جرمنی میں ایک لاکھ شہری کرونا سے صحت یاب
دنیا بھر میں کرونا وائرس کے مریضوں کی تعداد 27 لاکھ اور اموات ایک لاکھ 90 ہزار تک پہنچ گئی ہیں۔ ترکی ایک لاکھ کیسز والا ساتواں ملک بن گیا ہے جبکہ جرمنی ایک لاکھ صحت یاب شہریوں والا اولین ملک ہے۔
جانز ہاپکنز یونیورسٹی اور ورڈومیٹرز کے مطابق، 24 گھنٹوں کے دوران برطانیہ میں 638، فرانس میں 516، اٹلی میں 464، اسپین میں 440، برازیل میں 407، بیلجیم میں 228، کینیڈا میں 167، نیدرلینڈز میں 123، ترکی میں 115 اور میکسیکو میں 113 افراد ہلاک ہوگئے۔ ایران میں یہ تعداد 90، جرمنی میں 89 اور سویڈن میں 84 تھی۔
اب تک 15 ملکوں میں کرونا وائرس سے ایک ہزار یا زیادہ اموات ہو چکی ہیں۔ اٹلی میں کل تعداد 25549، اسپین میں 22157، فرانس میں 21856، برطانیہ میں 18738، بیلجیم میں 6490، ایران میں 5481، جرمنی میں 5404، چین میں 4632 اور نیدرلینڈز میں 4177 ہے۔ برازیل میں 3313، ترکی میں 2491، کینیڈا میں 2141، سویڈن میں 2021 اور سوئزرلینڈ میں 1549 افراد ہلاک ہو چکے ہیں۔
امریکہ میں جمعرات کی سہہ پہر تک 27 ہزار نئے کیسز سامنے آئے تھے اور دو ہزار افراد کا انتقال ہوا تھا۔ ملک میں 45 لاکھ ٹیسٹ کیے جاچکے ہیں، 8 لاکھ 75 ہزار مریضوں کی تصدیق ہوئی ہے اور ان میں سے ساڑھے 49 ہزار چل بسے ہیں۔
امریکہ کی 9 ریاستوں میں وبا سے ایک ہزار سے زیادہ ہلاکتیں شمار کی جا چکی ہیں۔ نیویارک میں 20861، نیوجرسی میں 5368، مشی گن میں 2977، میساچوسیٹس میں 2360، پینسلوانیا میں 1713، الی نوئے میں 1688، کنیٹی کٹ میں 1639، لوزیانا میں 1599 اور کیلی فورنیا میں 1512 مریض دم توڑ گئے ہیں۔ فلوریڈا میں یہ تعداد 960 ہے۔
امریکہ کی تین ریاستیں ایسی بھی ہیں جہاں 10 سے کم اموات ہوئی ہیں۔ الاسکا اور جنوبی ڈکوٹا میں نو نو اور وایومنگ میں چھ افراد ہلاک ہوئے ہیں۔
امریکہ کے بعد کرونا وائرس کے مریضوں کی سب سے بڑی تعداد اسپین میں ہے۔ وہاں 2 لاکھ 13 ہزار کیسز سامنے آچکے ہیں۔ اٹلی میں ایک لاکھ 89 ہزار، فرانس میں ایک لاکھ 58 ہزار، جرمنی میں ایک لاکھ 51 ہزار، برطانیہ میں ایک لاکھ 31 ہزار اور ترکی میں ایک لاکھ ایک ہزار مریضوں کی تصدیق ہوچکی ہے۔ مزید 25 ملکوں میں 10 ہزار یا زیادہ کیسز ہیں جن میں اب بھارت اور پاکستان بھی شامل ہیں۔
وائرس کو کنٹرول کرنے کے لیے ہر ملک اپنے زیادہ سے زیادہ شہریوں کے ٹیسٹ کرنے کی کوشش کر رہا ہے۔ روس میں اب تک 24 لاکھ، جرمنی میں 20 لاکھ 72 ہزار، اٹلی میں 15 لاکھ 79 ہزار، اسپین میں 9 لاکھ 30 ہزار، ترکی میں 7 لاکھ 91 ہزار، متحدہ عرب امارات میں 7 لاکھ 90 ہزار، کینیڈا میں 6 لاکھ 20 ہزار، برطانیہ میں 5 لاکھ 83 ہزار، جنوبی کوریا میں 5 لاکھ 85 ہزار اور بھارت میں پورے 5 لاکھ ٹیسٹ ہو چکے ہیں۔
جمعرات تک کرونا وائرس کے 7 لاکھ 40 ہزار مریض صحت یاب ہو چکے تھے۔ ان میں جرمنی کے ایک لاکھ 3 ہزار، اسپین کے 89 ہزار، امریکہ کے 84 ہزار، چین کے 77 ہزار، ایران کے 64 ہزار، اٹلی کے 57 ہزار، فرانس کے 42 ہزار اور برازیل کے 25 ہزار شہری شامل تھے۔
یورپ میں 57 ہزار سے زیادہ اموات نرسنگ ہومز میں ہوئیں، عالمی ادارہ صحت
عالمی ادارہ صحت نے انکشاف کیا ہے کہ یورپ میں کرونا وائرس سے نصف اموات نرسنگ ہومز اور ان جیسے طویل مدت تک دیکھ بھال کرنے والے مراکز میں ہو رہی ہیں۔ اس کی سنگینی یہ جان کر بڑھ جاتی ہے کہ اس وبا سے یورپ میں اب تک ایک لاکھ 14 ہزار افراد ہلاک ہو چکے ہیں۔
اس بیان کا مقصد صحت عامہ کے ماہرین کی توجہ وائرس کے آسان شکار بزرگوں اور پہلے سے بیمار افراد کی طرف دلانا ہے۔ اب تک حکومتوں اور ماہرین صحت کی تمام تر توجہ اسپتالوں کی طرف رہی ہے۔ اکثر اموات کے اعداد و شمار صرف اسپتالوں میں مرنے والوں کی تعداد پر مشتمل ہوتے ہیں۔
یورپ میں ڈبلیو ایچ او کے سربراہ ہانز کلوگ نے جمعرات کو صحافیوں سے گفتگو کرتے ہوئے کہا کہ معمر افراد کے مراکز کی انتہائی پریشان کن تصویر سامنے آ رہی ہے۔ یورپی ملکوں کے اپنے اندازوں کے مطابق، نصف اموات نرسنگ ہومز جیسے مقامات پر ہورہی ہیں۔ یہ ناقابل تصور انسانی المیہ ہے۔
ہانز کلوگ کا انتباہ یورپ سے متعلق ہے، لیکن امریکہ میں بھی معمر افراد کے مراکز کی صورتحال کچھ ایسی ہی ہے۔ واشنگٹن پوسٹ نے کہا ہے کہ اس کے محتاط اندازے کے مطابق، امریکہ کے ہر دس میں سے ایک مرکز نے کرونا وائرس کا کیس رپورٹ کیا ہے اور ان میں ہلاکتوں کی مجموعی تعداد ہزاروں تک پہنچتی ہے۔ نیویارک ٹائمز کے مطابق۔ یہ تعداد کم از کم سات ہزار ہے۔
ریاست نیویارک میں کرونا وائرس سے ایک چوتھائی اموات نرسنگ ہومز ہی میں ہوئی ہیں۔ ان مراکز کو ریفریجریٹر ٹرکس منگوانے پڑے جہاں ہلاک ہونے والوں کی لاشیں رکھنا پڑیں، کیونکہ مردہ خانوں یا فیونرل ہومز میں جگہ نہیں تھی۔
ریاست نیوجرسی نے پیر کو 425 نرسنگ ہومز کی فہرست جاری تھی جن میں کرونا وائرس کے کیسز کی تصدیق ہو چکی ہے۔ انتظامیہ کے مطابق ریاست میں ہوئی 4377 اموات میں سے 1779 ان مراکز میں ہوئیں۔
ان میں سے ایک مرکز انڈوور میں ہے جہاں 70 افراد ہلاک ہوچکے ہیں اور سوا چار سو رہائشی یا عملے کے ارکان بیمار پڑے ہیں۔ ایک ہفتہ پہلے نامعلوم شخص کی مخبری پر پولیس نے وہاں چھاپا مارا تو ایک کمرے سے 17 لاشیں ملیں جنھیں باڈی بیگز میں بند کرکے وہاں رکھا گیا تھا۔
اس سے پہلے ورجینیا کے شہر رچمنڈ سے خبر ملی تھی کہ اس کے ایک کینٹربری نرسنگ ہوم کے 160 میں سے 45 رہائشی کرونا وائرس کا شکار ہو کر چل بسے۔ امریکہ میں کرونا وائرس ریاست واشنگٹن سے پھیلنا شروع ہوا تھا اور کرک لینڈ کا 'لائف کئیر نرسنگ ہوم' اس کا پہلا نشانہ تھا۔ وہاں 43 اموات ہوچکی تھیں۔
یورپ اور امریکہ کے نرسنگ ہومز نے ان مراکز میں مقیم افراد کو کرونا وائرس سے بچانے کے لیے رشتے داروں کا داخلہ بند کیا ہوا ہے۔ لیکن، اس کا نتیجہ یہ برآمد ہو رہا ہے کہ وہ تنہائی میں انتقال کر رہے ہیں۔
'کرونا وائرس سے انسانی حقوق کے بحران کا خدشہ بڑھ رہا ہے'
اقوامِ متحدہ کے سیکریٹری جنرل انتونیو گوتریس نے کہا ہے کہ کرونا وائرس کی وبا تیزی کے ساتھ انسانی حقوق کے بحران کی طرف بڑھ رہی ہے۔
اپنے ایک بیان میں اُنہوں نے دنیا بھر کی حکومتوں سے کہا ہے کہ وہ اس بات کو یقینی بنائیں کے صحت کی سہولتیں بلا تفریق ہر شہری تک پہنچیں۔
سیکریٹری جنرل کا کہنا تھا کہ اس بات کو یقینی بنایا جائے کہ امداد سب سے زیادہ متاثر ہونے والے افراد تک پہنچے۔ اور ہر شخص کو بلا امتیاز خوراک، پانی اور پناہ تک رسائی حاصل ہو۔
سیکریٹری جنرل گوتریس نے کہا کہ یہ وائرس لوگوں میں فرق نہیں کرتا اور سب لوگ اس سے متاثر ہو سکتے ہیں۔ انہوں نے کہا کہ عوامی خدمات کی ترسیل میں بڑی کمزوریاں پائی جا رہی ہیں اور یہ خدمات سب سے زیادہ ضرورت مند افراد تک پہنچانا اشد ضروری ہے۔