اسپین میں مئی کے تیسرے ہفتے میں پابندیوں میں نرمی کا امکان
اسپین کے وزیر اعظم پیڈرو سنچیز نے عندیہ دیا ہے کہ وہ ملک میں لاک ڈاؤن کی پابندیاں مئی کے تیسرے ہفتے میں اٹھانے کا ارادہ رکھتے ہیں۔
پارلیمان میں خطاب کرتے ہوئے پیڈرو سنچیز نے لاک ڈاؤن کی پابندیوں میں توسیع کی منظوری کی درخواست کرتے ہوئے کہا کہ جب یہ پابندیاں اٹھانے کا فیصلہ کیا جائے گا تو انہیں مرحلہ وار طریقے سے اٹھایا جا سکے گا۔
طبی ماہرین نے خبردار کیا تھا کہ کاروبار اور عوامی زندگی پر عائد پابندیاں فوری طور پر اٹھانے کی بجائے انہیں مرحلہ وار طریقے سے اٹھانا ضروری ہو گا کیوں کہ فوری طور پر پابندیاں ختم کرنے سے کرونا وائرس کی وبا دوبارہ زور پکڑ سکتی ہے۔
اسپین ان ممالک میں شامل ہے جو کرونا وائرس سے سب سے زیادہ متاثر ہوئے۔
ملک میں کرونا وائرس کے تصدیق شدہ کیسز کی تعداد دو لاکھ آٹھ ہزار ہے جب کہ اس وبا سے کم سے کم 21 ہزار سے زائد ہلاکتیں ہو چکی ہیں۔
آسٹریلین کرکٹ بورڈ کے عملے کو سپر مارکیٹ میں کام کرنے کا مشورہ
آسٹریلیا کے کرکٹ بورڈ نے اپنے عملے کو کرونا وائرس شٹ ڈاؤن کے دوران سپر مارکیٹس میں کام کرنے کا مشورہ دیا ہے۔
بورڈ کے چیف ایگزیکٹو کیون رابرٹس کا کہنا ہے کہ انہوں نے سپر مارکیٹ کی سب سے بڑی چین 'ولورتھس' سے درخواست کی ہے کہ بورڈ ملازمین کو عارضی ملازمتیں دی جائیں۔
آسٹریلوی کرکٹ بورڈ کے حکام کا کہنا ہے کہ کرونا وائرس کے باعث 80 فی صد عملہ 20 فی صد تنخواہ پر کام کر رہا ہے۔ لہٰذا وہ چاہتے ہیں کہ اُنہیں متبادل روزگار ملے۔
افغانستان کے 14صوبوں میں وائرس کے 51 نئے کیسز
افغانستان کی وزارت صحت نے 14 صوبوں میں وبا کے 51 نئے کیسز سامنے آنے کی تصدیق کی ہے ۔
وزارت صحت کے مطابق افغانستان میں کرونا وائرس کے مریضوں کی کل تعداد 1176 ہو گئی ہے۔
افغان وزارت صحت کے ترجمان ڈاکٹر وحید اللہ مائر نے بتایا کہ اب تک 40 اموات ہو چکی ہیں جب کہ صحت یاب ہونے والوں کی تعداد 166 ہے۔
پارلیمنٹ ہاؤس: تین ملازمین کا ٹیسٹ مثبت، بیشتر کو آنے سے روک دیا گیا ہے
دنیا کے کئی ممالک میں کرونا وائرس سے نمٹنے کے لیے قانون سازی کی جا رہی ہے لیکن پاکستان کی پارلیمنٹ میں اس حوالے سے تاحال کوئی سرگرمی سامنے نہیں آئی۔
پاکستان کے ایوان بالا (سینیٹ) اور ایوان زیریں (قومی اسمبلی) کے ارکان کی مجموعی تعداد 446 ارکان ہے۔ تاہم کسی بھی رکن کی جانب سے قانون سازی کا کوئی بل سامنے نہیں آیا البتہ حزب اختلاف کی جماعت مسلم لیگ (ن) نے قومی اسمبلی کا اجلاس بلانے کے لیے ریکوزیشن جمع کرائی ہے۔
قانون کے مطابق قومی اسمبلی اور سینیٹ کو ایک سال میں 130 دن کا سیشن مکمل کرنا ہوتا ہے۔ سینیٹ کا 12 مارچ کے بعد سے اب تک کوئی اجلاس نہیں ہوا۔ قومی اسمبلی کے بھی ابھی صرف 100 دن مکمل ہوئے ہیں اور جولائی تک انہیں بھی 130 دن مکمل کرنے ہیں۔
اس بارے میں سینئر صحافی اور پارلیمانی رپورٹرز ایسویسی ایشن کے سابق صدر صدیق ساجد کہتے ہیں کہ اس وقت ارکان پارلیمنٹ، اسپیکر قومی اسمبلی اور چیئرمین سینیٹ خود خوف کا شکار ہیں۔
ان کے بقول حکومت کی طرف سے اعلان نہیں کیا گیا لیکن یہ حقیقت ہے کہ پارلیمنٹ ہاؤس کے اندر کام کرنے والے تین ملازمین کا کرونا ٹیسٹ مثبت آیا تھا جس کے بعد بیشتر ملازمین کو پارلیمنٹ آنے سے روک دیا گیا ہے۔