- By شمیم شاہد
پشاور کی مساجد میں نمازِ جمعہ کے محدود اجتماعات
خیبر پختونخوا کے مرکزی شہر پشاور میں بھی نمازِ جمعہ کے محدود اجتماعات ہوئے اور مساجد میں چند ہی نمازی دکھائی دیے۔ نماز کے بڑے اجتماعات روکنے کے لیے بعض مساجد کے باہر پولیس اہلکار بھی تعینات تھے۔
امریکہ میں کرونا وائرس سے ہلاکتیں چھ ہزار سے تجاوز
امریکہ میں کرونا وائرس سے ہلاکتوں کی تعداد چھ ہزار سے زیادہ ہو گئی ہے جب کہ وائرس سے متاثرہ مریضوں کی تعداد 245000 سے تجاوز ہو چکی ہے۔ وائٹ ہاؤس کی جانب سے شہریوں کو ہدایت کی گئی ہے کہ وہ گھر سے باہر نکلتے وقت ماسک پہنیں۔
امریکہ میں جمعرات کے روز کرونا وائرس سے ایک ہزار سے زائد افراد ہلاک ہوئے ہیں۔
کرونا وائرس پر صدر ڈونلڈ ٹرمپ کی قائم کردہ ٹاسک فورس کے رکن ڈیبور برکس نے شہریوں سے اپیل کی ہے کہ وہ گھر سے باہر نکلتے وقت ماسک پہن کر رکھیں۔ اُن کے بقول بہت جلد سینٹر فار ڈیزیز کنٹرول (سی ڈی سی) کی احتیاطی تدابیر میں ماسک کو لازمی قرار دینے کی ہدایت بھی شامل کر دی جائے گی۔
ڈیبور برکس نے عوام سے اپیل کی ہے کہ وائرس کے پھیلاؤ کے پیشِ نظر گھروں تک ہی محدود رہیں اور انتہائی ضرورت کے وقت ہی گھر سے نکلیں۔
وائٹ ہاؤس کے طبی ماہرین کا کہنا ہے کہ لاک ڈاؤن اور حفاظتی اقدامات کے باوجود امریکہ میں کرونا وائرس سے ایک لاکھ سے دو لاکھ 40 ہزار افراد کے مرنے کا خدشہ ہے۔
امریکہ کے صدر ڈونلڈ ٹرمپ کا کرونا وائرس کا ٹیسٹ ایک بار پھر منفی آیا ہے۔ صدر ٹرمپ کا کہنا ہے کہ اُنہوں نے دوبارہ اپنا کرونا ٹیسٹ کرایا ہے، جس کا نتیجہ صرف 15 منٹ بعد ہی آ گیا۔
- By نذر الاسلام
لاک ڈاؤن کے باعث اسلام آباد کی سڑکیں اور بازار سنسان
اسلام آباد میں لال مسجد کی حدود میں جمعے کو تل دھرنے کی جگہ نہيں ہوتی تھی۔ ليکن اب لاک ڈاون کے باعث تمام ملحقہ سڑکيں ويران ہیں۔ مرکزی سڑکوں اور بازاروں میں سناٹا ہے لیکن اشیائے خور و نوش کی دکانیں اور ميڈيکل اسٹورز کھلے ہیں۔ اس کے علاوہ سڑکوں پر ماسک بيچنے والے بھی دکھائی دے رہے ہیں۔
خیبرپختونخوا میں 151 مریض قرنطینہ سے ڈسچارج
پاکستان کے صوبہ خیبر پختونخوا کے جنوبی ضلع ڈیرہ اسماعیل خان میں قائم قرنطینہ میں داخل 151 مریضوں کو صحت مند قرار دے کر ڈسچارج کر دیا گیا ہے۔
خیبرپختونخوا کے مشیر صحت اجمل وزیر نے ذرائع ابلاغ کو بتایا کہ ڈسچارج ہونے والے زائرین میں 121 گومل یونیورسٹی میں موجود تھے۔ 20 افراد ڈیرہ اسماعیل خان کے سرحدی علاقے درازندہ کے مرکز میں تھے۔ یہ تمام زائرین پچھلے سال مارچ کے تیسرے ہفتے میں تفتان سے آئے تھے۔
ڈیرہ اسماعیل خان کے انتظامی کمشنر جاوید مروت نے بتایا کہ ڈسچارج کیے جانے والے تمام زائرین کا تعلق خیبر پختونخوا کے مختلف علاقوں سے ہے۔ ان میں اکثریت افغانستان سے ملحقہ قبائلی ضلع کرم سے ہے۔
ایران سے انے والے لگ بھگ 50 زائرین پشاور کے نواحی علاقے دوران پور کے شہید ذوالفقار علی بھٹو پوسٹ گریجویٹ میڈیکل کالج میں قائم قرنطینہ کے خصوصی مرکز میں زیر علاج ہیں۔
ان لوگوں میں صحت مند افراد کو بھی آئندہ چند دنوں کے دوران اپنے اپنے گھروں کو جانے کی اجازت دی جائے گی۔
حکومتی ہدایات پر خیبرپختونخوا کی بیشتر مساجد میں نماز جمعہ کی ادائیگی کے لیے چند افراد ہی مساجد گئے۔ حکام نے لوگوں کو نماز جمعہ گھروں میں ہی ادا کرنے کی ہدایت کی تھی۔