'اسمارٹ لاک ڈاؤن' کے تحت کراچی کے کئی علاقے بند
بھارت میں 13 ہزار 500 سے زیادہ ریکارڈ کیسز
بھارت کی وزارتِ صحت کے مطابق ملک میں گزشتہ 24 گھنٹوں کے دوران کرونا کے سب سے زیادہ کیسز رپورٹ ہوئے ہیں جو 13 ہزار 500 سے زائد ہیں۔
وزارتِ صحت کے اعداد و شمار کے مطابق بھارت میں جمعرات کو 13 ہزار 587 نئے مریض سامنے آئے اور 336 افراد کی کرونا سے موت ہوئی ہے۔ بھارت میں کرونا کے مجموعی کیسز کی تعداد تین لاکھ 80 ہزار سے تجاوز کر گئی ہے اور اموات کی تعداد 12 ہزار 573 ہو گئی ہے۔
بھارت میں اب تک دو لاکھ چار ہزار سے زائد افراد صحت یاب ہو چکے ہیں۔ کرونا کے مریضوں کے ٹھیک ہونے کی شرح بھارت میں 53.79 فی صد ہے جو عالمی شرح سے کم ہے۔ عالمی شرح 55 فی صد ہے۔
دوسری جانب دہلی کے وزیرِ اعلیٰ اروند کیجری وال نے وزیرِ داخلہ امیت شاہ کے ساتھ جمعرات کو تیسری بار میٹنگ کی۔ اس ملاقات کے بعد امیت شاہ نے کہا کہ نئی دہلی اور اس کے مضافاتی اضلاع کو کرونا سے الگ الگ لڑنے کے بجائے ایک ساتھ مل کر لڑنا ہوگا۔
علاوہ ازیں بھارت کی آٹھ ریاستوں میں پارلیمنٹ کے ایوانِ بالا 'راجیہ سبھا' کی 19 نشستوں کے لیے آج ووٹنگ ہو رہی ہے۔ یہ انتخابات مارچ میں شیڈول تھے لیکن الیکشن کمیشن نے 'کووڈ 19' کی وجہ سے انہیں ملتوی کر دیا تھا۔
اس موقع پر تمام پولنگ اسٹیشنوں پر خصوصی انتظامات کیے گئے ہیں۔ پولنگ سے قبل تمام مقامات کو سینیٹائز کیا گیا ہے اور پولنگ کے دوران جگہ جگہ ہینڈ سینیٹائزر بھی رکھے گئے ہیں۔ سماجی فاصلے اور دیگر ضابطوں کی بھی پابندی کی جا رہی ہے۔
ادھر کرونا وائرس کی وبا کے پھیلاؤ کے پیشِ نظر بھارتی شہر چنئی اور تین اضلاع میں 30 جون تک کے لیے دوبارہ لاک ڈاؤن کر دیا گیا ہے۔
پاکستان میں متاثرین کی تعداد ایک لاکھ 65 ہزار سے زیادہ
پاکستان میں گزشتہ چوبیس گھنٹوں میں مزید 4944 افراد میں وائرس کی تشخیص ہوئی ہے۔ اس طرح ملک بھر میں کرونا وائرس سے متاثرہ افراد کی تعداد ایک لاکھ 65 ہزار 42 تک پہنچ گئی ہے جن میں سے 61 ہزار 383 افراد صحت یاب بھی ہو چکے ہیں۔
پاکستان میں کرونا سے مزید 136 اموات
پاکستان میں جمعرات کو کرونا وائرس سے کم از کم 136 افراد ہلاک ہو گئے جب کہ 4640 نئے مریضوں کی تصدیق ہوئی۔
منگل کو بھی 136 ہلاکتیں ہوئی تھیں لیکن خدشہ ہے کہ جمعرات کی اموات زیادہ ہو جائے گی کیونکہ ان میں اسلام آباد کے اعداد و شمار شامل نہیں ہیں۔
پاکستان میں مسلسل چوتھے دن سو سے زیادہ اموات ہوئی ہیں۔ ملک میں 8 جون کو پہلی بار ایک دن میں سو سے زیادہ افراد ہلاک ہوئے تھے۔ تب سے اب تک 11 دن میں ہلاکتوں کی تعداد 1156 ہوگئی ہے۔
پی ڈی ایم اے پنجاب کے مطابق گزشتہ 24 گھنٹوں کے دوران 1540 مریضوں کا کرونا وائرس کا ٹیسٹ مثبت آیا جب کہ 63 مریض دم توڑ گئے۔ محکمہ صحت سندھ کے مطابق صوبے میں ایک دن میں سب سے زیادہ 48 اموات ہوئیں اور 2286 کیسز سامنے آئے۔
خیبرپختونخوا میں 18 مریض چل بسے جب کہ 506 افراد کے وائرس میں مبتلا ہونے کا علم ہوا۔ بلوچستان میں 6 اموات ہوئیں اور 204 افراد میں وائرس کی تصدیق ہوئی۔
پاکستان کے زیر انتظام کشمیر میں 29 اور گلگت بلتستان میں 12 نئے مریضوں کا پتا چلا۔ کرونا وائرس میں مبتلا گلگت بلتستان کے وزیر زراعت حاجی جانباز خان انتقال کر گئے۔
مجموعی طور پر پاکستان میں 164758 مریض سامنے آ چکے ہیں اور 3229 ہلاکتیں ہو چکی ہیں۔ پنجاب میں اموات کی تعداد 1265، سندھ میں 964، خیبرپختونخوا میں 773، بلوچستان میں 99، اسلام آباد میں 94 اور گلگت بلتستان میں 19 ہے۔ پاکستان کے زیر انتظام کشمیر میں 15 افراد ہلاک ہو چکے ہیں۔
سرکاری اعداد و شمار کے مطابق ملک بھر میں 61052 مریض صحت یاب ہو چکے ہیں۔ ان میں سب سے زیادہ سندھ کے 31034 اور پنجاب کے 17892 افراد شامل ہیں۔