- By روشن مغل
پاکستان کے زیرِ انتظام کشمیر میں کرونا کے مزید 32 کیسز رپورٹ
پاکستان کے زیرِ انتظام کشمیر میں گزشتہ 24 گھنٹوں کے دوران مزید 32 افراد میں کرونا وائرس کی تصدیق ہوئی جب کہ تین مریض صحت یاب ہوئے ہیں۔
کرونا وائرس کے شبہے میں 321 نئے افراد کے ٹیسٹ کے لیے سیمپل بھی لیے گئے ہیں۔
کرونا وائرس کے نئے مریضوں میں سے 14 کا تعلق مظفر آباد، سات کا راولا کوٹ، چار کا باغ، پانچ افراد کا بھمبر سے ہے اور میر پور میں بھی دو مریض سامنے آئے ہیں۔
پاکستان کے زیرِ انتظام کشمیر میں اب تک 7934 افراد کے ٹیسٹ کیے گئے ہیں جن میں سے 7881 کے نتائج آ چکے ہیں اور 331 افراد کرونا کے مریض پائے گئے ہیں۔
پاکستانی کشمیر میں کرونا کا شکار ہونے والوں میں سے مجموعی طور پر 185 افراد صحت یاب ہو چکے ہیں جنہیں ان کے گھروں پر بھیج دیا گیا ہے۔ اس کے علاوہ آٹھ افراد کرونا سے ہلاک بھی ہوئے ہیں۔
ہلاک شدگان میں سے پانچ افراد کا تعلق مظفرآباد، ایک کا راولا کوٹ جب کہ دو افراد کا تعلق میر پور کے علاقے سے ہے۔
نیمار کے لیے 120 ڈالرز کی کرونا امدادی رقم منظور
برازیل میں کرونا وائرس کے سبب متاثر ہونے والے کم آمدنی والے افراد کے لیے مختص امدادی رقم کے لیے فٹ بالر نیمار کے نام سے دائر کردہ درخواست کی بھی منظوری دی گئی تھی۔ تاہم حکام نے تحقیقات کے بعد اُن کا نام مستحقین کی فہرست سے نکال دیا ہے۔
نیمار کا نام، تاریخ پیدائش اور برازیل کا شناختی نمبر امدادی رقم حاصل کرنے کے لیے استعمال کیا گیا تھا۔
ایک سو بیس ڈالرز کی ہنگامی امداد ان لوگوں کو فراہم کی جا رہی تھی جو لاک ڈاؤن کی وجہ سے یا تو بے روزگار ہو گئے تھے یا اُنہیں مالی مشکلات کا سامنا تھا۔
نیمار کے اسٹاف نے رابطہ کرنے پر بتایا کہ نیمار نے کبھی اس امدادی رقم کے لیے درخواست نہیں دی تھی اور وہ نہیں جانتے کہ ایسا کس نے کیا ہے۔
- By سہیل انجم
بھارت میں کرونا کیسز میں مسلسل اضافہ
بھارت میں کرونا کے مثبت کیسز کی تعداد میں مسلسل اضافہ ہو رہا ہے۔ گزشتہ 24 گھنٹوں میں اب تک رپورٹ ہونے والے سب سے زیادہ 9851 افراد میں کرونا وائرس کی تشخیص ہوئی ہے۔
سرکاری اعداد و شمار کے مطابق بھارت میں دو لاکھ 26 ہزار 770 افراد میں کرونا وائرس کی تشخیص ہو چکی ہے جب کہ اس وبا سے ہلاکتوں کی تعداد 6348 تک پہنچ گئی ہے۔
حکومت نے آٹھ جون سے تمام مذہبی عبادت گاہوں، دفاتر، ہوٹل اور ریستوران کو کھولنے کی اجازت دے دی ہے۔ اس کے لیے وزارت داخلہ نے رہنما ہدایات (ایس او پیز) جاری کی ہیں۔
حکومتی ہدایات کے مطابق کاروباری اور سرگرمیوں کے لیے سماجی فاصلے، ہینڈ سینیٹائزر اور فیس ماسک کو ضروری قرار دیا گیا ہے۔
بیانوے ہزار سے زائد پاکستانی وطن واپسی کے منتظر
پاکستان کے دفترِ خارجہ کی ترجمان عائشہ فاروقی نے کہا ہے کہ کرونا وائرس کی وجہ سے اب تک بیرونِ ملک پھنسے 51 ہزار سے زائد پاکستانی واپس آ چکے ہیں اور اب بھی مختلف ملکوں میں موجود 92 ہزار سے زائد وطن واپسی کے منتظر ہیں۔
ہفتہ وار بریفنگ کے دوران انہوں نے بتایا کہ وطن واپسی کے منتظر افراد میں زیادہ تعداد وہ ہیں جو متحدہ عرب امارات اور سعودی عرب میں مقیم ہیں۔
ترجمان کے مطابق 54 ہزار 536 پاکستانی متحدہ عرب امارات سے جب کہ 30 ہزار 572 سعودی عرب سے وطن واپسی کے خواہاں ہیں۔
انہوں نے مزید بتایا کہ حالیہ چند روز کے دوران دبئی سے دو ہزار 558، سعودی عرب سے 653، صومالیہ سے 179، مصر اور تیونس سے 51، مریطانیہ اور سیرالیون سے 118 پاکستانی شہریوں کو واپس لایا جا چکا ہے۔
عائشہ فاروقی نے کہا کہ اب تک کرونا وائرس کی وجہ سے 339 پاکستانی مختلف ممالک میں وفات پا چکے ہیں اور بیرون ملک وفات پانے والے 424 پاکستانیوں کی میتیں وطن واپس لائی گئی ہیں۔