بھارت میں متاثرہ افراد کی تعداد 70 لاکھ سے تجاوز
امریکہ کے بعد کرونا وائرس سے سب سے زیادہ متاثرہ ملک بھارت میں وبا سے متاثرہ افراد کی تعداد 70 لاکھ سے تجاوز کر گئی ہے۔
حکام نے وبا سے اب تک ایک لاکھ 7 ہزار 416 افراد کے ہلاک ہونے کی تصدیق کی ہے۔
وزارتِ صحت کے اعداد و شمار کے مطابق 24 گھنٹوں کے دوران مزید 73 ہزار سے زائد افراد کے وائرس سے متاثرہ ہونے کی تصدیق ہوئی ہے۔
سرکاری اعداد و شمار کے مطابق جمعے کو بھارت میں وبا کے سبب 926 افراد ہلاک ہوئے ہیں۔
بھارت میں گزشتہ ماہ کے یومیہ 90ہزار سے زائد کیسز رپورٹ ہر رہے تھے۔ تاہم رواں ماہ یومیہ رپورٹ ہونے والے کیسز کی تعداد میں قدرے کمی آئی ہے۔
ماہرینِ صحت نے خبردار کیا ہے کہ رواں ماہ ہونے والے مذہبی اجتماعات کے باعث کرونا وائرس کے کیسز میں دوبارہ اضافہ ہو سکتا ہے۔
کرونا وائرس سے بچاؤ کے لیے ماسک والی شرٹیں
اگر آپ ماسک لگانا یا کہیں باہر جاتے ہوئے ماسک ساتھ رکھنا بھول جاتے ہیں تو ہماری یہ رپورٹ آپ کے لیے ہے۔ جنوبی افریقہ کے ایک ٹیٹو آرٹسٹ نے کپڑوں کے ڈیزائنرز کے ساتھ مل کر ایک ایسی شرٹ بنائی ہے جس میں ماسک شرٹ کے ساتھ ہی سلا ہوا ہے۔ کیا یہ شرٹ کرونا وائرس سے بچاؤ میں بھی مؤثر ہے؟ جانیے اس رپورٹ میں
پاکستان میں مزید 671 افراد متاثر، چھ اموات
پاکستان میں کرونا وائرس سے گزشتہ 24 گھنٹوں میں مزید 671 افراد متاثر ہوئے ہیں۔ جب کہ حکام نے 6 افراد کی ہلاکت کی تصدیق کی ہے۔
سرکاری اعداد و شمار کے مطابق پاکستان میں اب تک 3 لاکھ 18 ہزار 266 افراد وبا سے متاثر ہو چکے ہیں۔ جن میں سے 3 لاکھ 3 ہزار 62 افراد صحت یاب ہوئے ہیں۔
ملک بھر میں اب بھی 8 ہزار 646 افراد زیرِ علاج ہیں۔
حکام کے مطابق زیرِ علاج افراد میں 475 افراد انتہائی نگہداشت میں ہیں۔
خیال رہے کہ وبا سے پاکستان میں اب تک 6558 افراد کی ہلاکت کی تصدیق کی گئی ہے۔
حکام کے مطابق پاکستان میں کرونا سے متاثر افراد کی تصدیق کے لیے 38 لاکھ 28 ہزار952 ٹیسٹ کیے جا چکے ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں 33ہزار 665 ٹیسٹ کیے گئے ہیں۔
بھارت میں 70 ہزار سے زائد نئے کیسز، مجموعی مریض 69 لاکھ سے زیادہ
بھارت میں کرونا وائرس کے کیسز کی تعداد میں 70 ہزار 400 سے زائد کیسز کا مزید اضافہ ہوا ہے جو جمعرات کو سامنے آئے ہیں۔ نئے کیسز کے بعد ملک میں کووڈ 19 سے متاثرہ افراد کی کل تعداد 69 لاکھ چھ ہزار سے زیادہ ہو گئی ہے۔
بھارت میں کرونا وائرس سے ہونے والی ہلاکتیں بھی ایک لاکھ چھ ہزار سے زائد ہیں۔ بھارت، امریکہ کے بعد دنیا بھر میں کرونا سے سب سے زیادہ متاثر ہونے والا ملک ہے۔