'ہوا سے کرونا پھیلتا ہے': عالمی ادارۂ صحت نے سائنس دانوں کا مؤقف تسلیم کر لیا
عالمی ادارۂ صحت نے دنیا بھر کے 200 سے زائد سائنس دانوں کے اس مؤقف کو درست قرار دیا ہے کہ کرونا وائرس ہوا کے ذریعے بھی پھیل سکتا ہے۔
امریکہ اور آسٹریلیا کے سائنس دانوں سمیت 200 سے زائد سائنس دانوں نے کہا تھا کہ اس بات کے بارے میں کوئی ابہام نہیں ہے کہ وائرس سانس باہر نکالتے وقت اور کھانستے یا بات کرتے وقت ہوا میں شامل ہو جاتے ہیں، جو خاصی دیر تک ہوا میں رہ سکتے ہیں۔
دوسری جانب عالمی ادارۂ صحت اس بات کا بھی جائزہ لے رہا ہے کہ دنیا بھر کے مختلف ممالک میں کرونا وائرس سے نمٹنے کے اقدامات کس حد تک مؤثر رہے ہیں۔ ادارے کے سربراہ ٹیڈروس ایڈہینم نے حکومتوں پر زور دیا ہے کہ لوگوں کی زندگیاں بچانے کے لیے باہمی رابطے کو بہتر بنائیں اور کرونا وائرس سے نمٹنے کے لیے سب ملک مل کر کام کریں۔
برازیل: صدر کا انٹرویو کرنے والے صحافی قرنطینہ منتقل
لاطینی امریکہ کے ملک برازیل میں نشریاتی اداروں نے صدر جائر بولسونارو کا انٹرویو کرنے والے صحافیوں کو قرنطینہ کر دیا ہے۔
صدر بولسونارو نے اپنی سرکاری رہائش گاہ پر ہونے والے انٹرویو میں میڈیا کے نمائندوں کو بتایا تھا کہ ان کا کرونا ٹیسٹ مثبت آیا ہے۔
برازیلی نشریاتی اداروں کا کہنا ہے کہ جن صحافیوں نے صدر بولسونارو کا انٹرویو کیا تھا جب تک ان کے کرونا ٹیسٹس منفی نہیں آجاتے، انہیں کام کے لیے نہیں بلایا جائے گا۔
بولیویا: کرونا کے مریضوں کی تلاش کے لیے گھر گھر ٹیسٹنگ کی مہم
آسٹریلیا: بیرون ملک سے وطن واپس آنے والے شہریوں کی تعداد نصف کرنے کا فیصلہ
آسٹریلیا کی حکومت نے اعلان کیا ہے کہ وہ کرونا وائرس کے پھیلاؤ کو روکنے کے لیے بیرون ملک مقیم آسٹریلوی شہریوں کی ہر ہفتے وطن واپس آنے والوں کی تعداد نصف کر رہی ہے۔
آسٹریلوی ریاست وکٹوریا میں جمعے کو کرونا وائرس کے 288 نئے کیسز رپورٹ ہوئے ہیں جب کہ آسٹریلیا میں کرونا وائرس کا شکار ہونے والے افراد کی اکثریت بیرون ملک سے آئی ہے۔
رواں سال مارچ کے بعد سے صرف آسٹریلوی شہریوں اور ملک میں مستقل طور پر مقیم افراد کو ہی آسٹریلیا آنے کی اجازت تھی۔ اب تک تین لاکھ 57 ہزار سے زائد آسٹریلوی وطن واپس آ چکے ہیں۔
حکومتی اقدام کے بعد ہر ہفتے صرف 4175 افراد کو آسٹریلیا آنے کی اجازت ہو گی جنہیں 14 روز تک قرنطینہ میں بھی رہنا ہو گا۔ قرنطینہ کے اخراجات بھی وہ خود برداشت کریں گے۔
آسٹریلیا کے ہمسایہ ملک نیوزی لینڈ نے بھی بیرون ملک سے وطن واپس آنے والوں کی تعداد محدود کرنے کا فیصلہ کیا ہے۔