کرونا وائرس کی مؤثر ویکسین تیار کر لی، موڈرنا بائیو ٹیک کا اعلان
امریکہ کی ایک اور دوا ساز کمپنی موڈرنا نے اعلان کیا کہ کرونا وائرس کے خلاف اس کی بنائی گئی ویکسین انسانی تجربات میں 94 اعشاریہ پانچ فی صد تک مؤثر ثابت ہوئی ہے۔
اس سے پہلے فائزر نے ایک ہفتہ قبل اعلان کیا تھا کہ اس کی تیار کردہ ویکسین بھی کرونا وائرس کے خلاف تجربات میں مؤثر رہی ہے۔
کرونا وائرس کے خلاف جاری کوششوں میں یہ دونوں اطلاعات ایسے وقت میں امید افزا خبریں بن کر سامنے آئی ہیں جب کووڈ نائنٹین کا موذی مرض پوری دنیا میں پھر سے تیزی سے پھیل رہا ہے اور اس سے ہونے والی اموات کی شرح آٹھ ہزار یومیہ تک جا پہنچی ہے۔
خبر رساں ادارے 'ایسوسی ایٹڈ پریس' کے مطابق اب یہ دونوں کمپنیاں امریکہ میں ہنگامی صورت میں ویکسین استعمال کرنے کی اجازت حاصل کرنے کے لیے درخواست دے سکتی ہیں۔
کرونا وائرس: امریکی یونیورسٹیوں میں انٹرنیشنل اسٹوڈنٹس میں نمایاں کمی
کرونا وائرس کے پھیلاؤ کے باعث امریکہ کی یونیورسٹیوں اور کالجوں میں بین الاقوامی طالب علموں کے داخلوں کی شرح میں گزشتہ برسوں کے مقابلے میں ڈرامائی کمی واقع ہوئی ہے۔ یہ سلسلہ گزشتہ تین سال سے جاری ہے، جس کی وجہ اخراجات میں اضافہ، ویزے کی پابندیاں اور اس سے متعلق مسائل شامل ہیں۔
امریکہ میں نئے تعلیمی سال کا آغاز تین مہینے پہلے ہو گیا تھا، لیکن اس دوران کرونا وائرس کے باعث بین الاقوامی طالب علموں کے داخلے کی شرح میں 43 فی صد کمی واقع ہوئی ہے جو تقریباً 40 ہزار طالب علم بنتی ہے۔
غیر ملکی طالب علموں کے متعلق یہ اعداد و شمار ایک گروپ نے مرتب کیے ہیں، جس کے لیے فنڈز امریکہ کا محکمۂ خارجہ فراہم کرتا ہے اور اس کی بنیاد پر بین الاقوامی طالب علموں کو تعلیمی ویزے جاری کیے جاتے ہیں اور تعلیمی اور معلوماتی دوروں کا بندوبست کیا جاتا ہے۔
کرونا وائرس: پاکستان میں 300 سے زائد افراد کے اجتماع پر پابندی
پاکستان میں کرونا وائرس کی دوسری لہر کے پیشِ نظر 300 سے زائد افراد کے اجتماعات پر پابندی عائد کر دی گئی ہے۔ وزیر اعظم عمران خان نے اپنے جلسے ختم کرنے کا اعلان کرتے ہوئے دوسروں سے بھی ایسا کرنے کی اپیل کی ہے۔
پیر کو قومی رابطہ کمیٹی کے اجلاس کے بعد عوام سے خطاب میں عمران خان کا کہنا تھا کہ پاکستان میں گزشتہ چھ، سات روز کے دوران کرونا وائرس کیسز میں چار گنا اضافہ ہوا ہے۔
اُن کے بقول اگر صورتِ حال یہی رہی تو پاکستان میں جون کے مہینے جیسے حالات دوبارہ پیدا ہو سکتے ہیں جب اسپتالوں میں گنجائش کم پڑنے لگی تھی۔
عمران خان نے کہا کہ شادی ہالوں میں اِن ڈور کیٹرنگ پر پابندی ہو گی جب کہ آؤٹ ڈور کیٹرنگ میں 300 مہمانوں کی اجازت ہو گی۔
امریکہ: کیسز میں اضافے کے بعد مختلف ریاستوں میں پابندیاں عائد
امریکہ میں کرونا وائرس کے کیسز کی تعداد ایک کروڑ 10 لاکھ سے تجاوز کرنے کے بعد متعدد ریاستوں میں حکام نے نئی پابندیاں عائد کرنا شروع کر دی ہیں۔
مشی گن کے گورنر گریچن وہٹمر نے ریستورانوں میں بیٹھ کر کھانا کھانے، ہائی اسکولوں اور کالجوں کے طالب علموں کو تعلیم کے لیے کیمپس جانے، کیسینو اور سنیما گھروں پر پابندی عائد کر دی ہے۔
انہوں نے میڈیا سے گفتگو کرتے ہوئے کہا کہ ہم اس وبا کے بدترین دور سے گزر رہے ہیں۔ اس لیے کچھ اقدامات ناگزیر ہو گئے ہیں۔
شمال مغربی ریاست واشنگٹن کے گورنر جے اِنسلی نے بھی ریستورانوں میں بیٹھ کر کھانا کھانے پر پابندی عائد کرنے کے علاوہ اسٹورز کو ہدایت کی ہے کہ وہ ایک وقت میں گنجائش کے 25 فی صد سے زائد گاہکوں کو اندر آنے کی اجازت نہ دیں۔
گزشتہ ہفتے کے دوران امریکہ میں ڈیڑھ لاکھ تک یومیہ کیسز سامنے رپورٹ ہوئے ہیں جب کہ ملک بھر میں اب تک کووڈ 19 سے دو لاکھ 46 ہزار سے زائد ہلاکتیں بھی ہو چکی ہیں۔
امریکہ کے معروف ڈاکٹر انتھونی فاؤچی نے توقع ظاہر کی ہے کہ کرونا ویکسین چند ہفتوں میں دستیاب ہو گی اور ملک میں کرونا وائرس پر آئندہ برس اپریل یا جولائی میں بڑی حد تک قابو پا لیا جائے گا۔