پاکستان میں پھنسے افغان شہریوں کی واپسی، چار روز کے لیے سرحد کھولنے کا اعلان
ایک بیان میں پاکستان کی وزارت خارجہ نے افغان حکومت کی خصوصی درخواست اور بنیادی انسانی ضروریات کے حوالے سے کہا گیا ہے کہ پیر کے روز سے چار دن کے لیے طورخم اور چمن کی اہم سرحدیں کھولی جا رہی ہیں، تاکہ پھنسے ہوئے افغان شہری اپنے وطن واپس جا سکیں۔
بیان میں کہا گیا ہے کہ ''ایک ہمسائے کے طور پر، جس کے ساتھ ہمارے قریبی باہمی تعلقات ہیں، پاکستان کے افغان عوام کے ساتھ یکجہتی کے رشتے ہیں، اور پھر خاص طور پر ایسے وقت میں، جب ایک عالمی وبا پھوٹ پڑی ہے'' یہ اقدام کیا جا رہا ہے۔
ہفتے کے روز جاری کردہ اعداد و شمار کے مطابق، پاکستان میں کرونا وائرس کے تصدیق شدہ مریضوں کی تعداد 2700 ہے، جب کہ اب تک کم از کم 41 ہلاکتیں واقع ہو چکی ہیں۔
اپنے ہاتھ کو چہرہ چھونے سے کیسے روکا جائے
نفسیاتی ماہرین کہتے ہیں کہ کسی سے یہ کہنا کہ وہ اپنے چہرے کو نہ چھوئے، کارگر نہیں ہے۔ بلکہ اگر آپ کسی کو بار بار روکتے ٹوکتے اور یاد دلاتے رہیں گے تو اسے غصہ آنا شروع ہو جائے گا۔ یہ عادت چھڑانے کے لیے کچھ اور طریقوں پر عمل کرنے سے بہتر نتائج نکل سکتے ہیں۔ ان میں سے چند طریقے یہ ہیں۔
چہرہ چھونے کی گنتی کریں
آپ کچھ وقت طے کریں۔ مثلاً آدھا گھنٹہ یا پندرہ منٹ یا کچھ اور۔ اپنے سمارٹ فون کی سٹاپ واچ آن کر کے آپ یہ گنیں کہ اس مقررہ وقت میں کتنی بار آپ اپنا ہاتھ چہرے پر لے جاتے ہیں۔ نفسیات کے ماہرین کہتے ہیں کہ پہلی بار یہ گنتی زیادہ ہو گی۔ جب آپ دوسری بار یہ عمل دوہرائیں گے تو اس میں کمی آئے گی۔ تیسری بار تعداد مزید کم ہو جائے گی۔ ان کا کہنا ہے کہ اس سادہ عمل سے چہرہ چھونے کی عادت میں 60 سے 70 فی صد تک کمی لائی جا سکتی ہے۔
متبادل تلاش کریں
کسی عادت سے چھٹکارہ پانے کا ایک اور طریقہ یہ ہے کہ آپ اس کا متبادل ڈھونڈیں۔ مثال کے طور پر جب چہرہ چھونے کو دل چاہے تو آپ اپنی قمیض کا کالر ٹھیک کرنے لگ جائیں۔ اگر چہرے کے کسی حصے پر کھجلی محسوس ہو رہی ہو تو آپ اپنے بازو کا کوئی حصہ کھجانا شروع کر دیں۔ بظاہر یہ بات عجیب سی لگتی ہے کہ کھجلی چہرے پر ہو تو بازو کیوں کجھایا جائے۔ تو اس کا جواب یہ ہے کہ کھجلی تو چہرے پر بھی نہیں ہو رہی ہوتی، اصل میں آپ کو عادتاً کھجلی کا احساس ہوتا ہے تاکہ آپ ہاتھ چہرے کو لگا سکیں۔
کرونا کے خلاف طویل جنگ لڑنی پڑے گی: عمران خان
پاکستان کے وزیر اعظم عمران خان نے کہا ہے کہ کوئی غلط فہمی میں نہ رہے۔ کرونا وائرس کے خلاف ہمیں طویل جنگ لڑنی پڑے گی۔ سوشل میڈیا پر آنے والی خبروں پر عوام کان نہ دھرے۔
عمران خان نے کہا کہ کرونا پاکستانی عوام کے لیے بڑا چیلنج ہے۔ اُنہوں نے کہا کہ دنیا کے ترقی یافتہ ممالک بھی مشکلات کا شکار ہیں۔ اس مشکل صورتِ حال میں جو ثابت قدم رہا، اُسے قوم ہمیشہ یاد رکھے گی۔ مشکل دور میں ہی انسان کے ایمان کا پتا چلتا ہے۔
وزیر اعظم عمران خان نے کہا کہ اُن کی حکومت نے پاکستان کی تاریخ کا سب سے بڑا معاشی پیکج دیا۔ اُنہوں نے کہا کہ پاکستان میں پانچ سے چھ کروڑ افراد غربت کی لکیر سے نیچے زندگی گزار رہے ہیں۔
عمران خان نے لاہور کے ایکسپو سینٹر میں قائم عارضی اسپتال کا بھی دورہ کیا۔
پاکستان: طورخم اور چمن بارڈر عارضی طور پر کھولنے کا اعلان
پاکستان نے آئندہ پیر سے چار روز کے لیے طورخم اور چمن سرحد کو عارضی طور پر کھولنے کا فیصلہ کیا ہے تاکہ پاکستان میں پھنسے ہوئے افغان شہری اپنے وطن واپس جا سکیں۔
پاکستان کے دفتر خارجہ نے ہفتے کو ایک بیان میں کہا ہے کہ افغان حکومت کی خصوصی درخواست اور انسانی پہلوؤں کو مد نظر رکھتے ہوئے پاکستان نے وطن واپسی کے خواہش مند افغان شہریوں کو طورخم اور چمن بارڈر کے ذریعے جانے کی اجازت دے دی ہے۔
دفتر خارجہ کے بیان میں بتایا ہے کہ افغان شہریوں کی وطن واپسی کے لیے چھ سے نو اپریل کے دوران طورخم اور چمن کی سرحد کھلی رکھی جائے گی۔
پاکستان کی طرف سے طورخم اور چمن بارڈر کو عارضی طور پر کھولنے کا اعلان افغان صدر اشرف غنی اور پاکستان کی برّی فوج کے سربراہ جنرل قمر جاوید باجوہ کے درمیان ٹیلی فونک رابطے کے دو روز کے بعد سامنے آیا ہے۔ دونوں شخصیات نے پاک افغان سرحد پر تجارتی سامان کی نقل و حرکت کے لیے ضروری اقدامات پر اتفاق کیا تھا۔
یاد رہے کہ کرونا وائرس کے پیشِ نظر پاکستان نے اپنی بین الاقوامی سرحدیں بشمول پاک افغان سرحد بند کر دی تھی۔ جس کی وجہ سے دونوں ملکوں کے درمیان آمد و رفت معطل ہے۔
پاکستان اور افغانستان کی تجارتی برداری بھی تجارت کی بحالی کے لیے سرحد کھولنے کا مطالبہ کر رہی ہے۔ لیکن دفتر خارجہ کے بیان میں اس بات کا کوئی ذکر نہیں ہے کہ سرحد کھلنے کی صورت میں مال بردار ٹرکوں کو بھی آمد و رفت کی اجازت دی جائے گی یا نہیں۔