امریکہ میں مسلسل دوسرے روز ریکارڈ یومیہ کیسز رپورٹ
دنیا بھر میں کرونا وائرس سے سب سے زیادہ متاثرہ ملک امریکہ میں گزشتہ 24 گھنٹوں کے دوران ایک لاکھ 95 ہزار سے زائد کیسز رپورٹ کیے گئے ہیں۔ جو کہ ایک دن میں سامنے آنے والے ریکارڈ کیسز ہیں۔ امریکہ میں گزشتہ روز بھی ریکارد کیسز سامنے آئے تھے۔
امریکہ کی 'جان ہاپکنز یونیورسٹی' کے اعداد و شمار کے مطابق امریکہ میں اس وبا کے سبب مزید 1878 اموات ہوئی ہیں۔
امریکہ میں وبا سے متاثرہ افراد کی تعداد ایک کروڑ 19 لاکھ سے تجاوز کر چکی ہے۔ جب کہ کرونا وائرس سے متاثر ہونے والے 44 لاکھ سے زائد مریض صحت یاب ہو چکے ہیں۔
امریکہ میں مہلک وبا کے باعث اب تک دو لاکھ 54 ہزار سے زائد اموات ہو چکی ہیں۔
چین میں 30 لاکھ افراد کے کرونا ٹیسٹ شروع
چین کے شمالی شہر تیانجن میں کرونا وائرس کے نئے کیسز سامنے آنے کے بعد 30 لاکھ افراد کے کرونا ٹیسٹ کرنے کا عمل شروع کر دیا گیا ہے۔
نیشنل ہیلتھ کمیشن کے مطابق ہفتے کو کرونا وائرس کے مقامی طور پر منتقلی کے سات کیسز سامنے آئے۔ جن میں پانچ کیسز تیانجن میں جب کہ دو کیسز شنگھائی سے رپورٹ ہوئے۔
تیانجن میں کرونا وائرس کے کیسز سامنے آنے کے بعد حکام نے اس رہائشی علاقے کو سیل کر دیا ہے۔ جہاں کرونا کا شکار ہونے والے افراد رہائش پذیر تھے۔
تیانجن کی مقامی حکومت کے مطابق ہفتے سے بن ہائی ڈسٹرکٹ میں تمام شہریوں کے کرونا ٹیسٹ کرنے کا عمل شروع کر دیا گیا ہے۔
علاوہ ازیں شنگھائی میں حکام نے ایک جوڑے کے اسپتال کے دورے کے بعد ان میں کرونا وائرس کی تشخیص ہونے پر اس اسپتال کو سیل کر دیا ہے۔
چین میں اب تک 86 ہزار سے زائد افراد میں کرونا وائرس کی تشخیص ہو چکی ہے۔
خیال رہے کہ کرونا وائرس کی وبا چین کے صوبے ہوبی کے شہر ووہان سے پھوٹی تھی۔ جس نے اب ساری دنیا کو لپیٹ میں لے لیا ہے۔
نئی دہلی کے اسپتالوں میں جگہ کم پڑنے لگی
عالمی وبا سے امریکہ کے بعد سب سے زیادہ متاثرہ ملک بھارت کے دارالحکومت نئی دہلی میں کرونا وائرس کے یومیہ کیسز میں مسلسل اضافہ ہو رہا ہے۔
وزارتِ صحت کے مطابق دہلی میں حالیہ ہفتوں کے دوران اوسطاََ چھ ہزار 700 یومیہ کیسز رپورٹ کیے جا رہے ہیں۔ جب کہ اسپتالوں میں انتہائی نگہداشت کے وارڈز اور شمشان گھاٹوں میں جگہ کم پڑنے لگی ہے۔
ماہرین کا کہنا ہے کہ دہلی میں دیوالی کے بعد آئندہ دو ہفتے اہم ہیں۔
بھارت میں چوبیس گھنٹوں کے دوران مزید 46 ہزار سے زائد افراد میں کرونا وائرس کی تشخیص کی گئی ہے۔
وائرس کے سبب ہفتے کو مزید 564 افراد کی ہلاکت رپورٹ کی گئی۔ جس کے بعد اس وبا کے سبب ہونے والی اموات کی تعداد ایک لاکھ 32 ہزار سے تجاوز کر چکی ہے۔
بھارت کی دو ریاستوں مدھیہ پردیش اور گجرات کے آٹھ شہروں میں ہفتے سے رات کے اوقات میں کرفیو نافذ کرنے کا اعلان کیا گیا ہے۔
کینیڈا میں کیسز میں مسلسل اضافہ، اسپتالوں میں جگہ کم پڑنے کا اندیشہ
کینیڈا کے وزیرِ اعظم جسٹن ٹروڈو نے خبردار کیا ہے کہ کرونا وائرس کے مریضوں میں ہونے والے اضافے کے باعث رواں سال کے اختتام تک اسپتالوں میں جگہ کم پڑ سکتی ہے۔
ملک میں جاری کرونا وائرس کی دوسری لہر سے متعلق جمعے کو جسٹن ٹروڈو نے اپیل کی کہ لوگ جس حد تک ممکن ہو، گھروں میں رہیں۔
کینیڈا کے اہم شہر ٹورنٹو میں بھی مکمل لاک ڈاؤن نافذ کیے جانے کی تیاریاں کی جا رہی ہیں۔
قبل ازیں چیف پبلک ہیلتھ افسر تھریسا ٹام کا کہنا تھا کہ برے ترین حالات میں لوگوں نے میل جول بڑھایا تو یومیہ کیسز کی تعداد 60 ہزار تک جا سکتی ہے۔
تھریسا کا مزید کہنا تھا کہ تقریبات کے انعقاد پر اس وقت عائد کردہ پابندیوں کے باوجود 31 دسمبر تک یومیہ کیسز کی تعداد 20 ہزار تک پہنچ سکتی ہے۔ جو کہ اس وقت پانچ ہزار یومیہ کیسز سے کم ہے۔
امریکہ کی 'جان ہاپکنز یونیورسٹی' کے مطابق کینیڈا میں اب تک تین لاکھ 24 ہزار سے زائد افراد اس وبا سے متاثر ہو چکے ہیں۔ جب کہ 11 ہزار سے زائد اموات ہوئی ہیں۔