صدر ٹرمپ انتھونی فاؤچی کو عہدے سے نہیں ہٹا رہے: وائٹ ہاؤس
وائٹ ہاؤس کے ترجمان ہوگن گیڈلی نے کہا ہے کہ امریکہ کے صدر ڈونلڈ ٹرمپ متعدی امراض کے ماہر ڈاکٹر انتھونی فاؤچی کو عہدے سے نہیں ہٹا رہے۔
ترجمان کا مزید کہنا تھا کہ ذرائع ابلاغ کا کردار مضحکہ خیز ہے۔ ڈاکٹر فاؤچی صدر ٹرمپ کا قابل اعتماد معاون تھے اور اب بھی ہیں۔
خیال رہے کہ امریکہ کے صدر ڈونلڈ ٹرمپ نے اتوار کو ایک ٹوئٹ کو ری ٹوئٹ کیا تھا جس میں ڈاکٹر انتھونی فاؤچی کو ان کے عہدے سے فارغ کرنے کا ٹرینڈ استعمال کیا گیا تھا۔
رپورٹس کے مطابق صدر ٹرمپ کے معاون ڈاکٹر انتھونی فاؤچی نے کہا تھا کہ اگر کرونا وائرس کا پھیلاؤ روکنے کے لیے اقدامات پہلے کیے جاتے تو زیادہ لوگوں کی زندگی کو محفوظ کیا جا سکتا تھا۔
انہوں نے کرونا وائرس سے امریکہ میں ایک سے دو لاکھ افراد کی موت کا اندازہ بھی پیش کیا تھا جب کہ ان کا کہنا تھا کہ اگر لوگ احتیاطی تدابیر پر عمل نہ کریں تو یہ تعداد 20 لاکھ سے زائد ہو سکتی ہے۔
'نیویارک میں پابندیوں میں نرمی میں کئی ماہ لگ سکتے ہیں'
نیویارک کے گورنر انڈریو کومو نے کہا ہے کہ کرونا وائرس کے باعث عائد کی گئی پابندیوں میں نرمی اور مزید کاروبار کھولنے میں مزید کئی ماہ لگ سکتے ہیں۔
امریکی نشریاتی ادارے 'سی این این' کو دیے گئے انٹرویو میں ان کا کہنا تھا کہ ہم ایک دو ہفتوں یا تین ہفتوں کی بات نہیں کر رہے۔ ہم کئی ماہ کی بات کر رہے ہیں۔
خیال رہے کہ امریکہ میں کرونا وائرس کا مرکز نیویارک ہے۔ جہاں سب سے زیادہ ہلاکتیں ہوئی ہیں۔
انڈریو کومو نے کہا کہ نیویارک میں پابندیاں میں کمی اور کاروبار کا آغاز بتدریج ہوگا۔
ان کا کہنا تھا کہ کورنا وائرس کے باعث عائد پابندیاں تیزی سے نرم کرنے سے تباہ کن نتائج بھی سامنے آ سکتے ہیں۔
'فرانس میں لاک ڈاؤن 11 مئی تک جاری رہے گا'
فرانس میں حکومت نے کرونا وائرس کو پھیلنے سے روکنے کے لیے لاک ڈاؤن میں مزید توسیع کر دی ہے۔
فرانسیسی صدر ایمنوئل میکخواں نے پیر کو ٹیلی ویژن پر خطاب کے دوران کہا کہ فرانس میں لاک ڈاؤن 11 مئی تک جاری رہے گا۔
ان کا کہنا تھا کہ 11 مئی کے بعد اسکولوں کو مرحلہ وار کھول دیا جائے گا۔
فرانس میں ابھی تک کرونا وائرس کو پھیلنے سے نہیں روکا جا سکا ہے اور ملک بھر میں شدید تناؤ کی کیفیت پائی جاتی ہے۔
صدر کا کہنا تھا کہ کوشش جاری رکھنا ہوں گی اور متعلقہ ضابطوں کا مسلسل اطلاق کرنا ہو گا۔
انہوں نے کہا کہ ضابطوں پر جس قدر پابندی سے عمل کیا جائے گا اس سے مزید زندگیوں کو بچایا جا سکے گا۔
چیف جسٹس آف پاکستان کا کرونا ٹیسٹ منفی
سپریم کورٹ آف پاکستان میں چیف جسٹس پاکستان جسٹس گلزار احمد کے نائب قاصد کا کرونا ٹیسٹ مثبت آنے کے بعد چیف جسٹس اور ان کے اہل خانہ کا کرونا ٹیسٹ کیا گیا جو منفی آیا ہے۔
سپریم کورٹ کی طرف سے ایک نائب قاصد میں کرونا ٹیسٹ مثبت آنے کی تصدیق کی گئی ہے۔ ترجمان سپریم کورٹ کی جانب سے جاری بیان میں کہا گیا ہے کہ عدالت عظمٰی کے سٹاف ممبر میں کرونا وائرس کی تصدیق ہوئی ہے۔
نائب قاصد احسان کا علامات ظاہر ہونے پر ٹیسٹ کرایا گیا تھا، ابتدائی طور پر رپورٹ میں شک ظاہر کیا گیا تھا لیکن دوسری بار یہ ٹیسٹ کیے جانے پر رپورٹ مثبت آئی۔ جس کے بعد چیف جسٹس کے خاندان کے افراد اور سیکرٹری کے کرونا ٹیسٹ بھی کرائے گئے، تمام افراد کے ٹیسٹ منفی آئے ہیں۔
سپریم کورٹ ترجمان کے مطابق نائب قاصد احسان کا کرونا ٹیسٹ مثبت آنے پر اسے پولی کلینک آئسولیشن وارڈ منتقل کر دیا گیا ہے جہاں اسے علاج معالجے کی سہولیات دی جا رہی ہیں۔
پاکستان میں کرونا کے کیسز کی تعداد لگاتار بڑھ رہی ہے اور حکومت کی جانب سے اس سلسلہ میں کیے جانے والے لاک ڈاؤن میں مزید دو ہفتے کی توسیع کر دی گئی ہے۔
