بھارت میں ایک دن میں ریکارڈ اموات اور کیسز رپورٹ
بھارت میں ایک روز کے دوران کرونا وائرس کے ریکارڈ کیسز اور اموات رپورٹ ہوئی ہیں۔
بھارت کی وزارتِ صحت کی جانب سے جمعرات کو جاری اعداد و شمار کے مطابق ملک بھر میں کرونا وائرس کے 45 ہزار 720 نئے کیسز رپورٹ ہوئے ہیں جب کہ ایک دن میں ایک ہزار 129 مریض ہلاک بھی ہوئے ہیں۔
وزارت صحت کا کہنا ہے کہ تمام کیسز بدھ کو اچانک سامنے آئے ہیں جو کرونا وائرس کے مریضوں کی تعداد میں ہونے والا اچانک اور تیز رفتار اضافہ ہے۔
بھارت میں کرونا وائرس سے متاثرہ افراد کی مجموعی تعداد 12 لاکھ 40 ہزار ہو گئی ہے جب کہ اس وبا کا شکار ہو کر مرنے والوں کی تعداد 29 ہزار 861 تک پہنچ گئی ہے۔
بھارت امریکہ اور برازیل کے بعد دنیا کا تیسرا ملک ہے جہاں کرونا وائرس کے متاثرین کی تعداد سب سے زیادہ ہے۔
میکسیکو کے صدر کا ماسک پہننے سے انکار
میکسیکو کے صدر آندرس مینوئل لوپیز نے کہا ہے کہ اگر ماسک معیشت کی دوبارہ بحالی کے لیے ایک آپشن ہوتا تو میں یقیناً ماسک پہنتا لیکن ایسا نہیں ہے۔ میں ڈاکٹرز اور ماہرین صحت کے مشوروں پر عمل کرتا ہوں۔
آندرس مینوئل کو کرونا وبا کی ابتدا سے ہی عوامی تقریبات میں ماسک پہنے ہوئے نہیں دیکھا گیا حتیٰ کہ رواں ماہ کے شروع میں وہ واشنگٹن بھی گئے تھے جہاں انہوں نے امریکی صدر ڈونلڈ ٹرمپ سے بھی ملاقات کی تھی۔
عالمی ادارہ صحت نے کووڈ 19 سے بچنے کے لیے جہاں دیگر اقدامات اپنانے پر زور دیا ہے وہیں وبائی امراض سے بچنے کے لیے ماسک کو لازمی قرار دیا ہے۔
میکسیکو کے صدر کی عمر 66 برس ہے، اس عمر میں قوت مدافعت کم ہونے کی وجہ سے کسی بھی مرض کے پھیلنے کا خطرہ نسبتاً زیادہ ہوتا ہے۔
پاکستان میں ٹیلی ہیلتھ کا جدید نظام متعارف کرانے کے خواہش مند ڈاکٹرز
امریکہ میں دو پاکستانی نژاد امریکیوں نے اپنی ٹیلی میڈیسن کمپنی، 'وی میڈ' کے تحت جدید ٹیکنالوجی کی مدد سے ایک ایسا سسٹم تیار کیا ہے، جو ایمرجنسی کے مریض کے اسپتال پہنچتے ہی صرف پانچ منٹ میں اس کا متعلقہ شعبے کے ایک ایسے ڈاکٹر سے ٹیلی ہیلتھ اسکرین پر رابطہ کراتا ہے جو اس کے معائنے اور علاج کے لیے پہلے سے موجود اور تیار ہوتا ہے۔
یہ سسٹم اس وقت امریکہ کی مختلف ریاستوں کے لگ بھگ 60 اسپتالوں میں استعمال ہو رہا ہے۔
امریکی ریاست کیلی فورنیا میں کام کرنے والے پاکستانی نژاد ڈاکٹر ارشد علی اور اعجاز عارف ٹیلی میڈیسن کی امریکی کمپنی وی میڈ کے، بالترتیب، سی ای او اور پریذیڈنٹ ہیں۔
ڈاکٹر ارشد نے بتایا کہ اگرچہ کرونا کی وبا کے دوران ٹیلی ہیلتھ اور ٹیلی میڈیسن کی سروس کا استعمال دنیا بھر میں خاص طور پر امریکہ میں بہت بڑھ گیا ہے جس سے کرونا ہی نہیں بلکہ دوسری خطرناک بیماریوں میں مبتلا ہزاروں مریض بھی جلد اور بہترین علاج کی سہولت حاصل کر رہے ہیں۔
کرونا وائرس کی ویکسین بننے میں اتنا وقت کیوں لگ رہا ہے؟
ہر دوا بیماری کے علاج کے لیے بنائی جاتی ہے، لیکن ویکسین اس لحاظ سے منفرد اور اہم ہے کہ وہ بیماری کو لاحق ہونے سے روکتی ہے۔
عالمی ادارہ صحت کے مطابق، دنیا میں 26 بیماریوں کی ویکسینز دستیاب ہیں جبکہ 24 بیماریوں کی ویکسینز پر تحقیق جاری ہے۔ لیکن ان میں کوویڈ نائنٹین کا باعث بننے والے کرونا وائرس کی ویکسین شامل نہیں، کیونکہ اس کا معاملہ سب سے جدا ہے۔
عالمگیر وبا سے اب تک دنیا بھر میں ڈیڑھ کروڑ افراد متاثر ہوچکے ہیں، جبکہ ہلاک ہونے والوں کی تعداد 6 لاکھ سے زیادہ ہے۔ اس قدر نقصان کی وجہ سے سب چاہتے ہیں کہ جلدازجلد اس کی ویکسین بنے اور ماہرین اس بارے میں خوش خبری سنائیں۔