مسلمان رمضان میں عبادات گھروں میں کریں: سعودی علما کونسل
سعودی عرب کی اعلیٰ ترین مذہبی ادارے اور سینئر علما کی کونسل 'مجلس ہیئۃ الکبار العلما' نے زور دیا ہے کہ دنیا کے تمام ممالک میں موجود مسلمان کرونا وائرس کے باعث درکار سماجی دوری کی ہدایت پر عمل کرتے ہوئے رمضان کے مہینے میں عبادات اپنے گھروں میں کریں۔
سینئر علما کی کونسل نے مزید کہا ہے کہ مسلمانوں کو اجتماعات سے گریز کرنا چاہیے۔ کیوں کہ زیادہ افراد کے جمع ہونے سے ہی وبا تیزی سے پھیلتی ہے۔
کونسل کا کہنا ہے کہ یاد رکھنا چاہیے کہ دیگر انسانوں کی جان بچانا ہی ایک بڑا کام ہے جس سے وہ اپنے خدا کے مزید قریب ہو سکتے ہیں۔
امریکہ میں پابندیوں کے خلاف احتجاج
امریکہ کی مختلف ریاستوں اور شہروں میں سیکڑوں افراد نے کرونا وائرس کے باعث عائد پابندیوں اور لاک ڈاؤن کے خلاف احتجاج کیا جب کہ کاروباری سرگرمیاں بحال کرنے کا مطالبہ بھی کیا گیا۔
پاکستان میں ٹیسٹ کرنے کی استعداد میں اضافہ
پاکستان میں حکومت کرونا وائرس کے ٹیسٹ زیادہ سے زیادہ کرنے کی استعداد میں بدستور اضافہ کر رہی ہے۔
سرکاری اعداد و شمار کے مطابق ملک میں اب تک 98522 افراد کے ٹیسٹ کیے جا چکے ہیں۔
اعداد و شمار میں یہ بھی سامنے آیا ہے کہ گزشتہ 24 گھنٹوں میں 7847 افراد کے ٹیسٹ کیے گئے ہیں۔
حکومت اعلان کر چکی ہے کہ اپریل کے آخر تک 25 ہزار ٹیسٹ یومیہ کرنے کی استعداد حاصل کر لی جائے گی۔
گزشتہ ہفتے کے آغاز میں وزیر اعظم عمران خان کے مشیر برائے صحت ڈاکٹر ظفر مرزا نے کہا تھا کہ ابھی ٹیسٹ کرنے کی استعداد تین ہزار یومیہ ہے جو اپریل کے آخر تک 25ہزار یومیہ تک ہو جائے گی۔
خیال رہے کہ کرونا وائرس کے پھیلنے کے آغاز میں صرف چند لیبارٹرز میں اس کے ٹیسٹ ہو رہے تھے تاہم اب 20 کے قریب لیبارٹرز میں ٹیسٹ ہو رہے ہیں۔ حکومت لیبارٹریز کی تعداد میں اضافے کا بھی اعلان کر چکی ہے۔
بھارت میں مودی حکومت مسلمانوں کو نشانہ بنا رہی ہے: عمران خان
پاکستان کے وزیر اعظم عمران خان نے کہا ہے کہ بھارت میں مودی حکومت کرونا وائرس سے متعلق پالیسی پر رد عمل سے بچنے کے لیے جان بوجھ کر پرتشدد انداز میں مسلمانوں کو نشانہ بنا رہی ہے۔
عمران خان نے بھارت میں حکومت کی لاک ڈاؤن کی پالیسی کی جانب اشارہ کرتے ہوئے کہا کہ اس سے ہزاروں افراد مختلف علاقوں میں پھنس گئے جب کہ لوگوں کو خوراک کی کمی کا بھی سامنا ہے۔
پاکستان کے وزیر اعظم نے بھارت حکومت کی پالیسی کو جرمنی میں نازی حکومت کی یہودیوں کے ساتھ روا رکھے گئے سلوک سے تشبیہ دی۔
عمران خان کا کہنا تھا کہ اب یہ اور واضح ہو گیا ہے کہ بھارت میں نریندر مودی کی حکومت ہندوؤں کی بالادستی کی سوچ کی حامل ہے۔
خیال رہے کہ بھارت میں ذرائع ابلاغ اور سوشل میڈیا پر مسلمانوں کے مختلف طبقات پر وبا کے پھیلنے کی وجہ ہونے کا الزامات سامنے آئے تھے۔
بھارت میں اب 521 افراد وبا سے ہلاک ہو چکے ہیں جب کہ 16ہزار سے زائد افراد میں وبا کی تصدیق ہوئی ہے۔