کرونا کا خاتمہ کب تک ممکن؟
عالمی سطح پر پھیلنے والی کرونا وائرس کی وبا نے روزمرہ زندگی کے معمولات کو یکسر تبدیل کر دیا ہے۔ ملازمت، تعلیم، کھیل، تقریبات یا پھر سماجی رابطے۔ سبھی کچھ بدل گیا اور ایک بے یقینی کی فضا نے روز مرہ زندگی کو بوجھل کر دیا ہے۔
سماجی دوری کا یہ سلسلہ کب تک جاری رہے گا؟ کوئی نہیں جانتا لیکن ماہرین کہتے ہیں اس کا جواب مشکل ہے اور دار و مدار اس بات پر ہے کہ سماجی دوری کس حد تک مؤثر ثابت ہوتی ہے اور کرونا کی وبا کے پھیلاؤ کو روکنے میں کتنی مدد ملتی ہے۔
حال ہی میں امریکہ میں اپریل کے اختتام تک اس سماجی دوری کو قائم رکھنے کا اعلان کر دیا گیا ہے اور یہی ماہرین کا خیال ہے کہ اس عرصے میں صورت حال کو بہتر بنانے میں مدد مل سکتی ہے بشرطیکہ اس پر سختی سے عمل کیا جائے۔
اسپین میں ایک دن میں 913، اٹلی میں 812 ہلاکتیں
کرونا وائرس کا تیزی سے پھیلاؤ جاری ہے اور اموات کی تعداد بڑھتی جارہی ہے۔ اسپین میں گزشتہ 24 گھنٹوں کے دوران 913 اور اٹلی میں 812 افراد ہلاک ہو گئے ہیں۔
جان ہاپکنز یونیورسٹی اور ورڈومیٹرز کے مطابق دنیا بھر میں معلوم مریضوں کی تعداد سات لاکھ 75 ہزار سے زیادہ ہو گئی ہے جب کہ 37 ہزار ہلاکتیں ہو چکی ہیں۔
اسپین میں پیر کو 913 افراد ہلاک ہوئے اور 7846 نئے مریضوں کی تصدیق ہوئی۔ وہاں کل ہلاکتیں 7716 ہیں جب کہ کیسز کی تعداد 87956 ہو گئی ہے جو اب چین سے زیادہ ہے۔
گزشتہ 24 گھنٹوں کے دوران اٹلی میں مزید 812 افراد چل بسے جب کہ 4050 نئے کیس سامنے آئے ہیں۔ یورپی یونین کے اس رکن ملک میں اب کل کیسز کی تعداد ایک لاکھ سے زیادہ ہوگئی ہے اور 11591 افراد جان سے ہاتھ دھو بیٹھے ہیں۔
امریکہ میں متاثرین کی تعداد چین کے مقابلے میں دو گنا ہو گئی
امریکہ میں کرونا وائرس کے کیسز کی تعداد چین کے مقابلے میں دو گنا ہو چکی ہے اور تیزی کے ساتھ نئے کیسز میں اضافہ ہو رہا ہے۔
کرونا وائرس کے کیسز پر نظر رکھنے والے ورلڈڈو میٹر کے مطابق پیر تک امریکہ میں کرونا وائرس کے مجموعی کیسز کی تعداد ایک لاکھ 64 ہزار 253 تک پہنچ گئی ہے جب کہ اس وبا سے اب تک تین ہزار 167 افراد ہلاک ہو چکے ہیں۔
چین سے جنم لینے والے کرونا وائرس نے وہاں 81 ہزار 518 افراد کو متاثر کیا تھا جب کہ اس وبا سے چین میں اب تک تین ہزار 305 ہلاکتیں رپورٹ ہوئی ہیں۔
- By سدرہ ڈار
لاک ڈاؤن میں علاج کی مفت آن لائن سہولت دستیاب
پاکستان میں لاک ڈاؤن کے دوران ایک اہم مسئلہ بیماری کے لیے معالجین تک رسائی کا نہ ہونا بھی ہے۔اس سلسلے میں ٹیلی میڈیسن کا طریقہؑ کار خاصا کار آمد ثابت ہو رہا ہے۔
'صحت کہانی' کے نام سے کراچی سے ملک کے بہت سے شہروں میں کام کرنے والا ٹیلی میڈیسن ادارہ اس وقت کرونا وائرس کے پیش نظر اپنی موبائل ایپلی کیشن کو صارفین کے لیے مفت فراہم کر رہا ہے جس میں خواتین ڈاکٹرز کی مدد سے ان مریضوں کا علاج یا کاوؑنسلنگ کی جا رہی ہے جنھیں اس کی اشد ضرورت ہے۔
ڈاکٹر سارہ سعید 'صحت کہانی' کی بانی ہیں۔ اُن کے مطابق یہ ادارہ دو طریقوں سے ملک میں کام کر رہا ہے۔ پہلے طریقہ کار کے تحت پسماندہ علاقوں میں ان کے کئی کلینکس ہیں جہاں ایک تربیت یافتہ نرس موجود ہوتی ہے جو وہاں آنے والے مریضوں کو آن لائن ڈاکٹر کی مدد سے علاج کی آسانی فراہم کرنے میں مدد دیتی ہیں۔
دوسرا طریقہؑ کار موبائل اپیلی کیشن ہے جس کی مدد سے مریض 24 گھنٹے کسی بھی ڈاکٹر سے آڈیو یا ویڈیو لنک کی مدد سے رابطے میں آسکتا ہے۔