- By شمیم شاہد
پشاور میں نمازِ جمعہ گھروں پر ادا، لاک ڈاؤن کے سبب سڑکیں سنسان
ملک کے دیگر صوبوں کی طرح خیبر پختونخوا کے بیشتر اضلاع میں بھی زیادہ تر لوگوں نے نماز جمعہ گھروں پر ہی ادا کی اور مساجد میں نماز کے اجتماعات نہیں ہوئے۔ وفاقی حکومت کے فیصلے کے مطابق خیبر پختونخوا حکومت نے گزشتہ روز مساجد میں نمازوں کے اجتماعات محدود کرنے کی ہدایت کی تھی۔ ادھر پشاور میں لاک ڈاؤن کے سبب سڑکیں بھی سنسان ہیں۔
کراچی: پابندی کے باوجود میمن مسجد میں نمازِ جمعہ کا اجتماع
کراچی کی میمن مسجد میں حکومتی پابندی کے باوجود لوگ جمع ہوئے اور نمازِ جمعہ ادا کی۔ سندھ کی صوبائی حکومت نے کرونا وائرس کے پیشِ نظر گزشتہ روز مساجد میں نماز کے اجتماعات محدود کرنے کا حکم دیا تھا اور ایک مسجد میں تین سے پانچ نمازیوں کی اجازت دی تھی۔
بلوچستان کی مساجد میں بھی پابندی کے باوجود شہریوں نے مساجد میں نماز جمعہ باجماعت ادا کی۔ حکومتِ بلوچستان نے علمائے کرام کی مشاورت کے بعد شہریوں کو گھروں میں نماز ظہر ادا کرنے کی ہدایت کی تھی۔
صوبہ خیبرپختونخوا کے بیشتر اضلاع میں زیادہ تر لوگوں نے نماز جمعہ گھروں اور حجروں میں ادا کی۔ پشاور سمیت بیشتر شہروں میں مساجد میں باجماعت نماز بھی ادا کی گئی، لیکن نمازیوں کی تعداد کم رہی۔
کرونا وائرس سے متاثرہ ضلع بونیر سمیت کئی اضلاع کے انتظامی اور قانون نافذ کرنے والے اداروں کے عہدے داروں نے اعلانات کے ذریعے لوگوں سے مساجد میں نہ آنے کی اپیل کی۔
سارک ممالک کے ساتھ مل کر اس وبا کا مقابلہ کر رہے ہیں: امریکہ
امریکہ کی نائب معاون وزیر خارجہ ایلس ویلز نے کہا ہے کہ امریکہ جنوبی ایشیا میں کرونا وائرس کی وبا سے نمٹنے کے لیے علاقائی تنظیم (سارک) کے رُکن ملکوں کے ساتھ مل کر کام کر رہا ہے۔
ایلس ویلز نے ایک ٹوئٹ میں کہا کہ "گزشتہ کئی دہائیوں پر محیط ہماری شراکت داری کے باعث خطے کے ان ملکوں میں صحتِ عامہ کے بنیادی ڈھانچے کی تشکیل اور ہنگامی صورتِ حال سے نمٹنے کے لیے کافی کام ہوا ہے۔
اُن کا کہنا تھا کہ سارک ممالک کے طبی ماہرین، سائنس اور دیگر شعبوں کے ماہرین سے تعاون پر امریکہ کو فخر ہے۔
ایلس ویلز کا کہنا تھا کہ کرونا وائرس سے نمٹنے کے لیے ایک کروڑ 88 لاکھ ڈالر کے سارک فنڈ سے ظاہر ہوتا ہے کہ جنوبی ایشیائی ممالک مل کر اس عالمی وبا کا مقابلہ کرنے کے لیے پر عزم ہیں۔