برازیل میں مزید 37 ہزار سے زائد کیسز رپورٹ
برازیل میں کرونا وائرس سے متاثرہ مزید 37 ہزار 923 مریض سامنے آگئے ہیں۔ جب کہ ملک بھر میں وبائی مرض سے ہلاک ہونے والے افراد کی تعداد 64 ہزار 265 ہوگئی ہے۔
وزارت صحت کے مطابق ملک میں پچھلے 24 گھنٹوں کے دوران ایک ہزار 90 اموات ہوچکی ہیں۔
برازیل میں وبائی مرض کے آغاز سے اب تک 15 لاکھ 77ہزار کیسز رپورٹ ہو چکے ہیں۔
امریکہ میں انتخابی مہم کے لیے ٹیکنالوجی کا استعمال
کرونا وائرس نے نومبر میں ہونے والے امریکی صدارتی الیکشن کی انتخابی مہم کے لیے مشکلات پیدا کر دی ہیں۔ صدر ٹرمپ اور جو بائیڈن دونوں فنڈ ریزنگ کے روایتی طریقے نہیں اپنا سکے۔ انہیں اپنے ووٹرز سے رابطے کے لیے ٹیکنالوجی پر انحصار کرنا پڑ رہا ہے۔
پاکستان میں 56 فی صد متاثرہ افراد صحت یاب
پاکستان میں گزشتہ 24 گھنٹے کے دوران کرونا وائرس کے مزید 3191 کیسز کی تصدیق ہوئی ہے جس کے بعد اتوار کی صبح تک متاثرہ افراد کی تعداد 2 لاکھ 28 ہزار 471 ہو گئی ہے۔
سرکاری اعداد و شمار کے مطابق 24 گھنٹوں دوران مزید 93 افراد ہلاک ہوئے جس کے بعد اموات کی تعداد 4712 ہوگئی ہے۔ پاکستان میں کرونا وائرس سے متاثر ہونے والے 2.1 فی صد افراد ہلاک ہوئے۔
حکام کے مطابق متاثرہ افراد میں سے 56.8 فیصد لوگ صحت یاب ہو چکے ہیں۔ صحت یاب ہونے والے افراد کی تعداد ایک لاکھ 29 ہزار سے زائد بتائی جا رہی ہے۔
پاکستان میں گزشتہ روز 25 ہزار 527 افراد کے ٹیسٹ کیے گئے۔ وفاقی وزرا کی جانب سے مسلسل دعویٰ کیا جا رہا ہے کہ پاکستان میں 131 لیبارٹریز میں یومیہ 50 ہزار ٹیسٹ کرنے کی صلاحیت موجود ہے تاہم 22 جون کے بعد ملک میں ٹیسٹ بتدریج کم کیے جا رہے ہیں۔
پاکستان میں ایک دن میں سب سے زیادہ ٹیسٹ 19 جون کو کیے گئے تھے جن کی تعداد 31 ہزار 600 تھی۔
پاکستان میں اب تک مجموعی طور پر 13 لاکھ 98 ہزار 352 ٹیسٹ کیے جا چکے ہیں۔