پاکستان میں چھ اموات، 445 نئے کیسز رپورٹ
بھارت میں یومیہ ریکارڈ 75 ہزار سے زیادہ کیسز رپورٹ
بھارت میں گزشتہ چوبیس گھنٹوں کے دوران کرونا وائرس کے 75 ہزار 760 نئے کیسز رپورٹ ہوئے ہیں جو ایک روز کے دوران کیسز کی سب سے زیادہ تعداد ہے۔
کرونا وائرس سے متاثرین کے حالیہ اضافے کے ساتھ ہی بھارت میں کیسز کی کل تعداد 33 لاکھ سے زیادہ ہو گئی ہے۔
بھارت میں گزشتہ 24 گھنٹوں کے دوران وبا کے شکار 1023 مریض ہلاک ہوئے ہیں جس کے بعد ہلاکتوں کی کل تعداد 60 ہزار 472 ہو گئی ہے۔
وبا کے پھیلاؤ کا خدشہ: جنوبی کوریا کی پارلیمنٹ بند
جنوبی کوریا میں کرونا وائرس سے متاثرہ 400 سے زائد نئے کیسز سامنے آنے کے بعد پارلیمنٹ کو وائرس کے خدشات کے پیش نظر بند کر دیا گیا ہے۔ اراکینِ پارلیمنٹ بھی قرنطینہ میں چلے گئے ہیں۔
جمعرات کو 441 نئے کیسز رپورٹ ہوئے ہیں جن میں سے بیشتر کا تعلق دارالحکومت سیول سے ہے۔
جنوبی کوریا میں چھ ماہ بعد کرونا وائرس کے کیسز کی یہ بلند ترین شرح ہے۔
جنوبی کوریا کرونا وائرس پر قابو پانے سے پہلے بدترین صورتِ حال کا سامنا کر چکا ہے۔ گو کہ اسے اب بھی وبا کے خلاف جنگ میں خاصے مسائل کا سامنا ہے تاہم یہ مجموعی طور پر ابتدائی دنوں جیسی صورتِ حال نہیں ہے۔
فرانس: نومبر میں کرونا وائرس کی دوسری لہر کا خدشہ
فرانس میں ماہِ نومبر میں کرونا وائرس کی دوسری لہر آنے کا خدشہ ظاہر کیا گیا ہے۔
اس خدشے کا اظہار بدھ کو وبائی امور سے متعلق حکومت کو مشورہ دینے والی سائنسی کونسل کے سربراہ پروفیسر ژان فرانسوئس ڈیلفریسی نے 'فرانس ٹو' ٹیلی ویژن کو انٹرویو کے دوران کیا۔
اُن کے بقول وبائی مرض سے نمٹنے کے لیے مارسیلی شہر میں پابندیاں سخت کی جارہی ہیں۔
شہری حکام نے منگل کو رات گئے ایک بیان میں کہا تھا کہ ریستورانوں اور بارز کو مختصر وقت کے لیے کھولا جائے گا جب کہ 26 اگست سے 30 ستمبر تک تمام افراد کو لازمی طور پر ماسک پہننا ہو گا۔
فرانس دنیا کا ساتواں ملک ہے جہاں کووڈ 19 سے اب تک سب سے زیادہ ہلاکتیں ہو چکی ہیں۔
فرانسیسی وزارتِ صحت نے منگل کو تین ہزار سے زیادہ نئے کیسز کی تصدیق کی اور بتایا ہے کہ اس مرض سے اب تک 30 ہزار 544 اموات ہو چکی ہیں۔