پاکستان میں مزید 15 مریض دم توڑ گئے
پاکستان میں گزشتہ چوبیس گھنٹوں میں کرونا وائرس کے شکار مزید 15 مریض دم توڑ گئے جب کہ 615 افراد میں وائرس کی تشخیص ہوئی ہے۔
ملائیشیا اور سنگاپور کی سرحد کاروباری سفر کے لیے کھل گئی
ملائیشیا اور سنگاپور نے لوگوں کی آمد و رفت کے لیے اپنی سرحد محدود پیمانے پر کھول دی ہے۔ یہ بارڈر کرونا وائرس کا پھیلاؤ روکنے کے لیے لگ بھگ پانچ ماہ سے بند تھا۔
سرحد کھلنے کے بعد کاروبار یا کام کے سلسلے میں سفر کرنے والوں کو ملائیشیا سے سنگاپور آنے جانے کی اجازت ہوگی۔ البتہ سیاحوں کے لیے بارڈر بند رہے گا۔
ملائیشیا کے وہ ورکرز جو سنگاپور میں ملازم ہیں، سرحد کھلنے کے بعد وہ بھی اپنے کاموں پر واپس جا سکیں گے۔
ملائیشیا نے کرونا وائرس کا پھیلاؤ روکنے کے لیے مارچ میں لاک ڈاؤن کیا تھا جب کہ سنگاپور نے سات اپریل کو لاک ڈاؤن عائد کیا تھا۔ کرونا کیسز میں کمی کے بعد اب پابندیوں میں نرمی کی جا رہی ہے۔
- By ضیاء الرحمن
پنجاب: لاک ڈاؤن کے خاتمے کے بعد کیسز میں معمولی اضافہ
پاکستان کے صوبے پنجاب کے سیکرٹری ہیلتھ کیپٹن ریٹائرڈ محمد عثمان یونس نے صوبے بھر کے تمام کمشنر اور ریجنل پولیس افسروں کو کرونا وائرس کے قواعد و ضوابط پر عمل کرانے کی سفارش کی ہے۔
عثمان یونس کے مطابق بازاروں اور شاپنگ مالز میں کرونا ایس او پیز پر عمل درآمد نہیں ہو رہا جب کہ خریداری کے لیے آنے والے افراد نہ ماسک پہن رہے ہیں اور نہ ہی سماجی فاصلے کا خیال رکھا جا رہا ہے۔
وائس آف امریکہ سے گفتگو کرتے ہوئے سیکرٹری ہیلتھ نے بتایا کہ لاک ڈان کے دوران کرونا کے مثبت کیسوں کی شرح ایک اعشاریہ پانچ فی صد تھی جو اب دو اعشاریہ پانچ فی صد ہو گئی ہے۔
عثمان یونس نے کہا کہ محکمۂ صحت روزانہ کی بنیاد پر صوبے میں کرونا کیسوں کی نگرانی کر رہا ہے۔ اگرچہ صوبے بھر میں کرونا کیسوں کی تعداد میں کمی دیکھنے میں آ رہی ہے لیکن اگر احتیاط نہ کی گئی تو آئندہ دس سے پندرہ دنوں میں کرونا کیسز میں اضافہ ہو سکتا ہے۔
محکمۂ صحت پنجاب نے انتظامیہ اور پولیس کو خبردار کرتے ہوئے کہا ہے کہ اگر مناسب اقدامات نہ کیے گئے تو صورتِ حال بگڑ سکتی ہے۔
سرکاری اعداد و شمار کے مطابق پنجاب میں کرونا وائرس کے کیسز کی مجموعی تعداد 95 ہزار سے زیادہ ہے اور اس وبا سے اب تک 2182 اموات ہوئی ہیں۔
اٹلی: نوجوان افراد میں کرونا پھیلنے پر نائٹ کلبس بند کرنے کا اعلان
اٹلی میں کووڈ-19 سے نوجوان افراد کی بڑی تعداد کے متاثر ہونے کے بعد حکام نے نائٹ کلبس بند کرنے کا اعلان کیا ہے۔
اعداد و شمار کے مطابق پچھلے ہفتے نئے کیسز کی تعداد تین ہفتے پہلے رجسٹرڈ ہونے والے مریضوں کی تعداد سے دو گنا ہو گئی ہے۔ اس بار یہ مرض 40 سال سے کم عمر افراد کو نشانہ بنا رہا ہے۔
موجودہ صورتِ حال کے پیش نظر مرض پر قابو پانے کے لیے اٹلی میں قائم تمام ڈسکو کلبس بند کیے جارہے ہیں جب کہ رات کے اوقات میں ماسک پہننا بھی لازمی قرار دے دیا گیا ہے۔
نئے قواعد پر پیر سے عمل درآمد شروع ہو گا۔ ان قواعد کے تحت ان تمام افراد کے لیے شام چھ بجے سے صبح چھ بجے تک ماسک پہننا لازمی ہو گا جو نائٹ کلبس یا شراب خانوں کے قریب رہتے ہیں کیوں کہ رات کے اوقات میں یہاں خاصا رش رہتا ہے۔
اٹلی کی حکومت نے تمام تر تنقید کے باوجود اب تک نائٹ کلبس یا شراب خانے بند نہیں کیے تھے جس کے سبب یہاں آنے والے نوجوانوں نے نہ تو سماجی دوری کا خیال رکھا اور نہ ہی ماسک پہننا ضروری سمجھا۔
اٹلی میں کرونا وائرس کا پہلا کیس 21 فروری کو رپورٹ ہوا تھا تب سے اب تک وہاں اس مرض سے مرنے والوں کی مجموعی تعداد 35 ہزار سے زائد ہو چکی ہے۔