افغانستان میں کرونا کے مزید 761 کیسز رپورٹ، مجموعی اموات 478 ہو گئیں
افغانستان میں پیر کو کرونا وائرس کے مزید 761 کیسز رپورٹ ہوئے ہیں جب کہ وائرس سے سات اموات ہوئی ہیں۔
افغانستان کی وزارتِ صحت کے مطابق گزشتہ 24 گھنٹوں میں 'کووڈ 19' کے مزید 761 کیسز سامنے آنے کے بعد ملک بھر میں وائرس سے متاثرہ مریضوں کی کل تعداد 25 ہزار 527 ہو گئی ہے۔ وزارت صحت کے مطابق اب تک کرونا وائرس کے نتیجے میں 478 اموات ہو چکی ہیں۔
بھارت: ٹرین کے ڈبوں کو کرونا کے مریضوں کا اسپتال بنانے کی پیش کش
بھارت کے دارالحکومت نئی دہلی میں کرونا وائرس کے مریضوں کی تعداد میں تیزی سے اضافے کے بعد اسپتالوں میں مریضوں کے لیے جگہ کم پڑنے لگی ہے۔ لہٰذا بھارت کی وزارتِ داخلہ نے پیش کش کی ہے کہ وہ ٹرینوں کی 500 بوگیاں فراہم کرنے کے لیے تیار ہیں جنہیں کرونا کے مریضوں کے لیے عارضی اسپتال میں بدلا جا سکتا ہے۔
دہلی کے سرکاری و نجی اسپتالوں میں کرونا وائرس کے نو ہزار مریضوں کے بیک وقت علاج کی سہولت موجود ہے۔ تاہم حکام اور ماہرین صحت کا کہنا ہے کہ وائرس کے تیزی سے پھیلاؤ کے باعث بھارتی دارالحکومت میں رواں ماہ کے اختتام تک 15 ہزار بیڈز کی ضرورت ہو گی۔
خیال رہے کہ بھارت میں گزشتہ 24 گھنٹوں کے دوران کرونا وائرس کے 11 ہزار سے زائد نئے کیسز رپورٹ ہوئے ہیں جب کہ اس دوران 325 ہلاکتیں بھی ہوئی ہیں۔
بھارت میں کووڈ 19 کے مریضوں کی مجموعی تعداد تین لاکھ 32 ہزار سے زائد ہے جب کہ وائرس سے 9520 اموات ہو چکی ہیں۔
تاجکستان میں لاک ڈاؤن کی پابندیاں نرم
تاجکستان نے کرونا وائرس کے باعث گزشتہ دو ماہ سے جاری لاک ڈاؤن میں نرمی کرتے ہوئے شاپنگ مالز، بازار، ریستوران، ہوٹل اور کئی دیگر سروسز کھولنے کا اعلان کیا ہے۔
حکومت کی جانب سے جاری بیان میں کہا گیا ہے کہ تاجکستان کی سرحدیں بدستور بند رہیں گی۔ مساجد اور ریلوے سروسز بھی فی الحال بند رہیں گی۔
خیال رہے کہ چین کے پڑوسی ملک تاجکستان میں کرونا وائرس کے کل 5035 مریض رپورٹ ہوئے ہیں جب کہ وائرس سے 50 اموات بھی ہوئی ہیں۔
ناروے: کرونا کے مریضوں کی نشان دہی کرنے والی موبائل ایپلی کیشن بند کرنے کا اعلان
ناروے نے کرونا وائرس کے مریضوں کی ٹریکنگ اور نشان دہی کے لیے لانچ کی گئی موبائل ایپلی کیشن بند کرنے کا اعلان کیا ہے۔
ناروے میں صحتِ عامہ کے ادارے 'این آئی پی ایچ' نے کہا ہے کہ وہ کووڈ 19 کے مریضوں کی ٹریکنگ کے لیے بنائی گئی ایپلی کیشن بند کردیں گے اور اس پر موجود سارا ڈیٹا ڈیلیٹ کیا جائے گا۔
یہ ایپلی کیشن نارویجین حکام کی جانب سے کرونا کا پھیلاؤ روکنے کے لیے متعارف کرائی گئی تھی جس پر ناروے کی ڈیٹا پروٹیکشن اتھارٹی کی جانب سے خاصی تنقید کی جا رہی تھی۔
ناروے میں شہریوں کے ڈیٹا کے تحفظ کے لیے کام کرنے والے ادارے نے جمعے کو کہا تھا کہ کرونا کے کیسز اور وائرس کا پھیلاؤ کم ہونے کے بعد اس ایپلی کیشن کے ذریعے حاصل کردہ ڈیٹا کی کوئی ضرورت نہیں اور اس پر ادارے کو پرائیویسی سے متعلق خدشات بھی ہیں۔