'کرونا افغان جیلوں تک پہنچ گیا تو امن معاہدہ خطرے میں پڑ سکتا ہے'
افغان حکام نے خدشہ ظاہر کیا ہے کہ اگر کرونا وائرس کی وبا افغانستان کی جیلوں تک پہنچ گئی تو امریکہ کی قیام امن کی کوششوں کو دھچکا لگ سکتا ہے۔
واضح رہے کہ افغانستان کی جیلوں میں ہزاروں طالبان قیدی موجود ہیں جنہیں امریکہ اور طالبان کے درمیان طے پانے والے معاہدے کے تحت رہا کیا جانا ہے۔ لیکن افغان حکام کو خدشہ ہے کہ جیلوں میں کرونا وائرس پھیلنے کی صورت میں ان قیدیوں کی رہائی تاخیر کا شکار ہوسکتی ہے جس کا لامحالہ اثر ملک میں قیامِ امن کی کوششوں پر پڑے گا۔
خبر رساں ادارے 'رائٹرز' نے پیش رفت سے آگاہ افغان حکام کے حوالے سے بتایا ہے کہ اگر کرونا وائرس افغانستان کی جیلوں تک پھیل گیا، تو کئی قیدی مر سکتے ہیں اور اگر ایسا ہوا تو ایک انسانی المیہ بھی جنم لے سکتا ہے۔
رائٹرز' کے مطابق ذرائع یہ بھی خدشہ ظاہر کر رہے ہیں کہ جیلوں میں وائرس پھیلنے کی صورت میں افغان حکومت اور طالبان کے درمیان قیدیوں کے تبادلے کا معاملہ بھی مزید پیچیدہ ہو سکتا ہے جس کے بعد بین الافغان مذاکرات بھی خطرے میں پڑ سکتے ہیں۔
عمران خان کرونا ٹیسٹ کرانے پر رضامند
وزیر اعظم عمران خان کے فوکل پرسن برائے کرونا وائرس ڈاکٹر فیصل سلطان نے کہا ہے کہ عمران خان نے بطور ذمہ دار وزیر اعظم اور ذمہ دار شہری ماہرین کی تجویز پر کرونا ٹیسٹ کرانے پر رضا مندی ظاہر کی ہے۔
میڈیا بریفنگ میں فیصل ایدھی کی جانب اشارہ کرتے ہوئے ڈاکٹر فیصل سلطان کا کہنا تھا کہ وزیر اعظم عمران خان کی چند دن قبل ایک صاحب سے ملاقات ہوئی تھی جن کا کرونا وائرس کا ٹیسٹ مثبت آیا ہے۔
ڈاکٹر فیصل سلطان نے یہ واضح نہیں کیا کہ عمران خان کا ٹیسٹ کب ہوگا۔
انہوں نے مزید کہا کہ پورا ملک اگر مشترکہ طور پر ہدایات پر عمل درآمد کرے تو اس وبا پر قابو پایا جاسکتا ہے۔
انہوں نے امید ظاہر کی کہ دیگر ممالک کی طرح پاکستان میں وبا سے جانی زیادہ نہ ہو۔
کوئی نہیں چاہتا مساجد ویران ہوں: وزیر اعظم عمران خان
عمران خان نے کہا ہے کہ کوئی بھی معاشرہ طویل لاک ڈاؤن کے ساتھ بھی وبا پر قابو نہیں پا سکتا۔ دیگر ممالک بھی لاک ڈاؤن کو ختم کرنے کے طریقہ کار پر غور کر رہے ہیں۔
اسلام آباد میں میڈیا سے گفتگو کرتے ہوئے ان کا کہنا تھا کہ مجھے بہت برا لگا جب دیکھا کہ لاک ڈاؤن کی خلاف ورزی کرنے والوں کو پولیس ڈنڈے مار رہی ہے۔
ان کا کہنا تھا کہ رمضان میں لوگ عبادت کرنا چاہتے ہیں۔ پاکستان ایک آزاد معاشرہ ہے۔ آزاد معاشرے میں لوگ آزاد ذہن سے فیصلے کرتے ہیں۔
ان کے بقول اگر رمضان میں مساجد میں داخلے پر پابندی عائد کی جائے اور لوگ وہاں جائیں تو کیا نمازیوں کو بھی گرفتار کیا جائے گا۔
انہوں نے کہا کہ اس حوالے سے علما کے ساتھ ملک کر ایک لائحہ عمل بنایا ہے اور فیصلہ کیا گیا کہ مساجد میں جانے کے لیے طے شدہ ہدایات نامے پر عمل کیا جائے گا۔
عمران خان کا کہنا تھا کہ اگر طے شدہ ہدایات نامے پر عمل نہ ہوا اور مساجد سے وبا پھیلی تو علما کے ساتھ طے شدہ 20 نکاتی ہدایت نامے میں یہ شامل ہے کہ حکومت کارروائی کرے گی اور مساجد کو بند کرنے کا بھی فیصلہ کیا جا سکتا ہے۔
وزیر اعظم کا کہنا تھا کہ کوئی نہیں چاہتا مساجد ویران ہوں۔
امریکہ: طبی عملے کے لیے کنسرٹ میں مشہور گلوکاروں کی گھروں سے پرفارمنس
امریکہ میں کرونا وائرس کے خلاف جاری جنگ میں فرنٹ لائن ورکز اور طبی عملے کی حوصلہ افزائی کے لیے 'ریموٹ کنسرٹ' کا اہتمام کیا گیا۔ جس میں ٹیلر سوفٹ، لیڈی گاگا، رولنگ اسٹونز، سمیت دیگر گلوکاروں نے اپنے گھروں سے فن کا مظاہرہ کیا۔
خبر رساں ادارے 'رائٹرز' کے مطابق 'ون ورلڈ ٹو گیدر ایٹ ہوم' کے نام سے کنسرٹ امریکہ کے 26 ٹی وی نیٹ ورکس پر بیک وقت نشر کیا گیا۔ جسے لگ بھگ دو کروڑ دس لاکھ امریکیوں نے دیکھا۔
امریکہ میں کرونا وائرس کے مریضوں کا علاج کرنے والے ڈاکٹرز اور طبی عملے کو خراج تحسین پیش کرنے کا سلسلہ جاری ہے۔ اس ضمن میں ہونے والے کنسرٹ میں مذکورہ گلوکاروں نے لائیو اسٹریمنگ کے ذریعے اپنے گھروں سے کنسرٹ میں حصہ لیا۔