کرونا وائرس لاک ڈاؤن: پاپارازی فوٹوگرافرز کو فلمی ستاروں کی تلاش
کرونا وائرس کے سبب کیے گئے لاک ڈاؤن کی وجہ سے ہالی وڈ کے پرستار فلمی ستاروں کی نجی تصاویر دیکھنے کے خواہش مند ہیں۔ جب کہ خفیہ تصاویر لینے والے 'پاپارازی فوٹو گرافرز' فلمی ستاروں کی تلاش میں ہیں۔ جو لاک ڈاؤن کی وجہ سے اپنے گھروں تک محدود ہو کر رہ گئے ہیں۔
امریکی ریاست کیلی فورنیا میں ایک ماہ پہلے نافذ کیے جانے والے لاک ڈاؤن کے سبب نہ صرف نائٹ کلبز بند ہیں بلکہ وہ ریستوران اور سنیما گھر جو ہر وقت فوٹو گرافرز کے جھرمٹ میں ہوتے تھے۔ اُنہیں بھی تالے لگ چکے ہیں۔
ہالی وڈ فلموں کی ریڈ کارپیٹ تقاریب اور فلم پریمیئرز ملتوی ہونے کی وجہ سے اخبارات اور شوبز میگزینز فلمی ستاروں کی تصاویر کی تلاش میں ہیں۔
کرونا وائرس کے باعث شوبز شخصیات نے خود کو گھروں تک محدود کر لیا ہے اس وجہ سے پاپارازی ان کی تصاویر نہیں لے پا رہے۔
یاد رہے کہ خفیہ فوٹو گرافی کرنے والوں کو پاپارازی کہا جاتا ہے۔ ان دنوں وہ فلمی ستاروں کی نجی مصروفیات کو فلم بند کرنے کا موقع تلاش کر رہے ہیں۔
شوبز شخصیات کی کسی بھی قسم کی تصاویر نہ آنے کے سبب 'ٹیبلائڈ میگزینز' بھی فکر مند ہیں۔
افغان نیشنل آرمی کے تین اہلکار بھی کرونا میں مبتلا
افغانستان کے صوبے لغمان کے محکمہ صحت نے افغان نیشنل آرمی کے تین اہلکاروں میں کرونا وائرس کی تصدیق کی ہے۔ یہ افغان سیکیورٹی فورسز میں رپورٹ ہونے والے پہلے کیسز ہیں۔
افغانستان کے محکمہ صحت نے تصدیق کی ہے کہ جمعے کو ملک میں کرونا وائرس کے مزید 66 کیسز رپورٹ ہوئے ہیں۔ جس کے بعد ملک بھر میں کرونا سے متاثرہ مریضوں کی تعداد 905 ہو گئی ہے۔
افغان وزارتِ صحت کے مطابق یہ کیسز افغانستان کے آٹھ صوبوں میں رپورٹ ہوئے ہیں۔ ملک میں کرونا سے ہلاک ہونے والوں کی تعداد 30 ہو گئی ہے۔ جن میں تین ڈاکٹرز بھی شامل ہیں۔
افغان حکام نے وائرس کا پھیلاؤ روکنے کے لیے سرکاری دفاتر مزید تین ہفتے کے لیے بند رکھنے کا اعلان کیا ہے۔ دارالحکومت کابل کو ملانے والی رابطہ سڑکیں بھی دو ہفتے تک بند رکھنے کا فیصلہ کیا گیا ہے۔
لاک ڈاؤن کے باعث سرینگر کی سڑکیں سنسان
- By شمیم شاہد
کرونا کے باعث افغانستان میں پھنسے پاکستانی شہریوں کی واپسی
سرحدی گزرگاہوں کی بندش کے باعث افغانستان میں پھنس جانے والے پاکستانی شہریوں کی وطن واپسی کا عمل طورخم سرحد کے ذریعے جمعے کی صبح شروع کر دیا گیا ہے۔
افغانستان سے پاکستان واپس آنے والے باشندوں کے لیے لنڈی کوتل کے گورنمنٹ ڈگری کالج میں قرنطینہ سینٹر قائم کیا گیا ہے۔ جس میں 1000 افراد کو رکھنے کی گنجائش ہے۔
انتظامیہ نے لنڈی کوتل کے ضلعی ہیڈ کوارٹرز اسپتال میں کرونا وائرس کے تصدیق شدہ مریضوں کے لیے خصوصی نگہداشت وارڈ بھی قائم کر دیا ہے۔ یہ پاکستانی شہری گزشتہ ماہ مارچ سے افغانستان میں تھے۔
سرحد پار افغانستان سے طورخم کے راستے پاکستان واپس آنے والوں کو خصوصی گاڑیوں اور ایمبولینسز کے ذریعے لنڈی کوتل کے ڈگری کالج میں قائم قرنطینہ مرکز میں منتقل کیا جارہا ہے۔