امریکہ کی کن ریاستوں میں کرونا وائرس تیزی سے پھیل رہا ہے؟
امریکہ کی 18 ریاستوں میں گزشتہ ہفتے کے دوران کرونا وائرس کے ریکارڈ یومیہ کیسز سامنے آئے ہیں جب کہ 11 ریاستیں ایسی ہیں جن میں اسپتالوں میں داخل ہونے والے مریضوں کی تعداد تیزی سے بڑھ رہی ہے۔
چین میں 19 نئے کیسز رپورٹ، بیجنگ میں بڑے پیمانے پر ٹیسٹنگ جاری
چین کے 'نیشنل ہیلتھ کمیشن' نے رپورٹ کیا ہے کہ گزشتہ 24 گھنٹوں کے دوران ملک میں کرونا وائرس کے 19 نئے کیسز سامنے آئے ہیں۔
چین میں گزشتہ روز 12 نئے کیسز رپورٹ ہوئے تھے جس کے بعد گزشتہ 24 گھنٹوں کے دوران سامنے آنے والے مریضوں کی تعداد میں پھر اضافہ ہوا ہے۔
نئے کیسز میں سات مریض دارالحکومت بیجنگ میں پائے گئے ہیں جہاں بڑے پیمانے پر ٹیسٹنگ بھی کی جا رہی ہے۔
برطانیہ کے شہر لیسٹر میں دوبارہ لاک ڈاؤن
برطانیہ نے کرونا وائرس کے پیشِ نظر اپنے ایک شہر لیسٹر میں دوبارہ لاک ڈاؤن کر دیا ہے۔ لیسٹر میں نئے کیسز رپورٹ ہونے کے بعد یہ پہلا موقع ہے جب برطانیہ نے کسی ایک شہر یا علاقے میں دوبارہ میں لاک ڈاؤن کیا ہے۔
برطانوی حکومت نے اس سے قبل کرونا وائرس کا پھیلاؤ روکنے کے لیے ملک گیر لاک ڈاؤن کیا تھا جسے رواں ماہ کے آغاز میں ختم کرتے ہوئے پابندیوں میں بتدریج نرمی کی تھی۔
آسٹریلیا: میلبرن میں کرونا کا پھیلاؤ روکنے کے لیے لاک ڈاؤن کا فیصلہ
آسٹریلیا کے دوسرے بڑے شہر میلبرن میں کرونا وائرس کا پھیلاؤ روکنے کے لیے حکام نے کچھ علاقوں میں پابندیاں نافذ کرنے کا فیصلہ کیا ہے اور لاکھوں لوگوں کو گھروں میں رہنے کی ہدایت کی ہے۔
آسٹریلیا کی ریاست وکٹوریہ میں جمعرات سے اب تک کرونا وائرس کے 233 نئے کیسز رپورٹ ہوئے ہیں جس میں سے سب سے زیادہ مریض میلبرن میں سامنے آئے ہیں۔ آسٹریلیا نے کرونا وائرس کے پھیلاؤ پر کسی حد تک قابو پا لیا تھا لیکن حالیہ کیسز نے ایک بار پھر آسٹریلیا کے لیے خطرے کی گھنٹی بجا دی ہے۔
حکام کے مطابق میلبرن میں کووڈ 19 کا پھیلاؤ روکنے کے لیے بدھ سے کچھ علاقوں میں لاک ڈاؤن کی پابندیاں عائد کی جائیں گی جس کے باعث تقریباً تین لاکھ افراد گھروں تک محدود رہنے پر مجبور ہوں گے۔