تین اعلیٰ امریکی عہدیدار وائرس کے خدشے کے پیش نظر قرنطینہ میں چلے گئے
امریکہ میں تین انتہائی اعلیٰ عہدیدار کرونا وائرس کے خدشے کے پیش نظر خود قرنطینہ میں چلے گئے ہیں۔
خبر رساں ادارے 'رائٹرز' کے مطابق وائٹ ہاؤس کی کرونا رسپانس ٹیم کے اہم رکن ڈاکٹر انتھونی فاؤچی، سینٹر فار ڈیزیز کنٹرول اینڈ پریونٹیشن (سی ڈی سی) کے ڈائریکٹر رابرٹ ریڈفیلڈ اور فوڈ اینڈ ڈرگ ایڈمنسٹریشن کے کمشنر اسٹیفن ہان اس لیے قرنطینہ میں گئے ہیں کیوں کہ ان کا عملے کے ان ارکان سے سامنا ہوا تھا جن میں وائرس کی تصدیق ہوئی ہے۔
نیشنل انسٹی ٹیوٹ آف الرجی اینڈ انفیکشن ڈیزیز کے مطابق ڈاکٹر انتھونی فاؤچی کو وائرس پائے جانے کے کم درجے پر رکھا گیا ہے۔
ڈاکٹر انتھونی فاؤچی کی عمر 79 سال ہے۔ ان کے حوالے سے انسٹیٹیوٹ کے جاری کردہ اعلامیے کے مطابق نیشنل انسٹی ٹیوٹ آف الرجی اینڈ انفیکشن ڈیزیزکے ڈائریکٹر کا کرونا وائرس کا ٹیسٹ منفی آیا ہے۔
مدرز ڈے پر پھولوں کا بازار کھول دیا گیا
امریکہ میں سب سے زیادہ پھول ماؤں کے عالمی دن پر فروخت ہوتے ہیں۔ اس لیے مدرز ڈے پر پھولوں کا بازار کھول دیا گیا۔ لاس اینجلس کے پھولوں کے بازار میں خریداروں کا رش نظر آیا۔ حکام نے صرف ہول سیل مارکیٹ کھولنے کی اجازت دی تاہم عام اسٹورز کو پک اپ یا ڈلیوری کرنےکی اجازت مل سکی۔
'اسمارٹ لاک ڈاؤن نے کام کرنا شروع کر دیا ہے'
پاکستان کے وفاقی وزیر برائے منصوبہ بندی و ترقی اسد عمر نے کہا ہے کہ اسمارٹ لاک ڈاؤن نے کام کرنا شروع کر دیا ہے۔ ایسے نظام کی ضرورت ہے کہ معیشت کا پہیہ بھی چلتا ہے جب کہ لوگوں کو وبا سے تحفظ بھی حاصل ہو۔
اسلام آباد میں میڈیا سے گفتگو میں اسد عمر کا کہنا تھا کہ پورے ملک کو بند کرنے کے بجائے وبا سے متاثرہ مخصوص علاقے بند کیے جائیں گے۔
ان کا مزید کہنا تھا کہ دنیا کے اکثر ممالک اسی جانب جا رہی کہ لوگوں سے زیادہ عرصے تک ان کا روز گار نہیں چھینا جا سکتا۔
اسد عمر نے کہا کہ زمینی سطح پر اقدامات پر عمل در آمد کروانا صوبوں کا کام ہے۔
وبا پر کنٹرول کے حوالے سے اقدامات کا ذکر کرتے ہوئے انہوں نے کہا کہ پاکستان میں 70 لیبارٹرز میں کرونا وائرس کے ٹیسٹ ہو رہے ہیں۔ ان لیبارٹرز کی استعداد میں اضافہ کیا گیا ہے۔
- By ضیاء الرحمن
پنجاب میں گھروں میں قرنطینہ کی اجازت، ٹیسٹ لازمی قرار
پاکستان کے صوبے پنجاب کی حکومت نے کرونا کے مریضوں کو گھروں میں رہنے کی اجازت دے دی ہے جب کہ مریضوں پر ٹیسٹ کرانا لازمی قرار دیا گیا ہے۔
حکومت پنجاب نے ہوم آئیسولیشن کے لیے قواعد و ضوابط جاری کر دیے ہیں۔ گھر میں قرنطینہ کے لیے خصوصی ہوم آئیسولیشن کمیٹیاں بنیں گی۔ جس مریض میں کرونا کی ہلکی علامات ہوں گی وہی گھر میں قرنطینہ کا اہل ہوگا۔
محکمہ پرائمری اینڈ سیکنڈری صحت نے ایس او پیز کا نوٹیفکیشن جاری کر دیا ہے۔ جس کے مطابق ہوم قرنطینہ کے لیے بننے والی خصوصی ہوم آئیسولیشن کمیٹی کے اراکین کو متعلقہ ضلع کا ڈپٹی کمشنر نامزد کرے گا۔ کمیٹی ہوم آئیسولیشن کے لیے گھروں کے سائز اور اہل خانہ کی تعداد کی جانچ کے بعد اجازت دے گی۔
اعلامیے کے مطابق کرونا وائرس کے باعث اگر مریض کی حالت خراب ہو تو اسے گھر میں قرنطینہ کی اجازت نہیں ہوگی۔ اجازت سے پہلے کرونا مریض اور دیگر اہل خانہ کی تعلیم، کرونا کے بارے میں آگاہی، ہوم آئیسولیشن کی بنیادی ضروریات کے بارے میں علم کو بھی پرکھا جائے گا۔
نوٹیفکیشن میں کہا گیا ہے کہ کرونا کے مریض کو ہوم آئیسولیشن کے دوران ہر 10 دن بعد اپنا ٹیسٹ کرانا ہوگا۔ دو بار ٹیسٹ رپورٹ منفی آنے پر مریض ہوم آئیسولیشن ختم کر سکے گا۔ ہوم آئیسولیشن کے دوران اگر دوسری بار بھی کورونا ٹیسٹ مثبت آئے تو دوبارہ ٹیسٹ اگلے پانچ دن بعد کرانا ہوگا۔
اِس سے قبل حکومتِ پنجاب کی جانب سے جاری کردہ نوٹیفکیشن میں کہا گیا تھا کہ پنجاب میں لاک ڈاؤن میں 31 مئی 2020 تک توسیع کردی گئی ہے۔ جزوی لاک ڈاؤن کے تحت ہفتے میں چار پیر، منگل، بدھ اور جمعرات کے روز کاروبار کھلیں گے جب کہ جمعہ، ہفتہ اور اتوار کو بند رہیں گے۔