پاکستان میں کرونا وائرس سے ہلاکتیں 34 ہو گئیں
پاکستان میں گزشتہ 24 گھنٹوں کے دوران کرونا وائرس کے شکار مزید آٹھ مریض چل بسے جس کے بعد ہلاکتوں کی مجموعی تعداد 34 ہو گئی ہے۔
سرکاری اعداد و شمار کے مطابق ملک بھر میں کرونا وائرس کے مذید 95 نئے کیسز سامنے آئے ہیں اور اس طرح متاثرین کی مجموعی تعداد 2386 تک پہنچ چکی ہے۔
کرونا وائرس کے شکار اب تک 107 مریض صحت یاب ہو چکے ہیں اور نو کی ہلاکت تشویشناک بتائی جاتی ہے۔
- By ضیاء الرحمن
لاہور ایکسپو سینٹر کرونا مریضوں کے اسپتال میں تبدیل
دنیا بھر میں کرونا وائرس کے مریضوں کے علاج کے لیے پبلک پارکس تو کہیں فٹبال گراؤنڈز میں اسپتال بنائے جا رہے ہیں۔ پاکستان میں بھی ایک ہزار بستروں پر مشتمل اسپتال لاہور کے ایکسپو سینٹر میں بنایا گیا ہے۔ اس اسپتال میں کیا سہولیات میسر ہوں گی؟ مزید بتا رہے ہیں ضیاالرحمٰن
- By اصفر امام
پاکستان میں پھنسے امریکیوں کی واپسی کے لیے خصوصی پرواز
کرونا وائرس کی وبا کے باعث دنیا بھر کے لیے پروازیں منسوخ ہونے کے باعث پاکستان میں پھنسے ہوئے امریکی شہریوں اور گرین کارڈ ہولڈرز کی پہلی کھیپ خصوصی امریکی چارٹرڈ طیارے کے ذریعے تین اپریل کو واشنگٹن پہنچے گی۔ تاہم بیرونِ ملک سے پاکستان آنے والی پروازوں پر گیارہ اپریل تک بدستور پابندی عائد رہے گی۔
پاکستان میں سینکڑوں کی تعداد میں ایسے پاکستانی امریکی پھنس کر رہ گئے ہیں جو اپنے عزیزوں سے ملنے یا کسی کاروباری مصروفیت کی وجہ سے پاکستان گئے تھے۔
ان کی وطن واپسی کے لئے امریکی سفارت خانے نے یکم اپریل کو خصوصی پرواز کا اہتمام کیا تھا تاہم اسے کسی وجہ سے منسوخ کر دیا گیا۔ اب یہ پرواز جمعہ تین اپریل کی صبح دو بجے واشنگٹن کے ڈیلس اہئرپورٹ کے لئے روانہ ہو گی۔
فرانس میں کرونا وائرس سے مزید 1355 اموات
فرانس میں جمعرات کو کرونا وائرس سے مزید 1355 اور اسپین میں 961 اموات کا اعلان کیا گیا جس کے بعد دنیا بھر میں چوبیس گھنٹوں میں ہلاکتوں کی تعداد ساڑھے پانچ ہزار ہوگئی۔ عالمگیر وبا کی زد میں آنے والے مریضوں کی تعداد دس لاکھ اور اموات کی تعداد 52 ہزار سے زیادہ ہوچکی ہے۔
امریکہ میں روزانہ بڑے پیمانے پر کرونا وائرس کے ٹیسٹ کیے جا رہے ہیں جس کی وجہ سے مریضوں کی تعداد غیر معمولی طور پر بڑھ رہی ہے۔ جمعرات کی سہہ پہر تک مزید 25 ہزار کیسز کی تصدیق ہوئی تھی اور 700 سے زیادہ افراد ہلاک ہوچکے تھے۔ اس وقت ملک میں کیسز کی مجموعی تعداد 2 لاکھ 40 ہزار اور ہلاکتوں کی تعداد 5800 سے زیادہ ہے۔
جان ہاپکنز یونیورسٹی اور ورڈومیٹرز کے مطابق، اٹلی میں جمعرات کو 760 اموات ہوئیں۔ اٹلی میں کل ہلاکتیں 13915 اور اسپین میں 10348 ہوگئی ہیں۔ اٹلی میں مریضوں کی تعداد ایک لاکھ 15 ہزار اور اسپین میں ایک لاکھ 12 ہزار ہوچکی ہے۔
برطانیہ میں گزشتہ 24 گھنٹوں کے دوران 569، بیلجیم میں 183، جرمنی میں 176، نیدرلینڈز میں 166 اور ایران میں 124 افراد جان سے ہاتھ دھو بیٹھے۔ فرانس میں ہلاکتوں کی تعداد 5387، ایران میں 3160، برطانیہ میں 2921، نیدرلینڈز میں 1339، جرمنی میں 1107 اور بیلجیم میں 1011 تک پہنچ گئی ہے۔
کئی دوسرے ملکوں میں بھی گزشتہ 24 گھنٹوں میں بڑی تعداد میں ہلاکتیں ہوئی ہیں جن میں ترکی میں 79، سویڈن میں 69، برازیل میں 57، سوئزرلینڈ میں 48 اور کینیڈا میں 47 اموات شامل ہیں۔ جمعرات کو 80 ملکوں میں کرونا وائرس سے اموات ریکارڈ کی گئی ہیں۔
جرمنی میں مریضوں کی تعداد 84 ہزار، فرانس میں 59 ہزار، ایران میں 50 ہزار اور برطانیہ میں 33 ہزار سے زیادہ ہوگئی ہے۔ سوئزرلینڈ اور ترکی میں تعداد 18 ہزار، بیلجیم میں 15 ہزار، نیدرلینڈز میں 14 ہزار اور کینیڈا اور آسٹریا میں 11 ہزار ہے۔
چین کے اعداد و شمار پر امریکی صدر ڈونلڈ ٹرمپ شکوک و شبہات کا اظہار کرچکے ہیں۔ لیکن، چین نے اس پر ناراضی کا اظہار کیا ہے۔ چینی حکام کے مطابق، جمعرات کو 6 ہلاکتیں ہوئیں اور 35 نئے کیس سامنے آئے۔ اس طرح کل ہلاکتیں 3318 اور مجموعی کیسز 81589 ہیں جو اب چار ملکوں سے کم ہیں۔
دنیا بھر میں کرونا وائرس کے 10 لاکھ سے زیادہ متاثرین میں 2 لاکھ 10 ہزار ایسے لوگ شامل ہیں جو مکمل طور پر صحت یاب ہوچکے ہیں۔ 52 ہزار اموات ہوچکی ہیں۔ باقی 7 لاکھ 44 ہزار افراد اب بھی اس بیماری میں مبتلا ہیں جن میں سے 37 ہزار کی حالت تشویش ناک ہے۔