بھارت میں کیسز کی تعداد 32 لاکھ سے تجاوز کر گئی
بھارت میں بدھ کو مسلسل آٹھویں روز کرونا وائرس کے 60 ہزار سے زائد کیسز رپورٹ ہوئے ہیں جس کے بعد کووڈ-19 کے متاثرین کی مجموعی تعداد 32 لاکھ سے تجاوز کر گئی ہے۔
وفاقی وزارتِ صحت کے جاری کردہ اعداد و شمار کے مطابق گزشتہ 24 گھنٹوں کے دوران 1059 اموات ہوئیں جس کے بعد کرونا وائرس سے ہلاکتوں کی مجموعی تعداد 59 ہزار سے زیادہ ہو گئی ہے۔
کرونا وائرس سے متاثرہ ملکوں کی عالمی فہرست میں بھارت کا تیسرا نمبر ہے۔ امریکہ اور برازیل بدستور پہلے اور دوسرے سب سے زیادہ متاثرہ ملک ہیں۔
پاکستان میں 400 سے زیادہ نئے کیسز رپورٹ
پاکستان میں گزشتہ چوبیس گھنٹوں کے دوران کرونا وائرس کے شکار مزید 12 مریض دم توڑ گئے ہیں جب کہ 400 سے زیادہ افراد میں وائرس کی تشخیص ہوئی ہے۔
پنجاب کے چھ شہروں کے مختلف علاقوں میں مائیکرو اسمارٹ لاک ڈاؤن نافذ
پاکستان کے صوبے پنجاب کی حکومت نے چھ شہروں کے مختلف علاقوں میں کرونا کیسز کی روک تھام کے سلسلے میں مائیکرو اسمارٹ لاک ڈاؤن نافذ کر دیا ہے۔
محکمۂ صحت پنجاب نے لاہور، گوجرانوالہ، گجرات، سیالکوٹ، راولپنڈی اور اٹک کے مخصوص علاقوں کو بند کیا ہے۔
لاہور میں جوہر ٹاؤن، پی آئی اے سوسائٹی، بابر گلی، کلفٹن ٹاؤن، واحد روڈ، نشاط کالونی، سعید پارک، ابوبکر معصوم شاہ، منگل اسٹریٹ اور لاہوری گیٹ میں مائیکرو اسمارٹ لاک ڈاؤن کیا ہے۔
محکمۂ صحت پنجاب کی فہرست کے مطابق گوجرانوالہ میں محلہ قدرت آباد، گلی شاہ سیلمان، چوہدری نصیر والی، فرید ٹاؤن اور محلہ علی پارک کو بند کیا گیا ہے۔
سیکرٹری صحت کے مطابق مائیکرو اسمارٹ لاک ڈاؤن کا مقصد کرونا کیسز والے علاقوں سے لوگوں کی آمدورفت کو محدود کرنا ہے۔
دنیا کے تیز ترین انسان یوسین بولٹ کا کرونا ٹیسٹ مثبت
دنیا کے تیز ترین انسان یوسین بولٹ کا کرونا وائرس کا ٹیسٹ مثبت آ گیا ہے جس کے بعد انہوں نے خود کو الگ تھلگ کر لیا ہے۔
جمیکا سے تعلق رکھنے والے یوسین بولٹ نے چند روز قبل ہی اپنی 34ویں سالگرہ منائی ہے جس کے لیے انہوں نے ایک بڑی پارٹی کا انعقاد کیا تھا۔ اس پارٹی میں چہرے پر ماسک پہننے یا سماجی دوری کی احتیاط کا بھی کوئی خیال نہیں رکھا گیا تھا۔
آٹھ مرتبہ اولمپک گولڈ میڈل جیتنے والے یوسین بولٹ نے پیر کو سوشل میڈیا پر اپنی پوسٹ میں مداحوں کو بتایا تھا کہ انہوں نے اپنا کرونا ٹیسٹ کرایا ہے جس کے نتیجے کا انتظار ہے۔
پیر کی شب جمیکا کی وزارتِ صحت نے تصدیق کی کہ یوسین بولٹ کا کرونا ٹیسٹ مثبت آیا ہے۔
کرونا ٹیسٹ مثبت آنے کے بعد یوسین بولٹ نے خود کو قرنطینہ کر لیا ہے اور ان کے مداحوں کی جانب سے نیک تمناؤں کا اظہار کیا جارہا ہے جب کہ بعض افراد یوسین بولٹ میں وائرس کی تشخیص کو ان کی لاپرواہی کی وجہ قرار دے رہے ہیں۔