عالمگیر وبا، ایک دن میں 50 ہزار نئے مریض
کرونا وائرس کے مریضوں اور اموات کی تعداد برق رفتاری سے بڑھ رہی ہے اور شہروں کو لاک ڈاؤن کرنے کے باوجود صورت حال میں بہتری دکھائی نہیں دے رہی۔ گزشتہ چوبیس گھنٹوں کے دوران دنیا بھر میں پہلی بار نئے کیسز کی تعداد 50 ہزار سے زیادہ ہو گئی ہے جب کہ مسلسل تیسرے دن دو ہزار سے زیادہ ہلاکتیں ہوئی ہیں۔
امریکہ اور اٹلی میں مریضوں کی تعداد 80 ہزار سے زیادہ ہو چکی ہے اور ایسا لگتا ہے کہ چند گھنٹوں کے بعد دونوں ملکوں میں چین سے زیادہ کیسز ہو جائیں گے۔ برطانیہ میں پہلی بار ایک دن میں سو سے زیادہ اور فرانس میں پہلی بار تین سو زیادہ اموات ہوئی ہیں۔
جان پاکنز یونیورسٹی اور ورڈومیٹرز کے مطابق جمعرات کو اٹلی میں 712 افراد ہلاک ہوئے اور 6203 نئے مریضوں کی تصدیق ہوئی۔ کل ہلاکتیں 8 ہزار اور مجموعی کیسز 80 ہزار سے زیادہ ہو گئے ہیں۔
سپین میں آج 498 افراد ہلاک ہوئے اور 6682 نئے مریضوں کی تصدیق ہوئی۔ کل ہلاکتیں 4145 اور مجموعی کیسز 56 ہزار سے زیادہ ہو گئے ہیں۔ فرانس میں 365 افراد ہلاک ہوئے اور 3922 نئے مریضوں کی تصدیق ہوئی۔ کل ہلاکتیں 1696 اور مجموعی کیسز 29155 ہو گئے ہیں۔
امریکہ میں جمعرات کی سہہ پہر تک 136 افراد ہلاک ہو چکے تھے اور 12646 نئے مریضوں کی تصدیق ہوئی تھی۔ کل ہلاکتیں 1163 اور مجموعی کیسز 80857 ہو گئے ہیں۔
برطانیہ میں گزشتہ چوبیس گھنٹوں کے دوران 115 افراد ہلاک ہوئے اور 2129 نئے مریضوں کی تصدیق ہوئی۔ کل ہلاکتیں 578 اور مجموعی کیسز 11658 ہوگئے ہیں۔ جرمنی میں 33 افراد ہلاک ہوئے اور 6323 نئے مریضوں کی تصدیق ہوئی۔ کل ہلاکتیں 239 اور مجموعی کیسز 43646 ہو گئے ہیں۔
باجماعت نماز اور نمازِ جمعہ کے اجتماعات کو محدود کیا جائے گا: حکومت پاکستان
پاکستان میں حکومت نے اعلان کیا ہے کہ ملک بھر کے تعلیمی ادارے 31 مئی تک بند رہیں گے۔
حکومت نے فیصلہ کیا ہے کہ مساجد کو بند نہیں کیا جائے گا البتہ باجماعت نماز اور نمازِ جمعہ کے اجتماعات کو محدود کیا جائے گا۔
اسلام آباد میں وزیر پلاننگ اسد عمر، وزیر اعظم کے معاون خصوصی برائے صحت ڈاکٹر ظفر مرزا اور چیئرمین این ڈی ایم اے لیفٹننٹ جنرل افضل نے ایک پریس کانفرنس میں بتایا کہ عالمی بحران کے پاکستان پر بھی اثرات آرہے ہیں۔ مربوط حکمت عملی پر کام کر رہے ہیں تاکہ کرونا کے کم سے کم اثرات ہوں۔ 182سے زائد ممالک میں کرونا وائرس پھیل چکا ہے۔ پاکستان بھر میں اعداد و شمار کی بنیاد پر فیصلے کیے جا رہے ہیں تاکہ فیصلے غلط نہ ہوں۔
اسد عمر نے کہا کہ تمام سیاسی جماعتیں اور صوبے مل کر کام کر رہے ہیں۔ پاکستان میں آٹے کی کوئی کمی نہیں ہے۔
این ڈی ایم اے کے چیئرمین لیفٹننٹ جنرل افضل نے کہا کہ ملک بھر میں آئی سی یوز میں کام کرنے والے 30 ہزار ڈاکٹرز اور طبی عملے کے لیے مکمل کِٹس تیار کر لی گئی ہیں۔ جن میں حفاظتی لباس کے ساتھ این 95 ماسک، سرجیکل ماسک اور گلووز شامل ہوں گے۔ یہ تمام سامان 5 اپریل تک تمام طبی عملے تک پہنچا دیا جائے گی۔
لیفٹننٹ جنرل افضل کا کہنا تھا کہ مزید 1000 وینٹی لیٹرز بھی جلد پاکستان پہنچ رہے ہیں۔ پنجاب میں 450 وینٹی لیٹرز خراب تھے اب وہ تعداد 61 رہ گئی ہے۔
انہوں نے کہا کہ اس وقت آئی سی یوز میں بیڈز کی تعداد 19ہزار سے زائد ہو چکی ہے۔
وزیر مذہبی امورنورالحق قادری نے کہا کہ مساجد بند نہیں کی جائیں گی لیکن باجماعت نماز اور نماز جمعہ کے اجتماعات کو محدود کیا جائے۔ لوگوں کو باور کروایا جائے گا کہ وہ گھروں پر نماز ادا کریں۔
انہوں نے کہا کہ خانہ کعبہ اور مسجد نبوی کے بعض حصوں کو بند کردیا گیا ہے۔ کربلا میں امام حسین کا مزار بند ہے۔
نورالحق قادری کا کہنا تھا کہ سعودی حکومت نے پاکستان کو لکھا ہے کہ حج کے حوالے سے مختلف معاہدے نہ کیے جائیں۔ اب تک حج منسوخ ہونے کے حوالے سے کوئی حتمی بات سامنے نہیں ٓائی۔
ڈاکٹر ظفر مرزا نے کہا کہ پاکستان میں کرونا وائرس کے ایک ہزار 128مریض ہیں۔