کوئٹہ مکمل طور پر لاک ڈاؤن
بلوچستان میں کرونا وائرس سے متاثرہ افراد کی تعداد 131 ہو گئی ہے۔ گزشتہ 24 گھنٹوں کے دوران مزید 11 افراد میں کرونا وائرس کی تصدیق ہوئی ہے۔
صوبائی حکومت کے ایپکس کمیٹی کے اجلاس کے فیصلے کے مطابق کوئٹہ شہر کو مکمل طور پر لاک ڈاﺅن کر دیا گیا ہے۔ کسی بھی فرد کو شہر کے اندر آنے اور باہر جانے کی اجازت نہیں دی جا رہی ہے۔
صوبائی حکومت کے ترجمان لیاقت شاہوانی کے مطابق بلو چستان میں اب تک کل 1455 افراد کے ٹیسٹ کیے گئے ہیں جن میں 131 مثبت، 1159 منفی اور 131 ٹیسٹ کے رزلٹ آنا باقی ہیں۔
چیف سیکرٹری بلوچستان کا کہنا ہے کہ اب تک 19115 زائرین اور مختلف شعبوں سے تعلق رکھنے والے افراد ایران سے بلوچستان میں داخل ہوئے ہیں جن میں سے 4139 زائرین کو ان کے صوبوں میں بھجوایا گیا ہے جب کہ بلوچستان سے تعلق رکھنے والے 457 زائرین کو کوئٹہ بھجوایا گیا ہے جن میں سے 113 افراد کے کرونا وائرس ٹیسٹ مثبت آئے ہیں۔
- By سہیل انجم
بھارت میں کرونا متاثرین کی تعداد 649 ہو گئی
بھارت میں کرونا وائرس سے متاثرہ افراد کی تعداد 649 تک پہنچ گئی اور ملک بھر میں اب تک اس وبا سے 13 افراد ہلاک ہو چکے ہیں۔
دہلی میں جعفرآباد کے علاقے موج پور میں ایک محلہ کلینک کے ڈاکٹر، اس کی بیوی اور بیٹی میں کرونا وائرس کی تشخیص ہوئی ہے جس کے بعد اُن 800 افراد کو بھی الگ تھلگ کر دیا ہے جو ان سے رابطے میں آئے تھے۔
مذکورہ ڈاکٹر کی کلینک میں کرونا وائرس کی شکار خاتون علاج کی غرض سے گئی تھیں جو کہ سعودی عرب سے حال ہی میں وطن واپس پہنچی تھیں۔
ادھر بھارت بھر میں لاک ڈاؤن کی وجہ سے دیہاڑی دار مزدور شدید مشکلات سے دو چار ہیں جنہیں کام نہیں مل رہا۔ دریں اثنا حزبِ اختلاف کی جماعت کانگریس کی صدر سونیا گاندھی نے وزیرِ اعظم نریندر مودی کے نام ایک خط میں ملک گیر لاک ڈاؤن کا خیر مقدم کیا ہے۔
امریکی مسلم تنظیموں نے گھروں پر فوڈ باکسز پہنچانا شروع کر دیے
امریکہ میں مسلم فلاحی اداروں نے کرونا وائرس کی وجہ سے گھروں تک محدود افراد کو ان کی ضرورت کی اشیا گھروں تک پہنچانے کا سلسلہ شروع کر دیا ہے۔ جن میں اسلامک کونسل آف نارتھ امریکہ یا 'اکنا ریلیف یو ایس اے' اور پاکستانی امریکی ڈاکٹروں کی تنظیم 'اپنا' شامل ہیں۔
وائس آف امریکہ کو ایک انٹرویو میں اکنا ریلیف یو ایس اے کے ہنگر ریلیف شعبے کے ڈائریکٹر زاہد حسین نے بتایا کہ جب سے کرونا وائرس بحران شروع ہوا ہے اکنا نے لوگوں کو ان کی دہلیز پر گراسری فوڈ باکسز مفت پہنچانے کے ایک ملک گیر منصوبے کا آغاز کر دیا ہے۔
انہوں نے بتایا کہ اس پراجیکٹ کے تحت ادارے نے ہزاروں مسلمانوں اور غیر مسلموں کو امریکہ کے بڑے شہروں میں قائم اپنی 36 فوڈ پینٹریز کے ذریعے گراسری فوڈ باکس ان کے گھروں کی دہلیز تک مفت پہنچانا شروع کر دیے ہیں۔
ہر فوڈ باکس میں 75 سے 80 پاؤنڈ فوڈ موجود ہوتا ہے جس میں چاول، آٹا، دالیں، دودھ، انڈے، ڈبوں میں بند کھانے، سیریل، پاستا، چینی، نمک، حلال چکن اور بیف کے پیکٹس شامل ہوتے ہیں۔
غزہ اور مغربی کنارے میں کرونا وائرس کا خطرہ
محدود وسائل، زائد آبادی اور مالی مشکلات کے باعث غزہ اور مغربی کنارے کے لوگوں میں کرونا وائرس کی تشویش میں اضافہ ہو گیا ہے۔
غزہ کی سڑکوں پر اب بھی آمد و رفت جاری ہے۔ کھانے پینے کے سامان کی دکانیں کھلی ہیں۔ خصوصی حفاظتی لباس پہنے کارکن جراثیم کش ادویات سڑکوں پر چھڑک رہے ہیں مگر قریب کھڑے دکاندار منہ ڈھانپنے سے بھی بے نیاز ہیں۔
چند ہفتے پہلے تک غزہ کے لوگ امید کر رہے تھے کہ اسرائیل اور مصر کے ساتھ سرحد پر تیرہ برس کی سخت ناکہ بندی کووڈ 19 کو فلسطینی علاقے میں داخل ہونے سے روک لے گی اور اس کے بیس لاکھ لوگ اس سے محفوظ رہیں گے مگر ایسا نہیں ہوا۔