زیادہ ٹیسٹنگ ہو گی تو کرونا کے کیسز بھی بڑھیں گے: صدر ٹرمپ
امریکہ کی ایک درجن سے زائد ریاستوں میں کرونا وائرس کے کیسز میں بڑا اضافہ ہوا ہے۔ 'جان ہاپکنز بلوم برگ اسکول آف پبلک ہیلتھ' میں ہیلتھ سیکیورٹی مرکز کے ڈائریکٹر ڈاکٹر ٹام انگلز بی نے کہا ہے کہ کیسز میں اضافے کی ایک وجہ ٹیسٹوں کی تعداد بڑھانا بھی ہے۔
ڈاکٹر ٹام نے کہا کہ کیسز میں سب سے زیادہ اضافہ ریاست ایریزونا، ٹیکساس، شمالی اور جنوبی کیرولائنا اور فلوریڈا میں دیکھا گیا۔ اتوار کو امریکہ میں 36 ہزار سے زائد کیسز رپورٹ ہوئے۔
دوسری جانب صدر ڈونلڈ ٹرمپ بھی کہہ چکے ہیں کہ وہ یہ تسلیم کرتے ہیں کہ امریکہ میں کرونا وائرس کے کیسز کی تعداد مسلسل بڑھ رہی ہے۔ صدر ٹرمپ کے بقول یہ اضافہ زیادہ ٹیسٹنگ کے نتیجے میں ہوا ہے۔
انہوں نے کہا کہ امریکہ میں کرونا وائرس کے ڈھائی کروڑ سے زائد ٹیسٹ کیے جا چکے ہیں۔
امریکی صدر نے اتوار کو ایک ریلی سے خطاب کرتے ہوئے کہا کہ اگر آپ زیادہ ٹیسٹ کریں گے تو کیسز میں لازمی اضافہ ہو گا۔ لہٰذا میں نے لوگوں سے ٹیسٹنگ کی رفتار کم کرنے کی ہدایت کی ہے۔
بعد ازاں وائٹ ہاؤس نے ایک بیان میں کہا کہ صدر ٹرمپ ایسا مزاقاً کہہ رہے تھے۔
- By نذر الاسلام
کرونا کے باعث گلگت بلتستان میں غربت کے پھیلنے کا خدشہ
پاکستان میں سیاحت کے لیے مقبول مقام گلگت بلتستان ان دنوں کرونا وائرس کی وجہ سے زبوں حالی کا شکار ہے۔ وہاں رواں برس نہ سیاح ہیں اور نہ ہی کاروباری سرگرمیاں۔ جس کی وجہ سیاحت کے شعبے سے وابستہ خاندان پریشانی میں مبتلا ہیں۔
وادی ہنزہ کے علاقے گلمت کی رہائشی شميم بانو گزشتہ 22 برس سے قالين بافی کی صنعت سے وابستہ ہيں۔ کرونا وائرس کی وبا کی وجہ سے رواں برس اب تک کسی نے بھی ان کے سینٹر کا رُخ نہيں کيا ہے۔
آٹھ خواتين پر مشتمل 'کارگاہ مرکز' کا تمام تر دار و مدار سياحت سے جڑا ہوا ہے۔
شميم بانو کے مطابق گلگت بلتستان کی نماياں اشيا ميں بکرے کی اون کی رگ، جسے مقامی زبان ميں 'شرما' يا 'پلوس' کہتے ہيں، وہ سياحوں ميں کافی مقبول ہے لیکن اس سال سیاح نہ ہونے کی وجہ سے انہیں شديد مالی بحران کا خدشہ ہے۔
برازیل میں اموات 50 ہزار سے تجاوز کر گئیں
برازیل اس وقت امریکہ کے بعد کرونا وائرس سے متاثر ہونے والا دوسرا بڑا ملک ہے۔
سرکاری اعداد و شمار کے مطابق اتوار تک کرونا وائرس سے تقریباً 50 ہزار افراد انتقال کر چکے تھے۔ یہاں کرونا سے متاثرہ افراد کی تعداد 10 لاکھ سے زیادہ ہو چکی ہے۔
برازیل کی وزارتِ صحت کے مطابق اب تک 10 لاکھ 85 ہزار 38 افراد میں کرونا وائرس کی تصدیق ہو چکی ہے جب کہ مرنے والوں کی تعداد 50 ہزار 617 ہے۔
لاطینی امریکہ کے سب سے بڑے ملک میں عام طور پر ایک دن میں ایک ہزار سے زیادہ اموات ریکارڈ کی گئی ہیں۔
کرونا کیسز کے باعث برازیل کی معیشت پر دباؤ بڑھ رہا ہے اور اس کے ساتھ ہی وہاں سیاسی عدم استحکام میں بھی اضافہ ہو رہا ہے۔
کرونا وائرس کے متاثرین میں یومیہ ریکارڈ اضافہ
عالمی ادارۂ صحت کی جاری کردہ ایک رپورٹ کے مطابق دنیا بھر میں کرونا وائرس سے متاثرہ افراد کی تعداد میں ایک روز میں ریکارڈ اضافہ ہوا ہے۔
ادارے کے مطابق اتوار کو کرونا وائرس کے ایک لاکھ 83 ہزار 20 کیسز رپورٹ ہوئے ہیں جب کہ اس سے قبل 18 جون کو ایک لاکھ 81 ہزار 232 کیسز رپورٹ ہوئے تھے۔
ڈبلیو ایچ او کاکہنا ہے کہ کیسز میں یومیہ سب سے زیادہ اضافہ شمالی اور جنوبی امریکہ میں ہوا جہاں مجموعی طور پر ایک لاکھ 16 ہزار سے زیادہ نئے کیسز رپورٹ ہوئے ہیں۔
عالمی ادارۂ صحت کی ہر روز تیار کی جانے والی رپورٹ کے مطابق کرونا سے متاثرین کی مجموعی تعداد 87 لاکھ ہو گئی ہے جب کہ چار لاکھ 61 ہزار افراد لقمہ اجل بن چکے ہیں۔