کرونا ٹیسٹ منفی آنے کے بعد محمد عامر انگلینڈ روانہ
پاکستان کرکٹ ٹیم کے فاسٹ بالر محمد عامر انگلینڈ روانہ ہو گئے ہیں۔
محمد عامر کرونا وائرس کے دو ٹیسٹ منفی آنے کے بعد جمعے کی صبح لاہور کے علامہ اقبال انٹرنیشنل ایئرپورٹ سے انگلینڈ کے لیے روانہ ہوئے ہیں جو وہاں پہنچ کر چند روز قرنطینہ میں رہنے کے بعد ٹیم کو جوائن کریں گے۔
محمد عامر کے انگلینڈ میں بھی کرونا وائرس کے دو ٹیسٹ ہوں گے جن کا منفی آنا ضروری ہے۔
یاد رہے کہ محمد عامر نے اپنے بچے کی متوقع ولادت کے باعث دورۂ انگلینڈ سے دست بردار ہونے کا اعلان کیا تھا۔
پاکستان میں مزید 54 اموات، 1209 نئے کیسز بھی رپورٹ
امریکہ: مسلسل تیسرے روز 1000 سے زائد افراد کی ہلاکت
امریکہ میں کرونا وائرس سے جمعرات کو مزید 1000 افراد ہلاک ہو گئے ہیں۔ امریکہ میں مسلسل تیسرے روز ایک ہزار سے زائد اموات رپورٹ ہوئی ہیں۔
کرونا وائرس نے امریکہ کی جنوبی اور مغربی ریاستوں کو بھی اپنی لپیٹ میں لے لیا ہے۔
جمعرات کو ملک بھر میں مجموعی طور پر ایک ہزار 118 اموات ریکارڈ ہوئیں جب کہ اس سے قبل یعنی بدھ کو ایک ہزار 135 اور منگل کو ایک ہزار 141 افراد ہلاک ہوئے تھے۔
امریکہ میں پہلا کیس جنوری میں رپورٹ ہوا تھا جب کہ جمعرات تک متاثرین کی تعداد بڑھتے بڑھتے 40 لاکھ سے تجاوز کر گئی ہے۔
کرونا وائرس ویکسین کی قیمت طے
کرونا وائرس کی ویکسین بنانے کی کوششوں میں مصروف اداروں سے امریکی انتظامیہ کے معاہدے کی وجہ سے دوا کی قیمت طے ہوگئی ہے اور یہ امکان پیدا ہوا ہے کہ کوئی کمپنی ناجائز منافع نہیں کما سکے گی۔
امریکی انتظامیہ نے بدھ کو اعلان کیا تھا کہ وہ فائزر اور بایو این ٹیک کو ایک ارب 95 کروڑ ڈالر دے گی جس کے عوض وہ 5 کروڑ امریکیوں کو اپنی ویکسین فراہم کریں گی۔ اس طرح ایک شخص کی ویکسینیشن کا خرچہ 39 ڈالر آئے گا جو عام فلو کی ویکسین جتنا ہے۔ اس طرح دواساز ادارے مناسب منافع کماسکیں گے۔
فائزر اور بایو این ٹیک کی ممکنہ ویکسین کی تیاری اس ماہ کے آخر میں شروع کی جارہی ہے۔ امریکی انتظامیہ سے معاہدے کرنے والی دوسری کمپنیوں کے برعکس فائزر اور بایو این ٹیک اس وقت تک رقم وصول نہیں کریں گی جب تک ان کی ویکسین محفوظ اور موثر ثابت نہیں ہوجاتی۔