امریکہ میں کرونا سے مجموعی ہلاکتیں دو لاکھ 43 ہزار سے زائد ہیں: سی ڈی سی
امریکہ میں صحتِ عامہ کے نگران ادارے سینٹر فار ڈیزیز کنٹرول (سی ڈی سی) کی ہفتے کو جاری کردہ رپورٹ کے مطابق ایک کروڑ 6 لاکھ 90 ہزار 665 امریکی اب تک کرونا وائرس کا شکار ہو چکے ہیں۔
رپورٹ کے مطابق امریکہ میں اب تک اس عالمی وبا سے دو لاکھ 43 ہزار 580 اموات رپورٹ ہو چکی ہیں۔
خبر رساں ادارے 'رائٹرز' کے مطابق امریکی ریاست نارتھ ڈکوٹا کے حکام نے ماسک کا استعمال لازمی قرار دے دیا ہے۔ نارتھ ڈکوٹا 35 ویں امریکی ریاست ہے جہاں عوامی مقامات پر بھی ماسک کا استعمال لازمی قرار دیا گیا ہے۔
خیال رہے کہ امریکہ دنیا بھر میں اس وبا سے سب سے زیادہ متاثرہ ملک ہے۔ جس کے بعد دوسرے نمبر پر جنوبی ایشیائی ملک بھارت ہے۔
پاکستان میں مزید 32 اموات، 2400 سے زائد نئے کیس رپورٹ
پاکستان میں کرونا وائرس کی دوسری لہر میں شدت آتی جا رہی ہے اور اتوار کو ملک بھر میں گزشتہ 24 گھنٹوں کے دوران کرونا کے مزید 2443 کیسز رپورٹ جب کہ اس مہلک وائرس کے باعث 32 افراد ہلاک ہو گئے ہیں۔
سرکاری اعدادوشمار کے مطابق وبا کے باعث مجموعی ہلاکتوں کی تعداد سات ہزار 141 ہو گئی ہے۔
پاکستان میں اب تک تین لاکھ 56 ہزار سے زائد افراد اس وبا کا شکار ہو چکے ہیں۔ پاکستان میں تین لاکھ 23 ہزار سے زائد افراد اس مرض سے صحت یاب ہو چکے ہیں جب کہ اب تک 49 لاکھ سے زائد کرونا ٹیسٹ کیے جا چکے ہیں۔
جرمنی: کرونا ویکسین سب سے پہلے نرسنگ ہومز میں فراہم کی جائے گی
یورپی ملک جرمنی کی چانسلر انجیلا مرکل کا کہنا ہے کہ جرمنی میں کرونا ویکسین سب سے پہلے نرسنگ ہومز میں رہائش پذیر افراد اور وہاں خدمات فراہم کرنے والے اہلکاروں کو دی جائے گی۔
ہفتے کو ہفتہ وار خطاب میں انجیلا مرکل کا کہنا تھا کہ کرونا ویکیسین دستیاب ہونے پر نرسنگ ہومز کے لوگوں کو فوقیت حاصل ہو گی۔
خیال رہے کہ جرمنی میں لگ بھگ 10 لاکھ لوگ نرسنگ اور کیئر ہومز میں رہتے ہیں۔
جرمنی فارما سوٹیکل کمپنی ‘بائیو این ٹیک’ اور امریکی کمپنی ‘فائزر’ کی تیار کردہ ویکسین کی 10 کروڑ ڈوز خریدنے کا ارادہ رکھتی ہے۔
جرمنی میں اب تک 7 لاکھ 73 ہزار سے زائد افراد میں کرونا وائرس کی تشخیص ہو چکی ہے۔ جب کہ اس وبا کے باعث 12 ہزار سے زائد اموات رپورٹ ہوئی ہیں۔
اٹلی میں یومیہ کیسز میں اضافے کے باعث پابندیاں سخت کرنے کا فیصلہ
یورپ کے ملک اٹلی میں کرونا وائرس کے پھیلاؤ کو روکنے کے لیے متعدد علاقوں میں پابندیاں نافذ کی جا رہی ہیں۔ جب کہ دو شہروں ٹسکنی اور کمپینیا کو ریڈ زون قرار دے دیا گیا ہے۔
وزارتِ صحت کے مطابق 24 گھنٹوں میں مزید 40 ہزار 902 افراد کرونا سے متاثر ہوئے۔ جس کے بعد اٹلی میں اس وبا سے متاثرہ افراد کی تعداد 11 لاکھ سے تجاوز کر گئی ہے۔
امریکہ کی 'جان ہاپکنز یونیورسٹی' کے مطابق اٹلی میں اس وبا سے ہلاکتوں کی تعداد 44 ہزار سے زائد ہو چکی ہے۔