امریکہ میں یومیہ کیسز کا نیا ریکارڈ
امریکہ میں جمعرات کو کرونا وائرس کے 63 ہزار 200 سے زیادہ کیسز رپورٹ ہوئے ہیں۔ ایک روز کے دوران رپورٹ ہونے والے کیسز کا نیا ریکارڈ ہے۔
امریکہ میں گزشتہ دو ہفتوں کے دوران وبا تیزی سے پھیلی ہے جس نے 50 میں سے 41 ریاستوں کو اپنی لپیٹ میں لے رکھا ہے جہاں نئے کیسز میں مسلسل اضافہ ہو رہا ہے۔
صرف ریاست فلوریڈا میں جمعرات کو تقریباً نو ہزار کیسز اور وبا سے 120 افراد ہلاک ہوئے ہیں۔ گورنر رون ڈی سینٹس نے کرونا کیسز میں اضافے کو تشویش ناک قرار دیا ہے اور شہریوں پر زور دیا ہے کہ وہ خوف زدہ نہ ہوں۔
امریکہ کی گنجان آباد ریاستوں کیلی فورنیا اور ٹیکساس نے بدھ کو اعلان کیا تھا کہ ریاستوں میں کرونا سے اموات کی شرح میں ریکارڈ اضافہ ہوا ہے۔
خیبرپختونخوا میں کرونا مریضوں کے لیے مختص اسپتال کا افتتاح
وزیر اعلی خیبرپختونخوا محمود خان نے جمعرات کو پشاور میں صوبے کے پہلے کرونا اسپتال کا افتتاح کر دیا ہے۔
حکام کے مطابق یہ اسپتال ابتداً 60 بستروں پر مشتمل ہے جب کہ ایک ماہ بعد اس تعداد کو 110 تک بڑھایا جائے گا۔
حکام کا دعویٰ ہے کہ یہ اسپتال ملک میں کرونا مریضوں کے لیے مختص اپنی نوعیت کا پہلا اسپتال ہے اور یہ بین الاقوامی ایس او پیز اور گائیڈ لائنز کے مطابق قائم کیا گیا ہے۔ حکام کا کہنا ہے کہ اسپتال میں کرونا مریضوں کے لیے ہر طرح کی سہولیات موجود ہیں۔
اسپتال میں آئسولیشن وارڈ، وینٹی لیٹرز سمیت دیگر سہولیات بھی موجود ہیں۔
وزیر اعلٰی کا کہنا ہے کہ اسپتال کے قیام سے پشاور کے ٹیچنگ اسپتالوں پر کرونا مریضوں کا دباؤ کم ہو گا۔ اُن کا کہنا تھا کہ این ڈی ایم اے کے تعاون سے پشاور میں 210 بستروں پر مشتمل ایک اور اسپتال قائم کیا جا رہا ہے۔
افغانستان میں کرونا کے مزید 314 کیس رپورٹ
افغانستان میں کرونا وائرس کے مریضوں کی کل تعداد 33908 ہو گئی ہے جب کہ گزشتہ 24 گھنٹوں میں 314 نئے کیسز سامنے آئے ہیں ۔ وزارتِ صحت کے اعداوشمار کے مطابق اب تک وائرس سے ہونے والی اموات کی تعداد 957 ہے۔
افغان وزارتِ صحت کے نگران وزیر ڈاکٹر احمد جاوید عثمانی نے ایک نیوز کانفرنس میں بتایا ہے کہ گزشتہ دو ماہ کے مقابلے میں اس وقت صورتِ حال بہتر ہے۔ دو ماہ پہلے افغانستان میں کرونا کے مثبت کیسز کی شرح 70 فی صد تھی جو اب 40 فی صد پر آچکی ہے۔ لیکن انہوں نے یہ کہا کہ ابھی بھی انفیکشن کا خطرہ بہت زیادہ ہے۔ انہوں نے اسپتالوں میں آکسیجن کی کمی کے معاملے کو حل کرنے کی بات بھی کی۔ اس سے پہلے کرونا کے مریضوں کے عزیز واقارب نے دعوے کئے تھے کہ کابل کے اسپتالوں میں آکسیجن کی کمی کی وجہ سے اموات ہوئیں۔
پاکستان میں تعلیمی ادارے کھولنے کا اعلان
حکومتِ پاکستان نے 15 ستمبر سے تعلیمی ادارے کھولنے کا فیصلہ کیا ہے۔
وفاقی وزیرِ تعلیم شفقت محمود کا کہنا ہے کہ 15 ستمبر کو اسکولز، کالجز اور یونیورسٹیاں کھولنے کا فیصلہ کیا گیا ہے۔ لیکن اگست اور ستمبر کے اوائل میں صورتِ حال کا دوبارہ جائزہ لیا جائے گا۔
اسلام آباد میں پریس کانفرنس کے دوران انہوں نے کہا کہ اگر کرونا وائرس کی صورتِ حال قابو میں رہی تو 15 ستمبر کو ملک بھر میں تعلیمی ادارے کھولے جائیں گے۔
ان کے بقول 'ایس او پیز' کے تحت تعلیمی ادارے کھولے جائیں گے۔ اس ضمن میں مختلف تجاویز پر غور کیا جا رہا ہے۔ کچھ تجاویز یہ ہیں کہ ایک دن اسکول کھولے جائیں اور ایک دن چھٹی ہو تاہم ابھی دو ماہ ہیں اس کا حتمی فیصلہ اس دوران کر لیا جائے گا۔