چین کا فٹ بال میچ میں تماشائیوں کو شرکت کی اجازت دینے پر غور
چین میں کرونا وائرس کے بعد کھیلوں کی سرگرمیاں دوبارہ شروع ہونے جا رہی ہیں۔ اس حوالے سے 'چائنیز سپر لیگ' کے تحت ہفتے کو پہلا فٹ بال میچ ہو گا۔
لیگ کی انتظامیہ نے اس میچ میں محدود تماشائیوں کو اسٹیڈیم میں جانے کی بھی اجازت دینے پر غور شروع کر دیا ہے۔
اگر تماشائیوں کو اسٹیڈیم میں جانے کی اجازت ملتی ہے تو یہ میچ کرونا وائرس کے پھیلاؤ کے بعد پہلا میچ ہو گا جس میں تماشائی شرکت کریں گے۔
چائنیز سپر لیگ 25 جولائی سے تماشائیوں کی شرکت کے بغیر، بند دروازوں میں کھیلی جا رہی ہے۔
ہفتے کو ہونے والے فٹ بال میچ میں تماشائیوں کی شرکت سے آئندہ ہونے والے میچز میں بھی تماشائیوں کی شرکت کی راہ ہموار ہو سکے گی۔
نیوزی لینڈ میں کرونا وائرس کے مزید پانچ کیسز رپورٹ
نیوزی لینڈ میں جمعرات کو کرونا وائرس کے مزید پانچ نئے کیسز رپورٹ ہوئے ہیں۔ اس سے ایک روز پہلے چھ نئے تصدیق شدہ کیسز سامنے آئے تھے۔
نیوزی لینڈ میں عالمی وبا کے نئے کیسز سامنے آنے کے بعد کیسز کی مجموعی تعداد 1300 سے تجاوز کر گئی ہے جب کہ 22 افراد اب تک ہلاک ہوئے ہیں۔
نیوزی لیںڈ میں اب بھی فعال کیسز کی تعداد 101 ہے جب کہ ملک کا سب سے بڑے شہر آکلینڈ میں وائرس کی دوسری لہر سے نمٹنے کے لیے ہر ممکن کوششیں کی جا رہی ہیں۔
گزشتہ ہفتے آکلینڈ میں وبائی مرض سے متاثرین کی تعداد میں اچانک اضافہ ہو گیا تھا جس کے بعد 17 لاکھ آبادی والے اس شہر میں سخت پابندیاں عائد کر دی گئی تھیں۔
پاکستان میں 8 مریض دم توڑ گئے، 513 کیسز رپورٹ
پاکستان میں گزشتہ چوبیس گھنٹوں کے دوران کرونا وائرس کے شکار مزید آٹھ مریض دم توڑ گئے ہیں جب کہ 513 نئے کیسز رپورٹ ہوئے ہیں۔
سرکاری اعداد و شمار کے مطابق ملک بھر میں ہلاکتوں کی تعداد چھ ہزار 200 سے تجاوز کر گئی ہے جب کہ 725 مریضوں کی حالت تشویش ناک ہے۔
حکام کا کہنا ہے کہ ملک بھر میں اب تک دو لاکھ 90 ہزار سے زیادہ کیسز رپورٹ ہو چکے ہیں جن میں سے دو لاکھ 72 ہزار سے زیادہ مریض صحت یاب ہو گئے ہیں۔
بھارت میں یومیہ ریکارڈ کیسز رپورٹ
بھارت میں گزشتہ چوبیس گھنٹوں کے دوران 69 ہزار 652 کیسز رپورٹ ہوئے ہیں۔ بھارت میں ایک روز میں رپورٹ ہونے والے کیسز کی یہ ریکارڈ تعداد ہے۔
بھارت کے محکمۂ صحت کے مطابق کرونا وائرس کے شکار مزید 977 مریض دم توڑ گئے ہیں جس کے بعد ملک بھر میں عالمی وبا کا شکار ہو کر مرنے والوں کی کل تعداد 53 ہزار 866 تک پہنچ گئی ہے۔
بھارت ایشیا کا کرونا وائرس سے سب سے زیادہ متاثرہ ملک ہے جب کہ عالمی سطح پر کیسز کے اعتبار سے امریکہ اور برازیل کے بعد تیسرا متاثرہ ملک ہے۔