وائرس سے نمٹنے کے دوران انسانی حقوق کا خیال رکھنے پر زور
انسانی حقوق سے متعلق اقوام متحدہ کی ہائی کمشنر مشیل بیچلٹ نے دنیا بھر کی حکومتوں سے کہا ہے کہ وہ کرونا وائرس کی وبا سے نمٹنے ہوئے انسانی حقوق کا خاص خیال رکھیں۔
انہوں نے ایک بیان میں کہا کہ اس وبا کے حوالے سے غیر معمولی ہنگامی صورت کی آڑ میں انسانی حقوق کی پامالی ہرگز نہیں ہونی چاہیے۔
ہائی کمشنر کا مزید کہنا تھا کہ غیر معمولی اختیارات کا استعمال کرونا وائرس سے مؤثر طور پر نمٹنے تک محدود رہنا چاہیے اور اس سے ماورا اس کا کوئی استعمال نہیں ہونا چاہیے۔
انہوں نے کہا کہ ان اختیارات کو مخالفین کو کچلنے، آبادیوں کو کنٹرول کرنے یا اپنے اقتدار کو طوالت بخشنے کے لیے استعمال نہیں کیا جانا چاہیے۔
مشیل بیچلٹ کا مزید کہنا تھا کہ مختلف ممالک سے پولیس اور قانون نافذ کرنے والی دیگر فورسز کی طرف سے لاک ڈاؤن، کرفیو اور دیگر پابندیوں پر عمل درآمد کرانے کے لیے سختی اور طاقت کے بے دریغ استعمال کی خبریں موصول ہوئی ہیں۔
انہوں نے کہا کہ صحت عامہ کی یہ ہنگامی صورت حال انسانی حقوق کی پامالی کی صورت اختیار کر سکتی ہے جس کے اثرات کرونا وائرس سے بھی زیادہ مدت تک جاری رہ سکتے ہیں۔
ہائی کمشنر کا کہنا تھا کہ انتہائی ضرورت کے تحت خوراک کے حصول کے لیے باہر نکلنے پر مجبور لوگوں پر گولی چلانا، انہیں حراست میں رکھنا اور ان کے ساتھ زیادتی کرنا ناقابل قبول ہے۔
نیوزی لینڈ میں اسکول کھل گئے، کاروبار کی اجازت
نیوزی لینڈ نے لاک ڈاؤن میں نرمی کرتے ہوئے اسکولوں اور کاروبار کھولنے کی اجازت دے دی ہے۔
وزیر اعظم جیسنڈا آرڈرن کا کہنا ہے کہ حکومت نئے کیسز کی شناخت کا عمل جاری رکھے گی۔
نیوزی لینڈ میں اب تک کرنا وائرس کے 1100 کیسز کی نشاندہی ہوئی ہے جب کہ وبا سے 19 افراد کی موت ہوئی۔
وزیر اعظم جیسنڈا آرڈرن نے کہا کہ نیوزی لینڈ میں کرونا وائرس کے وسیع پیمانے پر پھیلنے کے شواہد نہیں ملے۔ نیوزی لینڈ نے کرونا وائرس کے خلاف جنگ جیت لی ہے۔
پابندیوں میں نرمی سے چار لاکھ کے قریب افراد اپنے کام پر واپس آ گئے ہیں۔ نیوزی لینڈ میں مکمل لاک ڈاؤن چار ہفتے تک جاری رہا۔
نیوزی لینڈ کے ہمسایہ ملک آسٹریلیا میں موبائل فون کی ایک خاص ایپ متعارف کرائی گئی ہے۔ موبائل ایپ سے ریاستی حکومتوں اور طبے عملے کو کرونا وائرس کے ٹیسٹ مثبت آنے والوں کے رابطے میں رہنے والے لوگوں کی نشاندہی میں مدد ملے گی۔
اس نشاندہی سے حکام فیصلہ کر پائیں گے کہ کن افراد کو از خود قرنطینہ میں جانا ہو گا اور کن کا ٹیسٹ کرنا ضروری ہو گا۔
آسٹریلیا کے وزیر صحت گریگ ہنٹ نے بتایا کہ 20 لاکھ کے آسٹریلوی شہری یہ ایپ ڈاؤن لوڈ کر چکے ہیں۔
وبا کی روزانہ کی بنیاد پر ظاہر ہونے والی علامات
سر درد، گلے میں سوزش، حسائیات کا ختم ہونا بھی وبا کی ممکنہ علامات
صحت کے ماہرین نے کرونا وائرس کی مزید ممکنہ علامات بتا دی ہیں تاہم اب بھی ان علامات کو حتمی قرار نہیں دیا گیا۔
امریکہ کے صحت کے ماہرین کا کہنا ہے کہ زیادہ سردی لگنا، سردی کے باعث بار بار کپکپاہٹ طاری ہونا، جوڑوں اور پٹھوں میں درد، گلے میں سوزش، سر درد سمیت سونگنے اور چکھنے کی حسائیات کا ختم ہو جانا بھی کرونا وائرس کی علامات ہو سکتی ہیں۔
قابل ازیں امریکہ کے سینٹر فار ڈیزیز کنٹرول اینڈ پریوینٹیشن نے کہا تھا کہ بخار، سانس لینے میں تکلیف اور کھانسی ممکنہ طور پر کرونا وائرس کی علامات ہو سکتی ہیں۔