بھارت میں کرونا کیسز کی تعداد 60 لاکھ سے بڑھ گئی
بھارت میں کرونا وائرس کے متاثرین کی تعداد 60 لاکھ سے تجاوز کر گئی ہے۔
بھارت کی وزارتِ صحت کے اعداد و شمار میں بتایا گیا ہے کہ پچھلے 24 گھنٹوں کے دوران 82 ہزار 170 نئے کیسز سامنے آئے ہیں جب کہ کرونا کے شکار ایک ہزار 39 مریض دم توڑ گئے ہیں۔
بھارت میں کرونا سے ہلاکتوں کی کُل تعداد 95 ہزار 542 جا پہنچی ہے جب کہ 60 لاکھ 74 ہزار 702 کیسز رپورٹ ہو چکے ہیں۔
یونان: پناہ گزینوں کے کیمپ میں کرونا وائرس سے پہلی ہلاکت
یونان میں کرونا وائرس سے پناہ گزین کیمپ میں مقیم ایک شخص ہلاک ہو گیا۔ 68 سالہ افغانی پناہ گزین دو بچوں کا باپ تھا اور دارالحکومت ایتھینز کے شمال میں مالاکاسا مہاجر کیمپ میں رہائش پذیر تھا۔
کووڈ کی تشخیص کے بعد متاثرہ شخص ایتھینز کے اسپتال میں زیرِ علاج تھا۔
یونان میں رواں برس فروری میں کرونا وائرس کا پہلا کیس سامنے آیا تھا۔ تب سے اب تک متاثرہ افراد کی تعداد 17 ہزار 444 ہو گئی ہے۔
سرد موسم اور محدود تماشائیوں کی موجودگی میں فرینچ اوپن کا آغاز
ٹینس کی دنیا میں صف اول کے ٹورنامنٹ میں شمار کیا جانے والا فرینچ اوپن ٹینس ٹورنامنٹ چند تماشائیوں کی موجودگی میں شروع ہو گیا۔
اتوار کو کھیلے جانے والے میچ میں الیون سیڈ ڈیوڈ گوفن کا مقابلہ اٹلی کے جینک سائنر کے ساتھ ہوا، اس دوران چند تماشائی ہی اسٹینڈز میں موجود تھے۔
فرینچ اوپن ٹورنامنٹ کے دوران ٹکٹ کے خواہش مندوں کی لمبی قطاریں اور ہلہ گلہ اس میگا ایونٹ کی رونقیں دوبالا کر دیتا تھا، لیکن رواں سال کرونا وبا کی وجہ سے یہ تمام رونقیں ماند پڑ گئیں۔
فرینچ اوپن کا انعقاد رواں سال مئی جون میں ہونا تھا، لیکن کرونا وبا کی وجہ سے اسے ملتوی کر کے 27 ستمبر سے 11 اکتوبر کے درمیان شیڈول کیا گیا۔ تاہم موسم خزاں کی آمد کے ساتھ ہی فرانس سمیت یورپ کے کئی ملکوں میں موسم سرد ہو رہا ہے۔
آسٹریلیا: ریاست وکٹوریا میں پابندیوں میں نرمی کا اعلان
آسٹریلیا میں کرونا وائرس کا گڑھ سمجھی جانی والی ریاست وکٹوریا میں یومیہ کیسوں کی تعداد میں کمی کے بعد پابندیاں نرم کرنے کا اعلان کیا گیا ہے۔
اسٹیٹ پریمیئر ڈینئل اینڈریوز نے اتوار کو اعلان کیا ہے کہ کرونا وائرس کے پھیلاؤ کو روکنے کے لیے نافذ کردہ پابندیاں ختم کی جارہی ہیں جن میں رات کے اوقات میں کرفیو بھی شامل تھا۔
صحافیوں سے گفتگو میں اینڈریوز کا کہنا تھا کہ انہوں نے توقعات سے پہلے وبا پر قابو پا لیا ہے تاہم ان کے بقول اس کا مطلب یہ نہیں کہ وبا ختم ہو گئی ہے۔
حکومتی اعلان کے بعد پیر سے ایک لاکھ 27 ہزار ورکرز اپنے روزگار پر واپس جاسکیں گے۔
دوسری طرف آسٹریلیا کی سب سے گنجان آباد ریاست ساؤتھ ویلز میں تین ماہ سے زیادہ عرصے کے بعد اتوار کو کرونا وائرس کا کوئی کیس رپورٹ نہیں ہوا۔
آسٹریلیا میں اس وبا سے 27 ہزار سے زائد افراد متاثر اور 872 اموات ہوئی ہیں۔