اسرائیل: کرونا وائرس کے باعث دوبارہ لاک ڈاؤن
اسرائیل میں کرونا وائرس کی دوسری لہر کے باعث ملک بھر میں تین ہفتوں کے لیے لاک ڈاؤن نافذ کر دیا ہے۔ لاک ڈاؤن سے قبل اسرائیل میں کیسز کی یومیہ تعداد تقریباً پانچ ہزار تک پہنچ گئی تھی۔ ملک بھر میں پھیلنے والے وائرس سے سب سے زیادہ انتہائی قدامت پسند فرقوں کے یہودی اور عرب اسرائیلی متاثر ہوئے ہیں۔
فلمی سرگرمیوں کی مکمل بحالی کے لیے ہالی وڈ یونینز اور فلم اسٹوڈیوز میں معاہدہ
کرونا وائرس کے سبب ہالی وڈ انڈسٹری کو بڑے پیمانے پر نقصانات اور مشکلات کا سامنا ہے۔ فلمی سرگرمیاں اب تک مکمل طور پر بحال نہیں ہو سکیں۔ پروڈکشن تاحال معطل ہے اور تیار شدہ فلموں کی ریلیز بھی التوا کا شکار ہے۔
اس صورتِ حال میں ایک خوش کُن خبر یہ ہے کہ ہالی وڈ کی سرِ فہرست تمام بڑی یونینز اور فلم اسٹوڈیوز کے مابین کرونا وائرس سے متعلق حفاظتی اقدامات پر عمل درآمد کے لیے معاہدہ طے پا گیا ہے۔
اس اقدام سے نہ صرف یونینز کی دوبارہ کام پر واپسی کا امکان ہے بلکہ پروڈکشن بھی شروع ہو سکے گی۔
ہالی وڈ یونینز اور اسٹوڈیوز کے درمیان کئی ماہ سے کرونا وائرس ٹیسٹ، اس سے متعلق آلات اور دیگر ساز و سامان کی فراہمی اور تنخواہوں سے متعلق معاملات تعطل کا شکار تھے تاہم امید کی جا رہی ہے کہ اس معاہدے کے بعد یہ تعطل دور ہو جائے گا۔
پاکستان میں انسدادِ پولیو مہم کو درپیش مشکلات
پاکستان میں 1994 سے جاری انسدادِ پولیو کی کوششوں کے باوجود جہاں مزید کیسز سامنے آنے کا سلسلہ جاری ہے، وہیں پولیو کے قطرے پلانے والے رضاکاروں کے لیے چیلنجز بھی بڑھ رہے ہیں۔ کرونا وائرس کی جاری وبا نے ان ورکرز کی مشکلات مزید بڑھا دی ہیں۔ مزید جانیے نذر الاسلام کی اس رپورٹ میں
اقوامِ متحدہ وائرس پھیلانے پر چین کو انصاف کے کٹہرے میں لائے: صدر ٹرمپ
امریکہ کے صدر ٖڈونلڈ ٹرمپ نے کہا ہے کہ چین نے کرونا وائرس کے متعلق دنیا کو گمراہ کیا۔ انہوں نے اقوامِ متحدہ پر زور دیا کہ وہ چین کو اس مہلک وبا کے پھیلاؤ کے سلسلے میں انصاف کے کٹہرے میں لائے۔
اقوامِ متحدہ کی جنرل اسمبلی سے آن لائن خطاب میں صدر ڈونلڈ ٹرمپ نے کہا کہ چین نے وبا کے پھوٹنے کے بعد اندرونِ ملک پروازیں روک دیں تھیں۔ لیکن بین الاقوامی پروازوں کا سلسلہ جاری رکھا تا کہ وائرس کو دنیا میں پھیلنے کا موقع مل سکے۔
انہوں نے کہا کہ چین اور عالمی ادارۂ صحت نے غلط بیانی سے کام لیتے ہوئے شروع میں کہا کہ یہ وائرس ایک انسان سے دوسرے انسان تک منتقل نہیں ہوتا۔
صدر ٹرمپ کی انتظامیہ کو امریکہ میں کرونا وائرس کا پھیلاؤ روکنے کے اقدامات پر شدید تنقید کا سامنا کرنا پڑ رہا ہے۔ اس وقت دنیا بھر میں اس مہلک وائرس کے سب سے زیادہ مستند کیسز امریکہ میں ہیں جن کی تعداد 69 لاکھ کے لگ بھگ ہے۔ جب کہ دنیا بھر میں وائرس سے سب سے زیادہ اموات بھی امریکہ میں ہوئی ہیں جو دو لاکھ کے قریب ہیں۔
صدر ٹرمپ کا کہنا تھا کہ ہم ویکسین تیار کر رہے ہیں۔ ہم ویکسین تقسیم کریں گے۔ وائرس کو شکست دیں گے اور ملک کو خوش حال بنائیں گے۔