امریکہ میں کرونا سے نمٹنے کے اقدامات: محکمۂ صحت کے حکام ہاؤس کمیٹی کے رو برو پیش ہوں گے
امریکہ میں کثیر تعداد میں کرونا وائرس کے نئے کیسز سامنے آئے ہیں۔ اس سلسلے میں محکمۂ صحت کے اعلیٰ عہدے دار منگل کو کانگریس کی ہاؤس انرجی اینڈ کامرس کمیٹی کے سامنے پیش ہو رہے ہیں۔
وبائی امراض کے معروف ڈاکٹر انتھونی فاؤچی، امریکہ میں بیماریوں کے کنٹرول اور روک تھام کے ادارے کے ڈائریکٹر ڈاکٹر رابرٹ ریڈ فیلڈ، فوڈ اینڈ ڈرگ ایڈمنسٹریشن کے سربراہ ڈاکٹر اسٹیفن ہان اور امریکہ کی ہیلتھ سروسز کے سربراہ بریٹ گیروئر آج ہاؤس کمیٹی کے رو برو پیش ہوں گے اور ٹرمپ حکومت کے کرونا وائرس کے حوالے سے کیے جانے والے اقدامات سے متعلق سوالوں کے جواب دیں گے۔
ڈاکٹر فاؤچی کا کہنا ہے کہ لوگوں کو کرونا وائرس کی دوسری لہر کے بارے میں بات نہیں کرنی چاہیے کیوں کہ ابھی امریکہ پہلی لہر سے بھی باہر نہیں نکلا ہے۔
دوسری جانب امریکہ کی بہت سی ریاستوں میں لاک ڈاؤن کی پابندیاں ختم کی جا رہی ہیں۔ ٹیکساس کے گورنر گریگ ایبٹ نے پیر کو ایک بیان میں کہا ہے کہ پابندیاں دوبارہ نافذ کرنے کا اقدام اسی صورت میں کیا جائے گا جب اس کے علاوہ کوئی اور راستہ نہ ہو۔
ٹیکساس کی ہمسایہ ریاست لوزیانا میں کرونا وائرس سے ہونے والی ہلاکتیں تین ہزار سے تجاوز کر گئی ہیں اور روزانہ ریکارڈ نئے کیسز سامنے آ رہے ہیں۔
لوزیانا میں بھی پابندیاں رواں جمعے کو ختم ہو رہی ہیں لیکن ریاست کے گورنر جان بیل ایڈورڈ کا کہنا ہے کہ وہ پابندیاں جاری رکھیں گے۔
امریکہ میں اس وقت کرونا وائرس کے کُل مریض 23 لاکھ ہیں جب کہ ہلاک ہونے والوں کی تعداد بھی ایک لاکھ 20 ہزار سے تجاوز کر گئی ہے۔
افغانستان میں کرونا کے 29 ہزار سے زائد مریض، وینٹی لیٹرز اسمگل کرنے کے دعوے مسترد
افغانستان کی وزارتِ صحت کے مطابق ملک میں گزشتہ 24 گھنٹوں کے دوران کرونا وائرس کے 324 نئے کیسز رپورٹ ہوئے ہیں جس کے بعد کرونا کے مریضوں کی مجموعی تعداد 29 ہزار 481 ہو گئی ہے۔
وزارتِ صحت کے مطابق افغانستان میں کرونا سے مجموعی اموات 618 ہو گئی ہیں۔
افغانستان میں یہ خبریں بھی گردش کر رہی تھیں کہ وینٹی لیٹرز افغانستان سے پاکستان اسمگل کیے جا رہے ہیں۔ وزارتِ صحت نے ان دعوؤں کو بھی مسترد کیا ہے۔
وزارتِ صحت کے مطابق افغانستان کے پاس اس وقت 262 وینٹی لیٹرز ہیں جب کہ جولائی کے آغاز میں مزید 585 وینٹی لیٹرز کابل پہنچ جائیں گے۔
پنجاب یونیورسٹی طلبہ سے صرف ٹیوشن فیس لے گی، دیگر فیسیں معاف
پنجاب یونیورسٹی نے کرونا وائرس کے باعث طلبہ سے ٹیوشن فیس کے علاوہ دیگر فیسیں نہ لینے کا اعلان کیا ہے۔ یونیورسٹی کے وائس چانسلر ڈاکٹر نیاز احمد نے کہا ہے کہ کرونا کی وبا کے دنوں میں طلبہ سے میڈیکل، ٹرانسپورٹ اور لائبریری فیس نہیں لیں گے۔
وائس چانسلر نے کہا کہ اسپورٹس فیس اور ہاسٹل چارجز بھی نہیں لیے جائیں گے لیکن آن لائن کلاسز کے دوران ٹیوشن فیس لی جائے گی۔
روس میں کرونا وائرس کے مریضوں کی تعداد چھ لاکھ تک پہنچ گئی
روس میں کرونا وائرس کے مریضوں کی تعداد چھ لاکھ تک پہنچ گئی ہے جب کہ آٹھ ہزار سے زائد افراد عالمی وبا سے ہلاک ہو چکے ہیں۔
روس میں پیر کو 7425 نئے کیسز رپورٹ ہوئے جس کے بعد کرونا کے مریضوں کی مجموعی تعداد پانچ لاکھ 99 ہزار 705 ہو گئی ہے۔ روس دنیا میں کرونا وائرس سے سب سے زیادہ متاثر ہونے والا تیسرا ملک ہے۔
گزشتہ 24 گھنٹوں کے دوران ملک میں 153 ہلاکتیں ہوئی ہیں جس کے بعد کل اموات 8359 تک پہنچ گئی ہیں۔
دوسری جانب دارالحکومت ماسکو میں پابندیاں نرم کردی گئی ہیں اور جمنازیم، ریستوران، بازار اور دیگر عوامی مقامات کھول دیے گئے ہیں۔