چین میں کرونا وائرس کے پانچ نئے کیسز رپورٹ
چین میں جمعرات کو کرونا وائرس کے پانچ کیسز رپورٹ ہوئے ہیں جن میں سے دو کیسز بیرونِ ملک سے چین آنے والوں کے ہیں۔
بیجنگ میں گزشتہ 24 گھنٹوں کے دوران صرف ایک کیس رپورٹ ہوا ہے جب کہ دارالحکومت میں روزانہ ہزاروں افراد کے کرونا ٹیسٹ کیے جا رہے ہیں۔
چین میں وبا پھیلنے کے بعد سے اب تک 'کووڈ 19' کے 83 ہزار 537 کیسز رپورٹ ہوئے ہیں جب کہ 4 ہزار 634 اموات ہوئی ہیں۔
انڈونیشیا میں ریکارڈ یومیہ کیسز رپورٹ
انڈونیشیا کی وزارتِ صحت کے حکام نے رپورٹ کیا ہے کہ گزشتہ 24 گھنٹوں کے دوران ملک میں 'کووڈ 19' میں مبتلا 1624 نئے مریض سامنے آئے ہیں جو ملک میں اب تک ایک دن میں رپورٹ ہونے والے کرونا کیسز کی سب سے زیادہ تعداد ہے۔
اس اضافے کے بعد انڈونیشیا میں کرونا وائرس سے متاثرہ مریضوں کی مجموعی تعداد 59 ہزار 394 ہو گئی ہے جب کہ گزشتہ روز 53 مزید اموات کے بعد ملک میں وائرس سے کل ہلاکتیں 2987 تک پہنچ گئی ہیں۔
کرونا وائرس: امریکہ میں یومِ آزادی کی تقریبات متاثر ہونے کا خدشہ
امریکہ میں ہر سال چار جولائی کو یومِ آزادی بڑے جوش و خروش سے منایا جاتا ہے اور اس سلسلے میں مختلف تقریبات منعقد کی جاتی ہیں لیکن اس سال یومِ آزادی کی تقریبات کرونا وائرس کی نذر ہونے کا خدشہ ہے۔
امریکہ میں چار جولائی کو عام تعطیل ہوتی ہے اور مختلف شہروں میں آتش بازی کا مظاہرہ کیا جاتا ہے لیکن رواں سال کرونا وائرس کے باعث بیشتر روایتی پریڈز، آتش بازی اور دیگر تقریبات یا تو منسوخ کر دی گئی ہیں یا پھر اس میں عوام کی شرکت روکنے کے اقدامات کیے جا رہے ہیں۔
امریکی شہر بوسٹن، لاس اینجلس، شکاگو اور کئی دیگر بڑے شہروں میں یومِ آزادی کے موقع پر ہونے والی آتش بازی منسوخ کر دی گئی ہے۔
ریاست نیو یارک میں مختلف مقامات پر آتش بازی کی جائے گی لیکن عوام کو ان مقامات سے دور رکھنے کے لیے یہ واضح نہیں کیا جا رہا کہ آتش بازی کب اور کہاں ہو گی؟
دنیا بھر میں کرونا وائرس کے ریکارڈ یومیہ کیسز رپورٹ
دنیا کے مختلف ملکوں میں گزشتہ 24 گھنٹوں کے دوران کرونا وائرس کے دو لاکھ 18 ہزار سے زائد کیسز رپورٹ ہوئے ہیں۔ عالمی وبا کے آغاز سے اب تک ایک دن میں سامنے آنے والے کیسز کی یہ سب سے بڑی تعداد ہے۔
مریضوں کی تعداد میں ریکارڈ اضافے کے بعد عالمی وبا سے متاثر ہونے والے افراد کی مجموعی تعداد ایک کروڑ سات لاکھ چار ہزار 228 ہو گئی ہے جب کہ اموات پانچ لاکھ 16 ہزار سے زائد ہیں۔
دنیا بھر میں 'کووڈ 19' کا شکار ہونے والے 54 لاکھ 89 ہزار سے زائد افراد اس وبا کو شکست دے کر صحت یاب ہو چکے ہیں۔