بلوچستان: بین الاصوبائی ٹرانسپورٹ چلانے کی اجازت دے دی گئی
بلوچستان حکومت کے ترجمان لیاقت شاہوانی نے کہا ہے کہ ٹرانسپورٹرز کو حفاظتی تدابیر کے ساتھ بین الصوبائی ٹرانسپورٹ چلانے کی اجازت دے دی گئی ہے۔
پیر کو کرونا وائرس کے حوالے سے درپیش صورت حال سے میڈیا کو آگاہ کرتے ہوئے لیاقت شاہوانی نے کہا کہ کار میں صرف تین سواریاں سفر کر سکیں گے اگر خلاف ورزی کی گئی تو کارروائی جائے گی۔
ان کا کہنا تھا کہ اسی طرح مسافر ویگن میں 23 کے بجائے صرف 8 مسافر سفر کر سکیں گے۔
خیال رہے کہ بلوچستان میں کرونا وائرس کے مجموعی کیسز کی تعداد 6516 ہو گئی ہے جب کہ محکمہ صحت کے حکام نے 54 افراد کی ہلاکت کی تصدیق کی ہے۔
لیاقت شاہوانی نے بتایا کہ فاطمہ جناح جنرل چیسٹ اسپتال میں کرونا وائرس کی تشخیص کے لیے جدید مشینری لگا دی گئی ہے جہاں اب 500 سے 1000 تک یومیہ ٹیسٹس کی گنجائش موجود ہے۔ اس سے قبل یہ ٹیسٹ اسلام آباد اور لاہور سے کرائے جاتے تھے۔
لیاقت شاہوانی نے مزید کہا کہ بلوچستان کے اکثر لوگ حفاظتی تدابیر پر عمل نہیں کر رہے جس سے کرونا وائرس سے متاثرہ افراد کی تعداد میں اضافہ ہو رہا ہے۔
پاکستان میں آکسیجن فراہمی کے آلات سے لیس ایک ہزار بستروں کے اضافے کی منصوبہ بندی
پاکستان کے وفاقی وزیر اسد عمر نے کہا ہے کہ نیشنل کمانڈ اینڈ آپریشن سینٹر (این سی او سی) کے اجلاس میں فیصلہ کیا گیا ہے کہ پاکستان کے بڑے شہروں اسپتالوں میں ایک ہزار بستروں کا اضافہ کیا جائے۔
ٹوئٹر پر کی گئی ٹوئٹس میں ان کا مزید کہنا تھا کہ ان ایک ہزار بستروں کا اضافہ رواں ماہ ہی کیا جائے گا جب کہ ان کے ساتھ آکسیجن فراہم کرنے کے آلات بھی منسلک ہوں گے۔
ایک اور ٹوئٹ میں انہوں نے کہا کہ ایک ہزار بستروں میں سے 200 بستروں کا اضافہ کراچی کے اسپتالوں میں کیا جائے گا۔
پاکستان میں وائرس کا عروج جولائی کے آخر میں آئے گا: عمران خان
پاکستان کے وزیر اعظم عمران خان نے کہا ہے کہ پاکستان میں کرونا وائرس کا عروج جولائی کے آخر اور اگست میں آئے گا۔
اسلام آباد میں میڈیا بریفنگ میں عمران خان کا کہنا ہے تھا کہ ہمیں پتا ہے کہ کرونا وائرس نے پھیلنا ہے۔ ہماری کوشش ہے کہ کرونا وائرس پھیلنے کی رفتار کو قابو کیا جاسکے۔ اگر ہم احتیاطی تدابیر پر عمل کریں گے تو ہم وبا کو کنٹرول کیا جا سکے گا۔
وزیراعظم نے عوام سے اپیل کی کہ آپ کے گھروں میں موجود عمر رسیدہ افراد کو خطرہ ہے۔ لہذا کرونا وائرس کو سنجیدگی سے لیں۔ اگر عوام نے بے احتیاطی کی تو سب ملک کو خطرے میں ڈال رہے ہیں۔
وائرس سے نمٹنے کے اقدامات کے حوالے سے ان کا کہنا تھا کہ رواں ماہ ملک بھر کے اسپتالوں میں مزید ایک ہزار بستروں کا اضافہ کیا جا رہا ہے۔ ایک خصوصی ویب سائٹ بنائی جا رہی ہے جس کے ذریعے پتا چلے گا کہ کس شہر کے کس اسپتال میں کتنے بستر دستیاب ہیں۔
افغانستان میں ہلاکتوں کی تعداد 369 ہو گئی ہے
افغانستان کی وزارت صحt نے پیر کو ملک میں کرونا وائرس کے 575 نئے کیسز کی تصدیق کی ہے۔
حکام کا کہنا ہے کہ افغانستان میں کرونا وائرس کے مریضوں کی کل تعداد 20917 ہو گئی ہے۔
وزارت کے مطابق گزشتہ 24 گھنٹوں میں کرونا وائرس سے 12 افراد ہلاک ہوئے جس کے بعد اموات کی مجموعی تعداد 369 ہو گئی ہے۔
حکام کا کہنا ہے کہ وائرس سے متاثر ہونے والے 2171 افراد صحت یاب ہو چکے ہیں۔