کرونا وائرس سے ہونے والی ہلاکتوں کے لحاظ سے کون سا ملک کس نمبر پر ہے؟
کرونا سے خائف بھارتیوں نے نجومیوں سے رابطے بڑھا لیے
بھارت میں کرونا وائرس سے ڈرے ہوئے بہت سے افراد نے اپنی قسمت کا حال جاننے اور مستقبل سے آگاہی کے لیے نجومیوں کے پاس جانا شروع کر دیا ہے۔
ماہر فلکیات ہوں یا روحانی علاج کرنے والے، صوفی ہوں یا پھر قسمت کا حال بتانے والے ماہر نجوم یا جوتشی، سب کے پاس لمبی قطاریں لگی ہوئی ہیں۔
ستاروں کے ذریعے قسمت کا حال بتانے والے ایک نجومی سنجے شرما کا کہنا ہے کہ لوگ اپنے مستقبل سے ڈرے ہوئے ہیں، اس لیے وہ اپنی قسمت کا حال جاننے کے لیے ان کے پاس آتے ہیں۔
سنجے شرما کا کہنا ہے کہ لوگ یہ جاننا چاہتے ہیں کہ کہیں وہ کرونا وائرس کا شکار تو نہیں ہو جائیں گے؟ اگر کرونا کی وبا مزید پھیلی تو ان کا کیا ہو گا؟ ملازمت برقرار رہے گی یا نہیں؟ نئی نوکری کب ملے گی؟
ان کے بقول لوگ اس بارے میں خوفزدہ ہیں کہ عالمی وبا کے دوران اُن کا کاروبار جاری رہے گا یا ختم ہو جائے گا؟ وبا کی وجہ سے جو کاروبار مندی کا شکار ہوا ہے، وہ دوبارہ کب پھلے پھولے گا؟ مالی بحران کب ختم ہو گا اور انہیں ذہنی آسودگی اور راحت کب میسر ہو گی۔
بھارت میں کیسز کا نیا ریکارڈ
بھارت میں گزشتہ چوبیس گھنٹوں کے دوران کرونا وائرس کے 77 ہزار سے زیادہ کیسز رپورٹ ہوئے ہیں۔ ایک روز کے دوران رپورٹ ہونے والے یہ ریکارڈ کیسز ہیں۔
بھارت میں مسلسل دوسرے روز ریکارڈ کیسز سامنے آئے ہیں۔ ملک بھر میں کیسز کی مجموعی تعداد 33 لاکھ 50 ہزار سے زیادہ ہو گئی ہے۔
بھارت میں سات اگست کے بعد سے متاثرین کی یومیہ تعداد میں ہر روز اضافہ ہو رہا ہے اور اب تک 61 ہزار 529 مریض ہلاک ہو چکے ہیں۔
امریکہ میں اموات کی تعداد ایک لاکھ 80 ہزار سے تجاوز کر گئی
امریکہ میں کرونا وائرس سے مرنے والوں کی تعداد ایک لاکھ 80 ہزار سے تجاوز کر گئی ہے۔
جمعرات کو امریکہ کی متعدد وسطی ریاستوں آئیووا، منیسوٹا، نارتھ ڈکوٹا اور ساؤتھ ڈکوٹا میں وبائی مرض سے ایک دن کے دوران ہونے والی ہلاکتوں میں ریکارڈ اضافہ نوٹ کیا گیا ہے۔
دوسری جانب حکام نے اسکول کھلنے کے بعد اس تعداد میں اضافے کا خدشہ ظاہر کیا ہے۔
امریکہ میں اب تک 58 لاکھ سے زیادہ کیسز رپورٹ ہو چکے ہیں۔ کرونا وائرس سے متاثرہ ملکوں کی فہرست میں اموات اور کیسز کے اعتبار سے امریکہ سرِفہرست ہے۔