پاکستان اور ایران کی سرحد کھول دی گئی
پاکستان اور ایران کی سرحد پر تفتان بازار کے قریب باب دوستی بدھ کو دوبارہ کھول دیاگیا ہے۔
یہ گیٹ 22 فروری کو ایران میں کرونا وائرس سے تیزی سے پھیلنے کی خبریں سامنے آنے کے بعد بند کر دیا گیا تھا۔
تحصیل دار تفتان ظہور بلوچ کے بقول گیٹ کھولنے کے بعد ایران میں موجود درجنوں ٹرک پاکستان میں داخل ہونا شروع ہو گئے ہیں۔ جس سے دونوں ممالک کے درمیان ایک بار پھر تجارت شروع ہو گئی ہے۔
ظہور بلوچ نے مزید بتایا کہ تفتان میں ایران سے آنے والے زائرین کے لیے قائم کیا گیا قرنطینہ سینٹر اب بھی فعال ہے۔ وہاں اب بھی ایران سے آنے والے زائرین اور تاجروں کو 14 دن کے لیے رکھا جاتا ہے جب کہ ایران سے آنے والے لوگوں کا ٹیسٹ بھی یہیں پر کیا جاتا ہے۔
کوئٹہ میں 37 صحافی کرونا وائرس سے متاثر
بلوچستان کے دارالحکومت کوئٹہ کے مزید صحافی کرونا وائرس سے متاثر ہوئے ہیں۔ جس کے بعد متاثرہ صحافیوں کی تعداد بڑھ کر 37 ہو گئی ہے۔
بلوچستان یونین آف جر نلسٹس (بی یو جے) کے جنرل سیکریٹری رشید بلوچ نے وائس آف امریکہ کو بتایا کہ 37 صحافیوں کے علاوہ میڈیا سے وابستہ اور لوگ بھی متاثر ہوئے ہیں جو کسی چینل میں ڈرائیور ہیں یا ٹیکنیکل کام کرتے ہیں۔
انہوں نے کہا کہ بلوچستان کی حکومت نے صحافیوں کو 110 کیٹس فراہم کی تھیں۔ جس کے بعد ایک میڈیکل ٹیم کوئٹہ پریس کلب بھی آئی اور 110 صحافیوں کا ٹیسٹ کیا گیا جس کے بعد 37 صحافیوں کے متاثر ہونے کی تصدیق ہوئی۔
رشید بلوچ کا کہنا تھا کہ متاثرہ صحافیوں کی تعداد میں اضافہ کے بعد بی یو جے نے فیصلہ کیا ہے کہ اب صحافی اور دیگر عملہ رش والی جگہوں اور اجتماعات کی کوریج کے لیے نہیں جائیں گے۔ اسی طرح کچھ دیگر احتیاطی تدابیر بھی اختیار کی جائیں گی۔
رشید بلوچ نے بتایا کہ قرنطینہ سینٹرز صرف کوئٹہ میں بنائے گئے ہیں اس لیے یہ وثوق سے نہیں کہا جا سکتا کہ کوئٹہ کے علاوہ دوسرے اضلاع میں کتنے صحافی کرونا سے متاثر ہوئے ہیں۔ جب ان اضلاع میں بھی ٹیسٹ کیے جائیں گے تو ہی پتہ چلے گا کہ وہاں کتنے صحافی اس سے متاثر ہیں۔
کرونا پر تبادلہ خیال کے لیے شنگھائی تعاون تنظیم کے وزرائے خارجہ کا ویڈیو لنک اجلاس
پاکستان کے وزیرِ خارجہ شاہ محمود قریشی شنگھائی تعاون تنظیم (ایس سی او) کے وزرائے خارجہ کی بدھ کو ویڈیو کانفرنس میں شرکت کریں گے۔ کانفرنس کا بنیادی محور کرونا وائرس کی عالمی وبا سے نمٹنے کے لیے تنظیم کے رکن ممالک کے ساتھ تعاون پر ہو گا۔
ایس سی او کے تمام رکن ممالک کے وزرائے خارجہ بشمول چین کی وزیر خارجہ وانگ یی، روس کے وزیر خارجہ سرگئی لاوروف، بھارت کے وزیرِ خارجہ ایس شنکر اور پاکستان کے وزیرِ خارجہ شاہ محمود قریشی بھی شرکت کریں گے۔
پاکستان کے دفترِ خارجہ کے مطابق اجلاس کا مقصد ایس سی او کے رکن ملکوں کو کرونا وائرس کے خلاف یکجہتی اور اس وبا کے خلاف متحدہ لائحہ عمل اختیار کرنے کا موقع فراہم کرنا ہے۔
ایک عرصے کے بعد پاکستان اور بھارت کے وزرائے خارجہ ایک ہی وقت میں کسی کانفرنس میں ایک ساتھ موجود ہوں گے۔
یاد رہے کہ آٹھ ممالک پر مشتمل ایس سی او میں چین، روس، بھارت، پاکستان، قازقستان، ازبکستان، تاجکستان اور کرغزستان شامل ہیں۔
اسرائیل: لاک ڈاؤن کی خلاف ورزی پر 300 سے زائد افراد گرفتار
اسرائیل کی پولیس نے کرونا وائرس کے پیشِ نظر عائد پابندیوں کی خلاف ورزی کرنے پر 320 افراد کو گرفتار کر لیا ہے۔
گرفتار ہونے والے تمام افراد 'بون فائر فیسٹیول' نامی ایک مذہبی اجتماع کے سلسلے میں جمع ہوئے تھے۔
قدامت پسند یہودیوں نے اجتماع میں شریک افراد کی گرفتاری کو مذہبی رسومات کی ادائیگی میں رکاوٹ ڈالنے کے مترادف قرار دیا ہے۔
پولیس کا کہنا ہے کہ فیسٹیول میں جمع درجنوں افراد نے ایک مقبرے کے اندر جانے کی کوشش کی تھی جو کہ کرونا وائرس کی پابندیوں کی خلاف ورزی ہے۔
حکام کا مزید کہنا ہے کہ مذہبی اجتماع کے لیے جمع ہونے والوں میں سے بعض نے پولیس افسران پر کچرا بھی پھینکا جس کے نتیجے پر گرفتاریاں عمل میں آئی ہیں۔