پاکستان: کرونا کیسز کی تعداد ڈھائی لاکھ سے تجاوز کر گئی
پاکستان میں کرونا وائرس کے کیسز کی تعداد ڈھائی لاکھ سے تجاوز کر گئی ہے جب کہ ایک لاکھ 61 ہزار سے زیادہ مریض صحت یاب بھی ہو چکے ہیں۔
سرکاری اعداد و شمار کے مطابق گزشتہ چوبیس گھنٹوں میں ملک بھر میں کرونا وائرس کے شکار مزید 69 مریض دم توڑ گئے اور 2769 افراد میں وائرس کی تشخیص ہوئی ہے۔
پاکستان میں کرونا سے ہلاکتوں کی کل تعداد 5266 ہو گئی ہے جب کہ 1837 مریضوں کی حالت تشویش ناک ہے۔
عالمی سطح پر اتوار کو کرونا کے ریکارڈ کیسز رپورٹ
عالمی ادارۂ صحت نے کہا ہے کہ اتوار کو دنیا بھر میں کرونا وائرس کے دو لاکھ 30 ہزار 370 کیسز رپورٹ ہوئے ہیں جو ایک روز کے دوران رپورٹ ہونے والے کیسز کی اب تک کی سب سے زیادہ تعداد ہے۔
اس سے قبل دس جولائی کو دو لاکھ 28 ہزار سے زیادہ کیسز رپورٹ ہوئے تھے۔
کیسز کا حالیہ اضافہ امریکہ، برازیل، بھارت اور جنوبی افریقہ میں ہوا ہے جہاں کرونا وائرس کے مریضوں میں تیزی سے اضافہ ہوتا جا رہا ہے۔
دنیا بھر میں اس وبا سے سات ماہ کے دوران پانچ لاکھ 65 ہزار سے زیادہ اموات اور ایک کروڑ 30 لاکھ سے زیادہ متاثر ہو چکے ہیں۔
امریکی حکام اسکول کھولنا چاہتے ہیں، اسکول انتظامیہ تیار نہیں
ایک طرف جہاں امریکہ میں کوویڈ 19 کے مریضوں کی تعداد میں تیزی سے اضافہ ہو رہا ہے وہاں دوسری جانب صدر ٹرمپ اور وائٹ ہاؤس کے حکام اسکول کھولنے پر زور دے رہے ہیں۔
اتوار کے روز قومی تعلیمی نظام کی سربراہ بیسٹی ڈیواس نے ملک بھر کی کمیونیٹز پر زور دیا ہے کہ وہ آنے والے ہفتوں میں اسکولوں میں پانچوں دن کلاسیں شروع کریں جن میں شرکت کے لیے طالب علم کلاس روم میں آئیں۔
ان کا کہنا تھا کہ بچوں کا سکول آنا محفوظ ہے۔ فاکس نیوز اور سی این این پر گفتگو کرتے ہوئے انہوں نے کہا کہ اعداد و شمار یہ ظاہر نہیں کرتے کہ بچوں کا اسکول آنا خطرناک ہے اور سائنس دان بھی یہ کہتے ہیں کہ بچوں کو یہ وائرس نہیں لگتا۔ اس لیے اسکول کھولنے چاہیئں اور بچوں کو اسکول جانا چاہیے۔
دوسری جانب بیماریوں کے کنٹرول کے قومی ادارے سی ڈی سی کے عہدے داروں نے کہا ہے کہ وہ معمول کی زندگی کی جانب واپس جانے کے لیے احتیاطی تدابیر پر سختی سے عمل کرنے پر زور دیں گے جن میں ماسک پہننا اور سماجی فاصلہ برقرار رکھنا شامل ہے۔
دارالحکومت واشنگٹن کے مضافات میں واقع ایک بڑی کاؤنٹی فیئر فیکس کے اسکول سسٹم کے سربراہ سکاٹ برابرینڈ نے کہا ہے کہ بچوں کی تعداد اور حفاظتی تدابیر کے پیش نظر فیرفیکس کاؤنٹی کو پانچوں دن اسکول کھولنے کے لیے پنٹاگان جیسی کم ازکم پانچ بڑی عمارتوں کی ضرورت پڑے گی، جس کے لیے وسائل موجود نہیں ہیں۔
ایک اندازے کے مطابق پنٹاگان میں 20 ہزار سے زیادہ افراد کے کام کرنے کی گنجائش موجود ہے۔
صحت کے ماہرین کا کہنا ہے کہ اسکول سسٹم کے 15 لاکھ ٹیچرز میں سے کم ازکم ایک چوتھائی عمر کے اس حصے میں ہیں، جس میں وہ مہلک وبا کرونا وائرس کا آسانی سے شکار بن سکتے ہیں۔ اس لیے موجودہ صورت حال میں اسکول کھولنا درست فیصلہ نہیں ہو گا۔
امریکی ریاست فلوریڈا میں ایک دن میں 15000 نئے کرونا کیسز کا ریکارڈ
امریکی ریاست فلوریڈا میں اتوار کے روز کرونا وائرس کے 15 ہزار پازیٹو کیسز سامنے آئے جو کسی ایک امریکی ریاست کا ایک نیا ریکارڈ ہے۔
اس سے قبل بدھ کے روز کیلی فورنیا میں 11694 مریضوں کے ساتھ کسی ایک ریاست میں ایک دن میں سامنے آنے والے کیسز کا ریکارڈ قائم ہوا تھا۔
فلوریڈا میں اس وقت کوویڈ 19 کے 2 لاکھ 70 ہزار سے زیادہ مریض ہیں جب کہ 4346 اموات ہو چکی ہیں۔
فلوریڈا نے حالیہ ہفتوں میں لاک ڈاؤن کی پابندیوں میں نرمی کی ہے جس میں ڈزنی ورلڈ کے تفریح پارک کھولنا بھی شامل ہے۔
اس وقت دنیا بھر میں کرونا وائرس کے متاثرین کی تعداد ایک کروڑ 30 لاکھ جب کہ اموات پانچ لاکھ 70 ہزارکے قریب پہنچ چکی ہیں۔جانز ہاپکنز کے مرتب کردہ اعداد و شمار کے مطابق دنیا بھر کے ایک چوتھائی متاثرین امریکہ میں ہیں جن کی تعداد 33 لاکھ 77 ہزار سے زیادہ ہے اور ایک لاکھ 37 ہزار سے بڑھ چکی ہیں۔
ہفتے کے روز صدر ٹرمپ پہلی بار ماسک پہنے نظر آئے، یہ وہ دن تھا جب امریکہ میں ساڑھے 66 ہزار پازیٹو کیسز کے ساتھ ایک دن کا نیا ریکارڈ قائم ہوا۔
ہفتے کے روز انہوں نے واشنگٹن کے مضافات میں واقع والٹر ریڈ نیشنل ملٹری میڈیکل سینٹر کا دورہ کیا تھا۔ نامہ نگاروں نے صدر ٹرمپ کو پہلی بار ماسک پہنے دیکھ کر پوچھا تو انہوں نے کہا کہ جب آپ اسپتال میں ہوں تو بہتر ہو گا کہ آپ ماسک پہن لیں۔
جنوبی کیرولائنا میں ہفتے کے روز 2200 سے زیادہ کیسز رپورٹ ہوئے جب کہ ایک اور متاثرہ ریاست لوزیانا میں جمعے کو 2600 سے زیادہ افراد میں کرونا وائرس کی تصدیق ہوئی۔