افغانستان: کرونا کے مریض 36 ہزار کے قریب، 24 ہزار سے زائد صحت یاب
افغانستان کی وزارتِ صحت نے گزشتہ 24 گھنٹوں کے دوران 'کووڈ 19' کے 60 نئے کیسز رپورٹ کیے ہیں۔ ملک میں کرونا وائرس کے مریضوں کی کل تعداد 35 ہزار 988 ہو گئی ہے۔
وزارتِ صحت کے مطابق ملک میں وائرس سے مرنے والوں کی تعداد 1225 ہو گئی ہے جب کہ 24 ہزار 573 مریض صحت یاب ہو چکے ہیں۔
افغانستان میں اقوامِ متحدہ کے فلاحی امور کے رابطہ کار دفتر نے افغان حکومت پر زور دیا ہے کہ وہ طبّی عملے کے تحفظ کے لیے موزوں اقدامات کرے۔
کرونا وائرس کے پھیلاؤ میں کوئی کردار نہیں: بل گیٹس
ارب پتی امریکی تاجر اور مائیکرو سافٹ کمپنی کے مالک بل گیٹس نے کہا ہے کہ وبائی مرض کرونا وائرس پھیلاؤ میں اُن کا کوئی کردار نہیں ہے۔ سوشل میڈیا اُن کے خلاف سازشی نظریات پھیلانے میں مصروف ہے۔
بل گیٹس نے جمعرات کو امریکی نشریاتی ادارے 'سی این این' کو دیے گئے ایک انٹرویو میں کہا کہ وبائی مرض کے پھیلنے کے بعد سوشل میڈیا پر ان سے متعلق طرح طرح کی باتیں کی جا رہی ہیں اور ان سازشی نظریات کا ایک طویل سلسلہ جاری ہے۔
انہوں نے کہا کہ سوشل میڈیا فلیٹ فارمز پر ان کے خلاف من گھڑت خبریں، مضامین اور توڑ مروڑ کر بنائی گئی تصاویر ہزاروں بار شیئر کی گئی ہیں۔
بل گیٹس کے بقول متعدد زبانوں میں پیغام رسانی کے لیے استعمال کی جانے والی ایپس کے ذریعے اُنہیں تنقید کا نشانہ بنایا جا رہا ہے اور یہ سلسلہ اسی وقت سے جاری ہے جب سے کرونا وائرس دنیا بھر میں پھیلا ہے۔
بھارت میں ایک روز کے دوران ریکارڈ کیسز
بھارت میں جمعے کو ایک مرتبہ پھر کرونا وائرس کے متاثرین کی تعداد میں اضافہ ہو گیا ہے۔ گزشتہ 24 گھنٹوں کے دوران 49 ہزار 310 نئے کیسز رپورٹ ہوئے ہیں جو یہ ایک دن میں رپورٹ ہونے والے کیسز کی اب تک کی سب سے زیادہ تعداد ہے۔
وفاقی وزارتِ صحت نے جمعے کو بتایا کہ بھارت میں کرونا وائرس سے متاثرہ افراد کی مجموعی تعداد 12 لاکھ 87 ہزار ہو گئی ہے۔
بھارت میں کووڈ 19 کے مریضوں کی تعداد میں مسلسل اضافے کا جمعے کو دوسرا روز ہے۔