کرونا وائرس سے ہلاکتیں ایک لاکھ سے بڑھ گئیں، متاثرین 17 لاکھ
دنیا بھر میں کرونا وائرس سے اموات کی تعداد ایک لاکھ سے زیادہ ہوگئی ہیں۔ امریکہ میں مزید 1500 اور فرانس اور برطانیہ میں لگ بھگ ایک ایک ہزار افراد ہلاک ہوگئے ہیں۔ جمعے کو 84 ملکوں میں کم از کم ایک ہلاکت ضرور ہوئی۔
جانز ہاپکنز یونیورسٹی اور ورڈومیٹرز کے مطابق، جمعے اور ہفتے کی درمیانی شب پاکستانی وقت کے مطابق رات 12 بجے تک 210 ملکوں اور خود مختار علاقوں میں کرونا وائرس کے 16 لاکھ 80 ہزار کیس سامنے آچکے تھے، جن میں سے ایک لاکھ دو ہزار افراد چل بسے تھے۔
امریکہ میں جمعے کو 1564، فرانس میں 987، برطانیہ میں 980، اٹلی میں 570، اسپین میں 523، بیلجیم میں 496، ایران میں 122، نیدرلینڈز میں 115 اور برازیل میں 103 افراد کا انتقال ہوا۔
ترکی میں 98، جرمنی میں 81، سویڈن میں 77، سوئزرلینڈ میں 54 اور کینیڈا میں 47 افراد ہلاک ہوئے۔ چین میں جمعہ کو صرف ایک اور جنوبی کوریا میں چار اموات ہوئیں۔ جاپان میں کوئی شخص ہلاک نہیں ہوا۔
امریکہ میں ہلاکتوں کی تعداد اٹلی سے صرف 600 کم رہ گئی ہے۔ اٹلی میں 18849 اور امریکہ میں 18255 افراد ہلاک ہوئے ہیں۔ اسپین میں ہلاک ہونے والوں کی تعداد 15970، فرانس میں 13197، برطانیہ میں 8958، ایران میں 4232، چین میں 3336 اور بیلجیم میں 3019 ہوچکی ہے۔
امریکہ میں اب تک کرونا وائرس کے 25 لاکھ ٹیسٹ کیے جاچکے ہیں جن میں 4 لاکھ 90 ہزار مثبت آئے ہیں۔ اسپین میں مریضوں کی تعداد ایک لاکھ 57 ہزار، اٹلی میں ایک لاکھ 47 ہزار، فرانس میں ایک لاکھ 24 ہزار اور جرمنی میں ایک لاکھ 20 ہزار تک پہنچ گئی ہے۔
مختلف ملکوں میں 50 ہزار مریضوں کی حالت تشویش ناک ہے۔ ان میں امریکہ کے 10900، اسپین کے 7300، فرانس کے 7 ہزار، جرمنی کے 4900، ایران کے 4 ہزار اور اٹلی کے ساڑھے 3 ہزار مریض شامل ہیں۔
صحت یاب ہونے والوں کی تعداد میں بھی نمایاں اضافہ ہورہا ہے اور ان کی تعداد 3 لاکھ 75 ہزار تک پہنچ گئی ہے۔ چین کے 77 ہزار، اسپین کے 55 ہزار، جرمنی کے 54 ہزار، ایران کے 35 ہزار، اٹلی کے 30 ہزار، امریکہ کے 26 ہزار اور فرانس کے 25 ہزار شہری صحت یاب ہوچکے ہیں۔
برطانیہ کے 73 ہزار میں سے صرف 135 مریض مکمل صحت یاب ہوئے ہیں۔ گرین لینڈ میں صرف 11 کیسز کا علم ہوا تھا اور تمام افراد صحت یاب ہوچکے ہیں۔
پاک افغان سرحد عوام کے لیے بند، 20 ہزار سے زائد افغان باشندے واپس چلے گئے
کرونا وائرس کے باعث لاک ڈاؤن اور سرحدی گزرگاہوں کی بندش کی وجہ سے پاکستان میں پھنسے افغان باشندوں کی وطن واپسی کا سلسلہ چار روز تک جاری رہنے کے بعد جمعے کو بند ہو گیا ہے۔
وفاقی وزارتِ داخلہ کے اعلامیے کے مطابق طورخم اور چمن کی گزرگاہوں کو چھ اپریل سے نو اپریل تک پاکستان میں پھنسے افغان باشندوں کی واپسی کے لیے کھولا گیا تھا۔
پاکستانی حکومت کے فیصلے کے مطابق روزانہ کی بنیاد پر ایک ہزار افغان باشندوں کی افغانستان واپسی کا انتظام کیا گیا تھا۔ مگر اس رعایت سے فائدہ اٹھانے والے افغان باشندوں کی تعداد 20 ہزار سے بھی زائد بتائی جاتی ہے۔
پاکستانی حکومت کی طرف سے دی گئی اس خصوصی رعایت کے دوسرے روز سات اپریل کو ہزاروں کی تعداد میں افغان باشندے طورخم اور سرحدی قصبے لنڈی کوتل میں جمع ہو گئے۔ جن کو قابو کرنا سرحدی حکام کے بس میں نہیں تھا۔
لہذٰا پاکستان سے واپس جانے والے افغان باشندوں کے لیے سرحد کھول دی گئی اسی روز ہزاروں کی تعداد میں افغان باشندے بغیر کسی پاسپورٹ، ویزہ اور دیگر سفری دستاویزات کے پاکستان سے افغانستان واپس چلے گئے۔
'ہم یہ کر دکھائیں گے'
اٹلی میں کرونا وائرس کا علاج کرنے والے طبی عملے کے ارکان نے اپنے دستانوں پر لکھا ہوا ہے کہ "ہم یہ کر دکھائیں گے۔" خیال رہے کہ اٹلی میں کرونا وائرس سے سب سے زیادہ ہلاکتیں ہوئی ہیں۔ لیکن اب وہاں وبا کا زور ٹوٹ رہا ہے۔
امریکہ کے جنگلات میں آگ بھڑک اٹھی، فائر فائٹرز کو کرونا سے بچانے کا بھی چیلنج
کرونا وائرس کے پھیلاؤ کے باعث جہاں دنیا بھر میں مختلف احتیاطی تدابیر اختیار کی جا رہی ہیں۔ وہیں جنگلات میں بھڑکنے والی آگ بجھانے والے اہلکاروں کے لیے بھی نیا طریقہ کار وضع کیا جا رہا ہے۔
سماجی دوری اختیار کرنے کی ہدایات کے باوجود آگ بجھانے والے عملے کے سیکڑوں اہلکاروں کو مل کر آگ بجھانے کی کوششیں کرنا پڑتی ہیں۔ ایسے میں یہ افراد ایک دوسرے کے بہت قریب رہتے ہیں۔
خبر رساں ادارے 'ایسوسی ایٹڈ پریس' کے مطابق امریکی ریاستوں فلوریڈا اور ٹیکساس میں موسم گرما کے آغاز سے قبل ہی جنگلات میں آگ بھڑک اُٹھی ہے۔ حکام فکر مند ہیں کہ ہزاروں فائر فائٹرز کو آگ بجھانے کے عمل کے دوران کرونا وائرس سے کس طرح بچایا جا سکتا ہے۔
ان اہلکاروں کے تحفظ کے لیے بھی نئی تجاویز دی جا رہی ہیں۔ جس کے تحت ایک فائر انجن میں ڈرائیور کے علاوہ ایک اہلکار موجود ہو گا۔ عملے کے دیگر اراکین الگ گاڑیاں استعمال کریں گے۔
اہلکاروں کو خوراک کے لیے ایسے تیار کھانے فراہم کیے جائیں گے، جس میں اُنہیں بار بار برتن چھونے کی ضرورت پیش نہ آئے۔