بیجنگ: دس روز میں 30 لاکھ افراد کا کرونا ٹیسٹ
چین کے دارالحکومت بیجنگ کے ایک حکومتی عہدے دار نے کہا ہے کہ کرونا وائرس کے مریضوں کی تشخیص کے لیے انتظامیہ بڑے پیمانے پر کی جانے والی ٹیسٹنگ کا عمل مزید تیز کرے گی۔
بیجنگ کے ہیلتھ کمیشن کے ڈپٹی ڈائریکٹر ژینگ ہوا نے کہا کہ انتظامیہ نے شہر میں ٹیسٹنگ کی استعداد بڑھا لی ہے اور اب بڑے پیمانے پر کرونا ٹیسٹنگ کا عمل مزید تیز کیا جائے گا۔
انہوں نے کہا کہ بیجنگ اب روزانہ تین لاکھ 'نیوکلک ایسڈ ٹیسٹس' کر سکتا ہے جب کہ مارچ میں ایک دن میں صرف 40 ہزار ٹیسٹس کی گنجائش تھی۔
ژینگ ہوا نے کہا کہ 12 جون سے 22 جون تک شہر میں لگ بھگ 30 لاکھ افراد کے کرونا ٹیسٹس کیے گئے ہیں۔
رواں سال صرف ایک ہزار مقامی افراد حج کر سکیں گے
سعودی عرب کے وزیرِ حج نے کہا ہے کہ کرونا وائرس کے سبب رواں سال فریضۂ حج کی ادائیگی کے لیے محدود لوگوں کو اجازت دی جائے گی اور صرف ایک ہزار کے لگ بھگ مقامی لوگ حج کر سکیں گے۔
سعودی وزیرِ حج نے کہا کہ لوگوں کی صحت جانچنے کا معیار سخت کیا جائے گا۔ صرف صحت مند افراد کو حج کی اجازت دی جائے گی جب کہ 65 برس سے زائد عمر کے لوگ اس سال حج نہیں کر سکیں گے۔
گزشتہ روز سعودی حکام نے حج پالیسی جاری کرتے ہوئے کہا تھا کہ صرف سعودی عرب کے شہری اور اقامہ رکھنے والے لوگ حج کر سکیں گے۔ کرونا وائرس کے باعث بیرونِ ملک سے لوگوں کو آنے کی اجازت نہیں دی جائے گی۔
خیال رہے کہ سعودی عرب میں ہر سال تقریباً 25 لاکھ عازمین حج کی ادائیگی کے لیے آتے ہیں۔
کرونا وائرس کے حملے کی شدت کا بلڈ گروپ کیا تعلق ہے؟