بھارت میں کیسز کی تعداد 74 ہزار سے متجاوز
بھارت میں کرونا وائرس سے ہلاکتوں اور نئے کیسز کی تعداد میں مسلسل اضافہ ہو رہا ہے۔
بھارت کے سرکاری اعداد و شمار کے مطابق گزشتہ 24 گھنٹے کے دوران کرونا وائرس کا شکار مزید 122 افراد دم توڑ گئے ہیں جب کہ ملک بھر سے 3525 نئے کیسز سامنے آنے کے بعد متاثرہ افراد کی تعداد 74 ہزار 281 تک پہنچ گئی ہے۔
بھارت میں اب تک کرونا وائرس سے 2415 افراد ہلاک اور 24 ہزار 386 صحت یاب ہو چکے ہیں۔
بھارتی ریاست مہاراشٹرا سب سے زیادہ متاثر ہے جہاں اب تک 921 افراد ہلاک اور 24 ہزار سے زیادہ کیسز رپورٹ ہو چکے ہیں۔ گجرات میں 573 ہلاکتیں اور 8903 افراد میں وائرس کی تشخیص ہوئی ہے۔
نریندر مودی کے 20 لاکھ کروڑ کے معاشی پیکج کے اعلان پر تنقید
بھارت میں حزبِ اختلاف کی جماعت کانگریس نے وزیرِ اعظم نریندر مودی کے کرونا وائرس سے نمٹنے کے لیے اعلان کردہ 20 لاکھ کروڑ (لگ بھگ 270 ارب ڈالر) کے معاشی پیکج کو ہدفِ تنقید بنایا ہے۔
کانگریس رہنما چدم برم نے کہا ہے کہ وزیرِ اعظم کا معاشی پیکج صرف اخبارات کی سرخی ہے جس کے نیچے پورا صفحہ خالی ہے۔ دیکھنا ہے کہ وزیرِ خزانہ نرملا سیتارمن اس خالی صفحے کو کس طرح بھرتی ہیں۔
نریندری مودی نے منگل کو قوم سے خطاب کے دوران معاشی پیکج کے اعلان سمیت لاک ڈاؤن کو 4 اعشاریہ صفر کرنے کا بھی اعلان کیا تھا۔ لاک ڈاؤن کو یہ عنوان دینے کی وزیرِ اعظم کی طرف سے وضاحت سامنے نہیں آئی ہے۔
گورنر سندھ عمران اسماعیل کا کرونا ٹیسٹ منفی
گورنر سندھ عمران اسماعیل کا دوسرا کرونا وائرس ٹیسٹ منفی آ گیا ہے۔ اس بات کا ذکر انہوں نے اپنے ایک ٹوئٹ میں کیا ہے۔
عمران اسماعیل نے کرونا وائرس ٹیسٹ منفی آنے پر ان سب کا شکریہ ادا کیا جنہوں نے ان کی صحت یابی کے لیے دعائیں کی تھیں۔
اسپین کی طویل العمر خاتون نے کرونا کو شکست دے دی
اسپین کی 113 سالہ عمر رسیدہ خاتون ماریہ برنیاس نے کرونا وائرس کو مات دے دی ہے۔ وہ اسپین کی سب سے بزرگ خاتون شمار ہوتی ہیں اور ریٹائرڈ افراد کے لیے قائم ایک اولڈ ہاؤس میں رہتی ہیں۔
فرانسیسی خبر رساں ادارے 'اے ایف پی' کے مطابق ماریہ برنیاس امریکہ میں پیدا ہوئی تھیں لیکن پچھلے 20 برسوں سے وہ اسپین کے مشرقی شہر اولوٹ کے سانتا ماریہ ڈیل ٹیورا کیئر ہوم میں رہائش پذیر ہیں۔
ماریہ گزشتہ ماہ کرونا وائرس کا شکار ہو گئی تھیں۔ ان کے ساتھ کیئر ہوم میں رہائش پذیر کئی افراد کرونا وائرس کے سبب ہلاک ہو چکے ہیں۔
کرونا سے متاثر ہونے کے بعد ماریہ سب سے الگ تھلگ ایک کمرے میں رہنے لگی تھیں اور بلاخر اس مرض سے جنگ میں انہوں نے کامیابی حاصل کر لی ہے۔