں میں مسافروں کا بے حد رش ہے۔ اس بارے میں مزید بتارہے ہیں کراچی سے ہمارے نمائندے محمد ثاقب