بھارت میں تبلیغی جماعت کے امیر پر قتل خطا کا مقدمہ، ترجمان کی تردید
بھارتی ذرائع ابلاغ نے دعویٰ کیا ہے کہ حکومت نے تبلیغی جماعت کے امیر مولانا سعد کاندھلوی کے خلاف پہلے سے درج مقدمے میں قتل کی دفعہ بھی شامل کر لی ہے۔ تاہم تبلیغی جماعت کے ترجمان نے ان خبروں کو بے بنیاد قرار دیا ہے۔
میڈیا رپورٹس میں پولیس ذرائع کے حوالے سے بتایا گیا ہے کہ مولانا سعد کاندھلوی کے خلاف مقدمے میں تعزیرات ہند کی دفعہ 304 کا اضافہ کیا گیا ہے۔ اس دفعہ کے تحت ملزم کی ضمانت نہیں ہو سکتی اور جرم ثابت ہونے پر کم از کم 10 برس قید کی سزا ہو سکتی ہے۔
پولیس کا کہنا ہے کہ دہلی میں 20 سے زائد افراد کے اجتماع پر پابندی کے باوجود تبلیغی جماعت کے مرکز میں ہونے والے اجتماع میں ہزاروں افراد نے شرکت کی تھی۔ شرکا میں سے متعدد کا کرونا وائرس ٹیسٹ مثبت آیا ہے اور کچھ کی موت واقع ہو چکی ہے۔
اجتماع کے بعد تمام غیر ملکیوں کے ساتھ ساتھ بڑی تعداد میں بھارتی شرکا کو بھی قرنطینہ میں رکھا گیا ہے۔ مولانا سعد بھی از خود قرنطینہ میں ہیں۔
تبلیغی جماعت کے ترجمان شاہد علی ایڈووکیٹ نے وائس آف امریکہ سے بات کرتے ہوئے کہا ہے کہ تبلیغی جماعت کے امیر کے خلاف درج مقدمے میں قتلِ خطا کی دفعہ شامل کرنے سے متعلق خبریں بے بنیاد ہیں۔ ایسی کوئی دفعہ مقدمے میں شامل نہیں کی گئی ہے۔
- By محمد ثاقب
پاکستان میں شرح سود 2 فی صد کمی، نئی شرح 9 فی صد مقرر
پاکستان کے مرکزی بینک کی مانیٹری پالیسی کمیٹی نے ملک میں شرح سود مزید دو فی صد کم کرنے کا اعلان کیا ہے۔
ملک میں نئی شرح سود اب 9 فی صد مقرر ہوگی۔ ملک میں ایک ماہ کے کم ترین عرصے میں شرح سود میں 425 بیسز پوائنٹس کمی کی جاچکی ہے۔
مانیٹری پالیسی کے اجلاس کے بعد جاری اعلامیے میں کہا گیا ہے کہ اجلاس میں تیزی سے بگڑتے ہوئے عالمی معاشی حالات اور اس کے ملکی اقتصادی منظرنامے پر پڑنے والے اثرات کا جائزہ لیا گیا۔
اعلامیے کے مطابق اس صورت حال میں معاشی استحکام کو برقرار رکھنے کے لیے ضروری اقدامات کو ناگزیر قرار دیا گیا ہے۔
مانیٹری پالیسی کمیٹی کے ایمرجنسی اجلاس نے موجودہ معاشی منظر نامے کی روشنی میں فیصلہ کیا کہ شرح سود کو مزید 200 بیسز پوائنٹس کم کیا جائے۔
کمیٹی کے مطابق یہ عمل اور اس سے قبل اٹھائے گئے اقدامات سے کرونا وائرس سے متاثر ہونے والی شرح نمو، نجی شعبے میں ملازمتوں کے تحفظ، قرضوں کے حصول میں آسانی، قرضوں کی واپسی کی مدت میں توسیع کے ساتھ معاشی استحکام برقرار رکھنے کا بھی باعث بنے گا۔
- By روشن مغل
پاکستانی کشمیر میں دوسرے روز بھی کوئی کیس سامنے نہیں آیا
پاکستان کے زیر انتظام کشمیر میں جمعرات کو بھی کرونا وائرس کا کوئی کیس سامنے نہیں آیا۔
کشمیر کی حکومت کے ترجمان ڈاکٹر مصطفیٰ بشیر نے بتایا ہے کہ بدھ کی طرح جمعرات کو بھی کرونا وائرس کا کوئی کیس سامنے نہیں آیا۔
ان کا کہنا تھا کہ کرونا وائرس کے شبہے میں 1135 افراد کے ٹیسٹ کیے گئے جن میں سے 1061 کے نتائج آ چکے ہیں۔
ڈاکٹر مصطفیٰ بشیر کے مطابق اب تک 46 افراد کے کرونا وائرس میں مبتلا ہونے کی تصدیق ہوئی ہے۔ جن میں سے 9 مریض صحت یاب ہو کر گھروں کو جا چکے ہیں۔
افغان صدر کا ایک بار پھر طالبان پر جنگ بندی پر زور
افغانستان کے صدر اشرف غنی نے ایک بار پھر طالبان پر جنگ بندی پر زور دیا ہے۔
اشرف غنی نے کہا ہے کہ فائر بندی سے جنگ زدہ علاقوں میں امدادی رضا کاروں کو کرونا وائرس سے متاثرہ لوگوں کی مدد کر سکیں گے۔ آنے والے ہفتوں میں وبا سے مزید نقصان کا اندیشہ ہے۔
افغان صدر نے ایک بیان میں کہا ہے کہ طالبان کو امریکہ، خطے کے ممالک اور افغان عوام کی اس بات کو سننا چاہیے جس میں ان سے لڑائی کی بندش کا کہا جا رہا ہے۔
اشرف غنی نے وبا سے افغانستان میں صحت کا شعبہ شدید متاثر ہونے کا اندیشہ بھی ظاہر کیا۔