دنیا بھر میں کیسز کی تعداد 70 لاکھ، 4 لاکھ افراد ہلاک
امریکہ کی 'جانز ہاپکنز یونیورسٹی' کے کرونا وائرس ریسرچ سینٹر کے اعداد و شمار کے مطابق دنیا بھر میں وائرس سے ہلاکتوں کی تعداد 403000 تک پہنچ گئی ہے جب کہ تصدیق شدہ کیسز کی تعداد 70 لاکھ سے تجاوز کر چکی ہے۔
امریکہ کرونا وائرس سے ہونے والی ہلاکتوں کی حوالے سے بدستور دنیا بھر میں سب سے آگے ہے جب کہ برطانیہ، برازیل اور اٹلی بالترتیب دوسرے، تیسرے اور چوتھے نمبر پر ہیں۔
کرونا وائرس کے تصدیق شدہ کیسز بھی سب سے زیادہ امریکہ میں ہیں جن کی تعداد 20 لاکھ کے قریب پہنچ گئی ہے۔ کیسز کی تعداد کے حوالے سے دوسرے نمبر پر برازیل، تیسرے نمبر پر روس اور چوتھے نمبر پر برطانیہ ہیں۔
جسٹس فائز عیسیٰ کیس کی سماعت کرنے والے ایک جج میں کرونا کی تصدیق
سپریم کورٹ کے جج جسٹس قاضی فائز عیسٰی کیس کی سماعت کرنے والے بینچ میں شامل ایک جج میں کرونا وائرس کی تصدیق ہئی ہے۔
جج میں کرونا کی تشخیص کے بعد کیس کی سماعت گیارہ جون تک کے لیے ملتوی کر دی گئی ہے۔
سپریم کورٹ کے ریڈر کے مطابق کرونا وائرس کے شکار ہونے والے جج کا 48 گھنٹوں میں دوبارہ ٹیسٹ کرایا جائے گا۔
شیخ رشید کا کرونا ٹیسٹ مثبت
پاکستان کے وزیرِ ریلوے شیخ رشید احمد کا کرونا وائرس ٹیسٹ مثبت آ گیا ہے۔
ترجمان وزارتِ ریلوے کے مطابق شیخ رشید کو بظاہر کرونا کی کوئی علامات نہیں ہیں اس کے باوجود انہوں نے خود کو آئسولیٹ کر لیا ہے۔
ترجمان کے مطابق شیخ رشید ڈاکٹروں کی ہدایت کے مطابق دو ہفتے آئسولیشن میں رہیں گے۔
- By علی فرقان
شاہد خاقان عباسی بھی کرونا وائرس کا شکار
مسلم لیگ ن کے سینئر رہنما اور سابق وزیرِ اعظم شاہد خاقان عباسی بھی کرونا وائرس کا شکار ہو گئے ہیں۔ ان کے اہلِ خانہ نے شاہد خاقان کے کرونا ٹیسٹ مثبت آنے کی تصدیق کی ہے۔
شاہد خاقان عباسی نے اتوار کو کرونا ٹیسٹ کرایا تھا جس کی رپورٹ مثبت آنے کے بعد انہوں نے خود کو اپنی رہائش گاہ پر قرنطینہ کر لیا ہے۔
خیال رہے کہ اس وقت قومی اسمبلی اور سینیٹ کے اجلاس جاری ہیں جس پر بعض اراکین نے اعتراض اٹھا رکھا ہے۔
وفاقی وزیرِ سائنس و ٹیکنالوجی فواد چوہدری کا کہنا ہے کہ ارکان قومی اسمبلی کی بڑی تعداد ایوان کا اجلاس بلانے کے بعد کرونا کا شکار ہوئی ہے اس لیے اجلاس آن لائن بلایا جائے۔
پاکستان میں اب تک کئی اراکین قومی و صوبائی اسمبلی اس وبا میں مبتلا ہو چکے ہیں جب کہ بعض ارکان انتقال بھی کر چکے ہیں۔
حکمراں جماعت پاکستان تحریک انصاف کی رہنما شاہین رضا، سندھ کے صوبائی وزیر برائے کچی آبادی مرتضیٰ بلوچ اور مسلم لیگ (ن) کے رکن پنجاب اسمبلی شوکت منظور چیمہ کرونا وائرس کے سبب انتقال کرنے والوں میں شامل ہیں۔