ایران میں ایک روز کے دوران ریکارڈ اموات
ایران میں کرونا وائرس سے ایک روز کے دوران ریکارڈ 163 اموات رپورٹ ہوئی ہیں جس کے بعد ہلاکتوں کی کل تعداد 11 ہزار 571 ہو گئی ہے۔
ایران کی وزارتِ صحت نے تصدیق کی ہے کہ رواں برس فروری میں وائرس کے پھیلاؤ سے اب تک ایک روز کے دوران ہونے والی ہلاکتوں کی یہ سب سے زیادہ تعداد ہے۔
حکام کے مطابق گزشتہ چوبیس گھنٹوں کے دوران ملک بھر میں دو ہزار 560 افراد میں وائرس کی تشخیص ہوئی ہے۔ اس طرح ایران میں وبا سے متاثر ہونے والے افراد کی تعداد دو لاکھ 40 ہزار 438 تک پہنچ گئی ہے۔
کرونا وائرس ہوا سے پھیلتا ہے، بارہ ملکوں کے سائنس دانوں کا نیا نظریہ
دنیا کے 12 ملکوں کے تقریباً ڈھائی سو سائنس دانوں نے کہا ہے کہ کوویڈ 19 ہوا کےذریعے پھیلنے والا وائرس ہے۔ انہوں نے عالمی ادارہ صحت کو ایک خط میں کہا ہے کہ وائرس سے نمٹنے کے لیے وہی تدابیر اختیار کی جائیں، جو ہوا سے پھیلنے والی وبا کی صورت حال میں اپنائی جاتی ہیں۔
بھارت میں کرونا کیسز کی تعداد روس سے بڑھ گئی ہے جس کے بعد عالمی فہرست میں اس کا نمبر تیسرا ہو گیا ہے۔ پہلے درجے پر بدستور امریکہ اور دوسرے پر برازیل ہیں۔ بھارت میں 24 ہزار نئے کیسز کے ساتھ مجموعی تعداد 7 لاکھ کے لگ بھگ ہو گئی ہے۔
امریکہ اور بھارت کے بعد آج سب سے زیادہ نئے کیسز جنوبی افریقہ میں رپورٹ ہوئے جن کی تعداد 8800 ہے۔
دنیا بھر میں کرونا کے سب سے زیادہ ٹیسٹ امریکہ میں ہوئے ہیں جن کی تعداد 3 کروڑ 75 لاکھ ہے۔اس کے بعد دو کروڑ 10 لاکھ کے ساتھ روس دوسرے اور ایک کروڑ ٹیسٹوں کے ساتھ برطانیہ تیسرے درجے پر ہے۔ پاکستان میں اب تک 14لاکھ کے قریب ٹیسٹ ہوئے ہیں، جب کہ ملک میں پازیٹو کیسز کی تعداد 2 لاکھ 31 ہزار اور اموات 4700 سے زیادہ ہیں۔
جنوبی افریقہ میں ایک دن میں 10 ہزار کیسز کی تصدیق
جنوبی افریقہ میں ایک دن میں 10 ہزار سے زائد کیسز رپورٹ ہوئے ہیں۔
جنوبی افریقہ میں وائرس سے متاثرہ افراد کی تعداد میں تیزی سے اضافہ ہونا شروع ہو گیا ہے۔ نئے کیسز سامنے آنے کے بعد متاثرہ افراد کی تعداد ایک لاکھ 87 ہزار سے زائد ہو چکی ہے۔
حکام کے مطابق کرونا وائرس سے متاثر ہونے والے تین ہزار افراد ہلاک ہو چکے ہیں۔
بھارتی تاجر نے کرونا سے بچنے کے لیے سونے کا ماسک پہن لیا
بھارت کے شہر پونے کے ایک تاجر شنکر کراڈے نے کرونا وائرس سے بچنے کے لیے چار ہزار امریکی ڈالر کی مالیت کا سونے کا فیس ماسک پہن لیا ہے۔
بھارتی کرنسی میں اس کی قیمت تین لاکھ روپے سے زیادہ ہے۔
سونے سے بنے اس ماسک میں سانس لینے کے لیے باریک سوراخ بنائے گئے ہیں۔
شنکر کراڈے کا کہنا ہے کہ ماسک کا وزن 60 گرام ہے جب کہ اسے تیار کرنے میں 8 دن لگے۔
خبر رساں ادارے 'اے ایف پی' کے مطابق شنکر عام ماسک کی طرح ہی اسے دن بھر استعمال کرتے ہیں اور جہاں بھی جاتے ہیں یہ ماسک لگائے رہتے ہیں۔
شنکر کا کہنا ہے کہ یہ ماسک انہیں وائرس سے کس حد تک محفوظ رکھے گا اس بارے میں وہ کچھ نہیں کہہ سکتے۔