موبائل فون آپ کو کرونا وائرس سے بچائے گا؟
ایپل اور گوگل ںے ایسے منصوبے پر کام کرنے کا اعلان کیا ہے جس کے نتیجے میں موبائل فون استعمال کرنے والوں کو علم ہو سکے گا کہ ان کے آس پاس کوئی کرونا وائرس میں مبتلا شخص تو نہیں۔
یہ پہلا موقع ہوگا کہ ایپل اور گوگل مل کر کام کریں گی۔ صحت عامہ کے ماہرین کا کہنا ہے کہ کاروبار زندگی کو دوبارہ معمول پر لانے کے لیے ایسی ٹیکنالوجی انتہائی ضروری ہے۔
ایپل اور گوگل ایسی ایپ کے لیے بلوٹوتھ کو استعمال کرنے کا ارادہ رکھتے ہیں جو عام طور پر دو موبائل فونز میں رابطے کا ایک طریقہ ہے۔ لیکن نئے منصوبے میں انھیں کرونا وائرس کے لیے بھی استعمال کیا جائے گا۔ ایپل اور گوگل خود کوئی ایپ نہیں بنائیں گے۔ لیکن، صحت عامہ کے ماہرین کو ایسی ٹیکنالوجی فراہم کریں گے جس سے وہ خود اپنی ایپ بناسکیں گے۔
کرونا وائرس میں مبتلا افراد اپنے فون کو رضاکارانہ طور پر اپنی بیماری کے بارے میں بتائیں گے۔ ایپ کسی شخص کی شناخت اور لوکیشن ظاہر نہیں کرے گی اور نہ ہی حکومت یا کسی ادارے کو فراہم کرے گی۔ اس کا مقصد صرف اردگرد موجود لوگوں کو محتاط کرنا ہوگا جس کے لیے ان کے فون پر اطلاع دی جائے گی۔
ایپل اور گوگل مئی کے وسط تک سافٹ وئیر ڈویلپرز کو یہ ٹیکنالوجی فراہم کردیں گے۔ بعد میں ایپل اور گوگل آئی فون اور اینڈرائیڈ کے لیے آپریٹنگ سسٹمز کو بھی اپ ڈیٹ کریں گے۔ اس ٹیکنالوجی کی مدد سے ایپ ہر چند منٹ بعد کرونا وائرس میں مبتلا شخص کے قریب موجود لوگوں کے فون پر سگنل بھیجے گی تاکہ وہ خبردار ہوجائیں۔
مزید پڑھیے
کرونا وائرس: سرکاری اور نجی سکولوں میں خلیج واضح
پاکستان میں سرکاری سکولوں کی اکثریت تعلیم کی فراہمی میں بڑے پرائیویٹ سکولوں سے بہت پیچھے ہے۔ کرونا وائرس کے باعث سکول بند ہونے پر ان پرائىویٹ سکولوں نے آن لائن کلاسیں شروع کر دی ہیں۔ اس نے سرکاری اور پرائىویٹ سکولوں میں خلیج کو مزید بڑھا دیا ہے۔ ثمن خان کی رپورٹ
کرونا وائرس اور انسانی حقوق
کرونا وائرس نے پوری دنیا کے انسانوں کو صحت کے ایسے مسئلے سے دوچار کر دیا ہے کہ بہت سے عالمگیر مسائل سے توجہ ہٹ گئی ہے۔ عام طور پر انسان کی جدوجہد زندگی کی بنیادی سہولتوں اور شخصی آزادیوں کی لئے ہوتی ہے، مگر کرونا وائرس کی وبا نے اس کیلئے خود زندگی بچانا ہی مشکل کر دیا ہے۔
وہ جو اپنی بات کہنے کیلئے آزادی تحریر و تقریر کیلئے حکومتوں سے ٹکرا جانے کو تیار تھے، اب خود ایک دوسرے سے فاصلہ رکھنے پر مجبور ہیں۔
اور یہی وقت ہے کہ آزادیاں سلب کرنے والے با اختیار لوگ اپنی من مانی کا موقعہ تلاش کر رہے ہیں۔
اس کا احساس اقوامِ متحدہ میں انسانی حقوق کمشن کی ہائی کمشنر مشعل بیچلیٹ نے دلایا ہے۔ وہ خبردار کرتی ہیں کہ اگر توجہ نہ دی گئی تو کرونا وائرس کی وباء دنیا میں موجود عدم مساوات کو اور وسیع کر دے گی۔ اور اس کا نشانہ غریب اورمعذور، قلیتیں، خواتین اور معمر افراد بنیں گے۔
اقوامِ متحدہ کی عہدیدار نے ان حکومتوں پر سخت نکتہ چینی کی ہے جو اس وبا کے دوران ہنگامی اقدامات کی آڑ میں اپنی جابرانہ پالیسیوں پر عمل پیرا ہونے کی کوشش کر رہی ہیں اور ان لوگوں کے خلاف تادیبی کارروائیاں کر رہی ہیں جو ناکافی سہولتوں پر آواز اٹھاتے ہیں، خاص طور پر ان صحافیوں کے خلاف جو حکومت کے اقدامات پر تنقید کرتے ہیں۔
اقوامِ متحدہ کے انسانی حقوق کمشن کی سربراہ نے کہا ہےکہ انہیں ان حکومتوں کے بارے میں تشویش ہے جو اس عالمی وبا کا فائدہ اٹھا کر اپنی طاقت میں اضافہ کرنا چاہتی ہیں، جس کی کوئی حد نہ ہو اور جس پر کسی کی نظر نہ ہو۔